ރައީސް ޔާމީން ސަރުކާރަށް: ޕީޕިއެމްގެ އިންތިޚާބުގެ ކުރެޑިޓް ނަގަން ނޫޅުއްވާ
ޕީޕީއެމްއިން އިއްޔެ ބޭއްވި އެ ޕާޓީގެ އެތެރޭގެ އިންތިޚާބަކީ މިހާތަނަށް ރާއްޖެ ނުދެކޭފަދަ ވަރުގަދަ އިންތިޚާބެއް ކަމަށާއި އިންތިޚާބު އެހާ އޮމާންކޮށް ކުރިއަށްދިޔައީ ރައީސް އިބްރާހިމް މުޙައްމަދު ޞާލިޙްގެ ހެޔޮފުޅުކަމުން ފުލުހުން ނުފޮނުއްވުމުންނެއް ނޫންކަމަށް ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިއަދު ވިދާޅުވެއްޖެއެވެ.
ޕީޕީއެމްއިން އިއްޔެ ބޭއްވި އިންތިޚާބާ ގުޅިގެން ކުރެއްވި ޓުވީޓެއްގައި އެމްޑީޕީގެ ޗެއާޕާސަން, އިކޮނޮމިކް މިނިސްޓަރު ފައްޔާޟް އިސްމާޢީލް ވިދާޅުވީ މިއަދުގެ ރައީސް ފުލުހުން ފޮނުއްވަވައިގެން ސިޔާސީ މިފަދަ ހަރަކާތްތަކަށް ނުހުއްޓުވާކަމީ މިހާރު އޮތް ސިޔާސީ މިނިވަންކަމުގެ ހެއްކެއް ކަމަށެވެ.
ޕީޕީއެމްގެ ދާއިރާތަކުގެ އިންތިޚާބަށް މަރުހަބާ ކިޔަން. ސިޔާސީ މިފަދަ ހަރަކާތްތަކަށް މިއަދުގެ ރައީސް, ފުލުހުން ފޮނުވައިގެން ނުހުއްޓުވާކަމީ މިހާރު އޮތް ސިޔާސީ މިނިވަންކަމުގެ ހެއްކެއް. މީގެ ފަސް އަހަރު ކުރިން މަންޒަރު ކިތަންމެހާ ވެސް ތަފާތު. ވޯޓުފޮށި ބަލާ އޭރު އައީ ފުލުހުން.
މިއަދު އައްޑޫ ސިޓީއަށް ވަޑައިގެން ފޭދޫ ރައްޔިތުންނާއެކު ބޭއްވެވި ޖަލްސާގައި ދެއްކެވި ވާހަކަފުޅުގައި ރައީސް ޔާމީން ވަނީ އެ ވާހަކަތަކަށް ރައްދު ދެއްވައިފައެވެ.
ރައީސް ޔާމީން ވިދާޅުވީ އިއްޔެގެ އިންތިޚާބަހަކީ އޮމާންކަމާއެކު ކުރިއަށްދިޔަ ޑިމޮކްރެޓިކް އިންތިޚާބެއް ކަމަށާއި އެއީ މިހާތަނަށް ރާއްޖެ ނުދެކޭފަދަ ވަރުގަދަ އިންތިޚާބެއް ކަމަށެވެ. އެ އިންތިޚާބުން ރަނގަޅު ފިލާވަޅެއް ލިބިގެންދާނެ ކަމަށާއި ފެނިގެންދިޔައީ ސުލްހަވެރިކަމާއެކީ ވޯޓުލުމަށް ގިނަ ބަޔަކު ނުކުތް މަންޒަރުކަމަށް ވެސް އެ މަނިކުފާނު ވިދާޅުވިއެވެ.
އެއްވެސް ގޮތަކަށް އަޅުގަނޑުމެންގެ ތެރޭ ހަމަނުޖެހުން ހިނގައިގެންނެއް މީހުންގެ ބޯ ތަންތަން ފަޅާލައިގެންނެއް ނޫނީ އެހެން ކަންތައްތައް ކޮށްގެންނެއް... އެމްޑީޕީގަ އިންތިޚާބުތައް ދިޔައިރު ވެފަހުރި ގޮތް.. ނޫނިއްޔާ އުވަގަށާ މެޝިނުން ކަރުދާސް ހޯދަންވެގެންނެއް ނޫނިއްޔާ ބާލިދީތަކަކަށް ކަރުދާސް އަޅައިގެން އުޅޭ ތަނެއް ނުފެނޭ ދެއްތޯ.
