ޢަބްދުއްރަޙީމް, ނާޒިމަށް: ދީނާއި މިނިވަންކަން ދަމަހައްޓަވާނީ ރައީސް ޔާމިން, ޣައްދާރުންނަކީ ތީ
މާތްވެގެންވާ އިސްލާމްދީނާއި ޤައުމުގެ މިނިވަންކަން ދަމަހައްޓަވާނީ ކުރީގެ ރައީސް ޢަބްދުﷲ ޔާމިން ޢަބްދުލްޤައްޔޫމުކަމަށް ވިދާޅުވެ ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ), އެމްއެންޕީގެ ރައީސް މުޙައްމަދު ނާޒިމަށް (ކާނަލް ނާޒިމް) ވަރުގަދަ ރައްދެއް ދެއްވައިފިއެވެ.
އިދިކޮޅު ކޯލިޝަންގެ ލީޑަރު ރައީސް ޔާމިނަށް އަމާޒުކުރައްވައި ދަނގެތީ ދާއިރާގެ މެންބަރު ނާޒިމް މިއަދު ދެއްކެވި ވާހަކައަށް ރައްދު ދެއްވައި ޢަބްދުއްރަޙީމް ވިދާޅުވީ ރާއްޖެއަށް ބޭނުންވަނީ ދީނާ މިނިވަންކަން ދަމަހައްޓަވައި, ފުދުންތެރިކަން އިތުރުކުރައްވައި, ތަފާތު ކުރުމެއްނެތި ޤާނޫނު ތަންފީޒުކުރައްވައި, ރައްޔިތުން އެދޭ ތަރައްޤީ ގެނެސްދެއްވޭނެ އަދި ގެނެސްދެއްވި ވަޠަނީ ލީޑަރެެއް ކަމަށެވެ.
އެ ލީޑަރަކީ ރައީސް ޔާމީނު ކަމަށް ޢަބްދުއްރަޙީމް ވިދާޅުވިއެވެ.
ނާޒިމަށް ރައްދު ދެއްވައި ޢަބްދުއްރަޙީމް އިތުރަށް ވިދާޅުވީ ޤައުމުގެ ޣައްދާރުންނަކީ ތިޔައީ ކަމަށާއި, ރައްޔިތުން ތިބީ ޤައުމުގައި ކަންކަން ހިނގާ ގޮތް ބަލަން ކަމަށެވެ.
''ދިވެހިރާއްޖެއަށް ބޭނުންވަނީ ދީނާ މިނިވަންކަން ދަމަހައްޓާ، ފުދުންތެރިކަން އިތުރުކޮށް، ތަފާތު ކުރުމެއްނެތި ޤާނޫނު ތަންފީޒުކޮށް ރައްޔިތުން އެދޭ ތަރައްޤީ ގެނެސްދެވޭނެ އަދި ގެނެސްދެއްވި ވަޠަނީ ލީޑަރެއް. އެ ލީޑަރަކީ ރައީސް ޔާމީނު. ޤައުމުގެ ޣައްދާރުންނަކީ ތިޔައީ. ރައްޔިތުން މި ތިބީ ހޭލާ ބަލަން''
https://twitter.com/Banafsaa/status/1553722719937908739?t=RNngaHfT9u6IZ89NI_H2kw&s=19
ރައީސް ޔާމިން މިއަދު ކުރެއްވި ޓުވީޓެއްގައި ވިދާޅުވީ ދިވެހި ޤައުމު މިއަދު މި ދެކޭ ހާލަތަށް ވައްޓައިލުމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި ނާޒިމްގެ ދައުރު ބޮޑު ކަމަށާއި އެކަމުން ރެކެން މިއަދު އުޅުނަސް, އެ ދެ ބޭފުޅުންނަކީ މަރު ދުވަހާ ޖެހެންދެން ވެސް ''ޣައްދާރުން'' ކަމަށެވެ.
އެ ގޮތުން ނާޒިމް ވިދާޅުވީ ޤައުމަށް އެންމެ ބޮޑަށް ޣައްދާރުވީ ރައީސް ޔާމިން ކަމަށެވެ. އޭގެ އިތުރުން ވަޠަނީ ލީޑަރަކީ ''ތިމަންނާއޭ'' ރައީސް ޔާމިން ވިދާޅުވާއިރު, ވަޠަނީ ލީޑަރަށް ވެރިކަން ދިނުމުން ރައްޔިތުންނާއި ސިޔާސީ ލީޑަރުން ޖަލަށްލައި, ޤައުމުގެ ފައިސާ ގެއްލުވައިލާފައިވާ ކަމަށެވެ.
''މުޅި ދުނިޔެއާއި ޖެހިގަންނަ ވަޠަނީ ލީޑަރެއް ރާއްޖެއަށް ބޭނުމެއް ނޫން. ޤައުމަށް ބޭނުންވަނީ ތާހިރު އުޅުން ހުރި ވަޠަނީ ލީޑަރެއް.'' ނާޒިމް ވިދާޅުވިއެވެ.
ނާޒިމްގެ ވާހަކަތަކާ ގުޅިގެން އިދިކޮޅުގެ ލީޑާޝިޕްގެ ގިނަ ބޭފުޅުން ވަނީ ރައްދު ދެއްވައިފައެވެ.
އެ ގޮތުން ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ ރާއްޖޭގެ ކަންކޮޅުތަކުގައި އިންޑިޔާ ސިފައިން ގާއިމުވެފައި ތިބުމަށް ނާޒިމު ތާއީދުކުރި ކަމަށާއި, ބޭރު ޤައުމުތަކުގެ ސިފައިން މި ބިމުގައި ގާއިމުވެ ތިބުމަށް ތާއީދު ކުރުމަކީ ޣައްދާރުންގެ ސިފައެއް ކަމަށެވެ. އަދި މާލޭގެ ޑެޕިއުޓީ މޭޔަރު އަޙްމަދު ނަރީޝް ވަނީ އެމެރިކާއިން ރާއްޖެއަށް ސޮއިކުރަން ހުށަހެޅި އެއްބަސްވުންކަމަށްވާ ''ސްޓޭޓަސް އޮފް ފޯސަސް އެގްރީމަންޓް (ސޯފާ)'' ގައި ސޮއި ނުކުރެވިގެން ހޭބަލިވީ ހަނދާން އެބަހުރިތޯ ވެސް ސުވާލު ކުރައްވައިފައެވެ.
މި ތަނަށް ވެރިކަން ކުރަން އަރާ މީހުން ދީން ހިމާޔަތް ކުރާވަރު މި ގައުމުން އެބަފެނޭ. ވެރިކަން ބޭނުން ވީމަ ދީން. ވެރިކަން ލިބުނީމަ ސީން. ވެރިކަމަށް އެރި ހުރިހާ މީހުން ދީން ހިމާޔަތްކުރިވަރުން މިތާންގަ އިސްލާމީ ޝަރީއަތް މިއަދާ ހަމައަށްވެސް ގާއިމް ނުކުރެވިގެން މި އުޅެނީ
ކަލ ހިސާބ ޓީޗަރ. ކަލ ލަދެއ ނުގަނޭތ ނާޒިމަށ އެއްޗެހ ގޮވަނ ކަލެއާއ އެއ ފެންވަރުގ މީހުންނާއ ދިމާލަށ ގޮވާބަލ.