ރައީސް ޔާމީން ޖަލުގައި ބާއްވާކަށް ނުކެރޭނެ، ނެރޭނަން: އަބްދުއްރަޙީމް
އިދިކޮޅު ލީޑަރު، ރައީސް ޔާމީން އަބްދުލްޤައްޔޫމް ޖަލުގައި ބާއްވަން މި ސަރުކާރަށް ނުކެރޭނެ ކަމަށާއި، އެ މަނިކުފާނު މިނިވަން ކުރާނެ ކަމަށް ވިދާޅުވާ ވާހަކަ، ޕީއެންސީގެ ރައީސް އަބްދުއްރަޙީމް މިރޭވެސް ތަކުރާރު ކުރައްވައިފިއެވެ.
ރައީސް ޔާމީން މިނިވަން ކުރުމަށް ގޮވާލައި، ޕީޕީއެމް-ޕީއެންސީން މިރޭ ކުރިއަށް ގެންދިޔަ އިޙްތިޖާޖަށްފަހުގައި، އާޓިފިޝަލް ބީޗު ސަރަޙައްދުގައި، މިހާރު ކުރިއަށްދާ ޖަލްސާގައި ދެއްކެވި ވާހަކައިގައި އަބްދުއްރަޙީމް ވަނީ ރައީސް ޔާމީން ނޫން ވެރިޔަކު، އިޙްލާސްތެރިކަމާއެކުގައި ދިވެހި ރައްޔިތުންނަށް ޚިދުމަތް ކުރައްވައިފައި ނުވާ ކަމަށެވެ.
އަބްދުއްރަޙީމް ވަނީ ރައީސް ޔާމީނަށް ޖަލު ޙުކުމް އިއްވުމަކީ ރާއްޖޭގެ އެތައް ހާސް ރައްޔިތުންނަށް ލިބުނު ހިތާމައެއްކަން ފާހަގަކުރައްވައި، އެ ރައްޔިތުންގެ އާދޭހަކީ އެމަނިކުފާނު މިނިވަން ކުރުން ކަމަށް ވިދާޅުވެފައެވެ.
"މިނިވަން ކުރާނަން، ވެރިކަންވެސް ހަވާލު ކުރާނަން. ގަދަކޮށް، ރައީސް ޔާމީން ގޮވައިގެން މި އަންނަނީ އިރާދަކުރެއްވިއްޔާ."
އަބްދުއްރަހީމް އިތުރަށް ވިދާޅުވީ، ރައީސް ޔާމީންގެ ކެމްޕެއިން ދާނީ ފަތު އަޑު ކިޔާފައި ބާރަށް ކަމަށެވެ. އޭނާ ވަނީ ސަރުކާރުން ޝަރީޢަތަށް އަތް ބާނައިގެން ރައީސް ޔާމީނުގެ މައްޗަށް ކުށް ސާބިތުވާ ކަމަށް "ކަނޑައެޅުއްވީ" ކަމަށް ވިދާޅުވެ، ރައީސް އިބްރާހީމް މުޙައްމަދު ޞާލިޙަކީ "ވަގެއް" ކަމަށް ކަނޑައަޅުއްވާ ކަމަށް ވިދާޅުވެފައެވެ.
އޭނާ ވިދާޅުވީ ރައީސް ޔާމީންގެ ވެރިކަން ނިމުނުއިރު، ދަޢުލަތުގެ ހަޒާނާގައި ބެހެއްޓި 900 މިލިއަން ޑޮލަރު، މި ސަރުކާރުން ފެންފޮދަކާ ނުލައި ދިރުވާލައިފައިވާ ކަމަށެވެ.
"މި ކަނޑައަޅަނީ، ރައީސް ސޯލިހަކީ ވަގެއް ކަމަށް. އޭނާއާ އެކީ ވިކިފައި ތިބި ޣައްދާރުންނަކީ ވަގުން ކަމަށް މި ކަނޑައެޅީ."
ވ.އާރަށް ކުއްޔަށް ދޫކުރުމުގެ މުޢާމަލާތާ ގުޅިގެން ރައީސް ޔާމީންގެ މައްޗަށް މަނީ ލޯންޑްރިން، އަދި ރިޝްވަތު ޤަބޫލު ކުރުމުގެ ކުށް ސާބިތުވާ ކަމަށް ކަނޑައެޅީ މިދިޔަ މަހުގެ 25 ވަނަ ދުވަހުއެވެ.
ތިޔަހެން ބުނާއިރު އެއްމިޔަކަނުން ހިނިއައިސްފަ ހުންނަހެން ހާދަ ހީވެއެވެ. ވޯޓް ފޯ އަދުރޭ! ހިޕްހޮޕް! ޔާމީނަށްވުރެން ރަގަޅުވާނެ އަސްލުވެސް!