ރިޔާސީ ޓިކެޓު ރަސްމީކޮށް ރައީސް ޔާމިނާއި ހަވާލުކުރުމަށް ބާއްވާ ބޮޑު ޖަލްސާ 19 ވަނަ ދުވަހު

އަންނަ ރިޔާސީ އިންތިޚާބުގައި އިދިކޮޅު ކޯލިޝަންގެ ފަރާތުން ވާދަކުރައްވަން ނިންމަވާފައިވާ ކެންޑިޑޭޓް ކުރީގެ ރައީސް ޔާމިން ޢަބްދުލްޤައްޔޫމަށް ރަސްމީކޮށް ރިޔާސީ ޓިކެޓު ހަވާލުކުރުމަށް ބާއްވާ ބޮޑު ޖަލްސާ މި މަހުގެ 19 ވަނަ ދުވަހު ބާއްވަން ނިންމައިފިއެވެ.

Ads by MWSC

ސަންގު ޓީވީގެ ޚަބަަރަށްފަހު ޕްރޮގްރާމުގައި އެކަން އިއުލާނު ކުރެއްވީ ނައިފަރު ދާއިރާގެ މެންބަރު އަދި ޕީޕީއެމްގެ ނައިބު ރައީސް އަޙްމަދު ޝިޔާމެވެ.

އަންނަ ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމިންކަމަށް ޕީޕީއެމް/ޕީއެންސީ ޖޮއިންޓް ކައުންސިލުގެ އިއްތިފާޤުން މިހާރު ވަނީ ފާސްކޮށްފައެވެ.

ޕްރޮގްރާމުގައި ދެއްކެވި ވާހަކައިގައި ޝިޔާމް ވިދާޅުވީ ރައީސް ޔާމިނަށް ޚާއްސަކޮށްގެން ޕާޓީގެ މެންބަރުން ބާއްވާ ޖަލްސާއެއް މި މަހުގެ 19 ވަނަ ދުވަހުގައި އޮންނާނެ ކަމަށާއި އަދި އެ ޖަލްސާގައި ރައީސް ޔާމިނާއި ރަސްމީކޮށް ރިޔާސީ ޓިކެޓު ހަވާލުކުރާނެ ކަމަށެވެ.

ޝިޔާމް ވަނީ އެ ޖަލްސާގައި ވީހާވެސް ގިނަ ބަޔަކު ބައިވެރިވުމަށް އެދިވަޑައިގެންފައެވެ. އަދި އެ ޖަލްސާއަކީ ވަރަށް ކުލަގަދަ ޖަލްސާއަކަށް ހެދުމަށް ޕާޓީން މަސައްކަތް ކުރަމުންދާކަން އޭނާ ފާހަގަކުރެއްވިއެވެ.