ރައީސް ޔާމީނަށް މަރުޙަބާ ކިޔުމަށް ގަން އެއާޕޯޓަށް ދިއުމަށް އެދިއްޖެ
ޕްރޮގްރެސިވް ކޮންގްރެސް ކޯލިޝަނުގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމް މިއަދު އައްޑޫ ސިޓީއަށް ވަޑައިގަންނަވާތީ އެ މަނިކުފާނަށް މަރުޙަބާ ދެންނެވުމަށް، ވީހާވެސް ގިނަ ބަޔަކު ގަން އެއާޕޯޓަށް ދިޔުމަށް އެ ކޯލިޝަނުން އެދިއްޖެއެވެ.
ޕީޕީއެމްގެ ތަރުޖަމާނު ހީނާ ވަލީދު ދެންމެ ވިދާޅުވީ ރައީސް ޔާމީނަށް ގަމަށް ވަޑައިގެންނެވޭނީ މިއަދު މެންދުރުފަހު 14:00 ހާއިރު ކަމަށެވެ. އެ ގޮތުން އެ މަނިކުފާނަށް މަރުހަބާ ދެންނެވުމަށް ވީހާވެސް ގިނަ ބަޔަކު އެއާޕޯޓަށް ދިއުމަށް ހީނާ އެދިވަޑައިގަތެވެ.
''ހުރިހާ ރަށްރަށަކުން ވެސް އެރައިވަލްއަށް ދާނެ. ވަރަށް ފުރިހަމައަށް ތައްޔާރުވަމުން ދަނީ. ވީހާވެސް ގިނަ ރައްޔިތުން ވަޑއިގެންދެއްވާށޭ ދަންނަވަން އޮތީ.''
ރައީސް ޔާމީން މި ހަފުތާގެ ބުދަ ދުވަހުގެ ނިޔަލަށް ކުރައްވާ މި ދަތުރުފުޅުގައި ފޭދޫ, މަރަދޫ, މަރަދޫފޭދޫ, ހިތަދޫ, ހުޅުދޫމީދޫ އަށް ވަޑައިގަންނަވާނެއެވެ. އެ ގޮތުން އެ ރަށްރަށަށް ވަޑައިގެން އެ ރަށްރަށުގެ ރައްޔިތުންނާއި, ޕީޕީއެމްގެ ސްޓިއަރިން ކޮމިޓީތަކުގެ މެންބަރުންނާއި ޕީޕީއެމްގެ މެންބަރުންނާ ބައްދަލު ކުރައްވާނެއެވެ.
ހީނާ މީގެ ކުރިން ވިދާޅުވި ގޮތުގައި މި ދަތުރުފުޅުގައި ރައީސް ޔާމީން އެންމެ ބޮޑު އިސްކަމެއް ދެއްވާ އެއްކަމަކީ ވަކި ފިކުރަކަށް ނުބަލައި, ވަކި ޕާޓީއަކަށް ނުބަލައި ރައްޔިތުންނާ ބައްދަލުކުރެއްވުމެވެ.
ރައީސް ޔާމީން އައްޑުއަށް ކުރައްވާ މި ދަތުރުފުޅަކީ ރިޔާސީ ކެންޑިޑޭޓުގެ ހައިސިއްޔަތުން ކުރައްވާ 04 ވަނަ ދަތުރުފުޅެވެ. ރިޔާސީ ކެންޑިޑޭޓުގެ ހައިސިއްޔަތުން އެ މަނިކުފާނު ފުރަތަމަ ވަޑައިގަތީ ދ.ކުޑހުވަދުއަށެވެ. ދެވަނަ ދަތުރުފުޅު ކުރެއްވީ ހއ.އަތޮޅުގެ ބައެއް ރަށްތަކަށެވެ. އެއަށްފަހު ދެން ވަޑައިގަތީ ނ.އަތޮޅުގެ ބައެއް ރަށްތަކަށެވެ.
މި ދަތުރުފުޅުތަކުގެ މައިގަނޑު މަޤްސަދުތަކުގެތެރޭގައި 2023 ވަނަ އަހަރުގެ ޕީޕީއެމްގެ ރިޔާސީ މެނިފެސްޓޯއަށް މަޢުލޫމާތުތައް އެއްކުރުމާއި, ސަރުކާރު ހިންގުމުގެ ދާއިރާއަށް ގެންނަންޖެހޭ ބަދަލުތަކާ ގުޅޭ ގޮތުން ޚިޔާލު ހޯދުން ހިމެނެއެވެ.
Ads by STO
