އިދިކޮޅު ޖަލްސާއަށް ހުރަސް ނޭޅުމުން، އިމްރާންގެ ތަޢުރީފު ރައީސް ޞާލިޙަށް
ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީން، ރޭ އެ ޕާޓީގެ ރިޔާސީ ޕްރައިމީގެ ކެމްޕެއިން ޖަލްސާ ބާއްވަމުން ދިޔަ މަގުގެ އަނެއްފަޅީގައި އިދިކޮޅު ފަރާތްތަކުން ޖަލްސާ ބާއްވަން ފުރުސަތު ދިނުމުން އެނގެނީ ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހަކީ ހިތްވަރުގަދަ، ކެތްތެރި ބޭފުޅެއްކަން ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ އިމްރާން މިއަދު ކުރެއްވި ޓްވީޓެއްގައި ވިދާޅުވީ މިކަމުން ދައްކައިދެނީ، ހަމަހަމަ ފުރުސަތު ދީގެން މަސައްކަތް ކުރުމުގެ ޤާބިލުކަން ހުރި މިންވަރު ކަމަށެވެ.
އިމްރާން އިތުރަށް ވިދާޅުވީ ކުރީގެ ރައީސް ޔާމީން ބައިވެރިވެ ވަޑައިގަންނަވާ ޖަލްސާއެއްގެ ވަސް ފޯރާ ހިސާބުގައިވެސް އިދިކޮޅު ބަޔަކު ޖަލްސާ ބާއްވަން ފުރުސަތު ނުދެއްވާނެކަން ހުދު ޕީޕީއެމްގެ މެމްބަރުންވެސް ގަބޫލުކުރައްވާނެކަމަށެވެ.
ރޭ އެމްޑީޕީގެ މައި ހަރުގޭގައި އެޕާޓީގެ ކެމްޕޭން ޖަލްސާ ކުރިއަށް ގެންދިޔަ ވަގުތު، އިދިކޮޅު ފަރާތްތަކުން ވަނީ ހަރުގޭ ކުރިމަތީގައިވާ އާރޓިފިޝަލް ބީޗްގައި އެޕާޓީގެ ޖަލްސާ ކުރިއަށް ގެންގޮސްފައެވެ.
އިދިކޮޅުން ކުރިއަށް ގެންދިޔަ ޖަލްސާއަށް އިޝާރާތްކުރައްވައި، އެމްޑީޕީގެ ޖަގަހައިގައި ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ހައްޔަރު ނުކުރިއަސް ބަންދު ނުކުރިއަސް ވެރިކަން ކުރެއްވޭނެކަން އެމަނިކުފާނު އެ ގެންދަވަނީ ސާބިތު ކޮށްދެއްވަމުން ކަމަށެވެ.
Ads by STO