އެމްޑީޕީއަށް ފާޑުވިދާޅުވެ ދެއްކެވި ވާހަކަފުޅުގައި ރައީސް ޔާމީން ވިދާޅުވިއެވެ.
އެހެންކަމުން މިކަމުގެ ކްރެޑިޓް ނަގަން އެމްޑީޕީން މަސައްކަތް ނުކުރުމަށް ވެސް އެ މަނިކުފާނު ގޮވައިލެއްވިއެވެ.
ފޭދޫގައި ބޭއްވި ޖަލްސާގައި ރައީސް ޔާމީން އަބްދުލްޤައްޔޫމް ވާހަކަފުޅު ދައްކަވަނީ... ފޮޓޯ/ޕީޕީއެމް
މި ރޮނގުން ދެއްކެވި ވާހަކަފުޅުގައި ރައީސް ޔާމީން އިތުރަށް ވިދާޅުވީ އިއްޔެގެ އިންތިޚާބު އޮމާންކޮށް ކުރިއަށްދިޔައީ ރައީސް ޞާލިޙް ހެޔޮފުޅުކަމުން ފުލުހުން ނުފޮނުއްވާތީއެއް ނޫން ކަމަށެވެ. އަދި ފުލުހުން ފޮނުއްވަންޖެހޭ ސަބަބެއް ވެސް ނެތް ކަމަށާއި ޕީޕީއެމްގެތެރޭގައި ހަމަނުޖެހުމެއް ނެތްކަމަށް ވެސް ރައީސް ޔާމީން ވިދާޅުވިއެވެ.
2018 ވަނަ އަހަރުގެ ރިޔާސީ އިންތިޚާބަށް ކެންޑިޑޭޓަކު ހޮވުމަށް އެމްޑީޕީން ބޭއްވި ޕްރައިމަރީ އިންތިޚާބު ކުރިއަށްދިޔައިރު ފުލުހުން ގޮސް އެކަމަށް ހުރަސްއެޅިއެވެ. ފުލުހުން އެ އިންތިޚާބަށް ހުރަސްއެޅީ އެއީ ޣައިރު ޤާނޫނީ އިންތިޚާބެއް ކަމަށް ބުނެއެވެ.
ދެން މި ވިދާޅުވަނީ ރައީސް ޔާމީންގެ ސަރުކާރުގަ ތިމަންނަމެން އިންތިޚާބުތައް ބާއްވަމުންދިޔައިރު ފުލުހުން ފޮނުވިއޭ. އެއީ ތެދެއް ކަން ނޭނގެ. ފުލުހުން ފޮނުވީ ކީއްކުރަންތޯ, އެ ބޭފުޅުންނަށް ވޯޓު ގުނުމުގެ ކަންތައްތައް ނުކުރެވިގެން.. ވޯޓު ވެސް ގުނައިދިނީ ފުލުހުން. އެހެންވެގެން ފުލުހުން އެ ތަނަށް ދިޔައީ.
2018 ގައި ކަން ހިނގާދިޔަ ގޮތަށް ޢިޝާރަތް ކުރައްވައި ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އޭރު ފުލުހުން ފޮނުވިއޭ ކިޔައި, ދައުލަތުގެ މުއައްސަސާތަކުގައި ތިއްބަވާ ބޭފުޅުން މިއަދު އެފަދަ ވާހަކަތައް ދެއްކެވުމަކީ ލަދުވެތި ކަމެއް ކަމަށެވެ. އަދި އެމްޑީޕީއަކީ އަބަދުވެސް ތާރީޚު އޮޅުވައިލަން މަސައްކަތް ކުރާ ބައެއް ކަމަށް ރައީސް ޔާމީން ވިދާޅުވިއެވެ.
