ވަގުން ހިފަން މިއަދު ނިކުންނަން މި ޖެހެނީ ޓީޗަރުންނާ: ޝިޔާމް
ވިސްލްބުލޯކޮށް ވަގުން ހިފަން މިއަދު ނިކުންނަން މި ޖެހެނީ ސްކޫލުތަކުގައި ކިޔަވައިދޭން ތިބޭ ޓީޗަރުންނާ ކަމަށް ވިދާޅުވެ ޕީޕީއެމްގެ ނައިބު ރައީސް އަދި ރައްޔިިތުން މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ވިދާޅުވެއްޖެއެވެ.
ވިސްލްބުލޯވަރ އަކީ ފާށާރެވެ. ވިސްލްބުލޯ ކުރުމަކީ ފާށާކުރުމެވެ. މާނައަކީ ތަނެއްގައި ހިނގާ ޤާނޫނާ ނުވަތަ ޤަވާއިދާ ޚިލާފުކަމެއް ފާޅުކުރުމެވެ.
ވަގުން ހިފަން މިއަދު ނިކުންނަން މި ޖެހެނީ ޓީޗަރުންނާ ކަމަށް ޝިޔާމް ވިދާޅުވީ ހުޅުމާލޭ ޣާޒީ ސްކޫލުގެ ބައެއް އިސް ވެރިން ގުޅިގެން ޚިޔާނާތް ހިންގެވިކަމަށް ބުނެ އެ ސްކޫލުގެ ބައެއް ޓީޗަރުންނާއި މުވައްޒަފުން އިއްޔެ އިހުތިޖާޖު ކުރުމުން އެކަމަށް ޢިޝާރަތް ކުރައްވައެވެ.
ސްކޫލެއްގެ ކިޔަވައި ދޭން ތިބޭ ޓީޗަރުން މިއަދު މި ޖެހެނީ ވިސުލްބުލޯކޮށް ވަގުން ހިފަން ނިކުންނަން.
ޤައުމެއްގެ ޒިންމާ ނަންގަވަން ތިއްބެވި ފަރާތްތައް ޚިޔާނާތުގެ މަސްތުގައި ޣާފިލުވެ ޣަރަޤުވީމާ ދެން ފެންނާނީ މުޅި ދަޢުލަތް ފެއިލްވެ ހަމަލަމަ ނެތިދާތަން ކަމަށް ޝިޔާމް ވިދާޅުވިއެވެ.
ރައީސް ޞާލިޙް މަރާމިލަނީ މި ޤައުމުގެ މުސްތަޤުބަލު. އިތުރަށް ޝިޔާމް ވިދާޅުވިއެވެ.
ޝިޔާމް މިހެން ވިދާޅުވެފައިވާއިރު މި މަހުގެ ނުވަވަނަ ދުވަހު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވީ ''ދައުލަތް ހިންގުމުގެ ނިޒާމުގެ ތެރޭގައި ކޮރަޕްޝަންގެ ކިތަންމެ ކުޑަ ޢަމަލެއް ހިންގާކަށްވެސް އަޅުގަނޑުމެން ނުރުހެން'' ކަމުގައެވެ.
އަދި ސަރުކާރުގެ އޮފީސްތަކާއި ކުންފުނިތަކުގެ މާލީ އެންމެހައި ކަންކަން ޤާނޫނީ އިމުގެ ތެރެއިން ފުރިހަމަ ނަޒާހަތްތެރިކަމާ އެކުގައި ކުރުމަށާއި ވީހާވެސް ހާމަކަން ބޮޑު ގޮތެއްގައި އެފަދަ މުޢާމަލާތްތައް ހިންގުމަށް އަބަދުވެސް އިރުޝާދު ދެއްވަމުން ގެންދަވާ ކަމުގައެވެ.
