ކޮވިޑް-19: އައްޑޫ ސިޓީ ހިތަދޫއިން އިތުރު މީހަކު ފައްސިވެއްޖެ
އައްޑޫސިޓީ ހިތަދޫއިން އިތުރު މީހަކު ކޮވިޑް-19 ފައްސިވެއްޖެއެވެ.
އެނގިފައިވާ މިފަހަރު ވެސް ހިތަދޫން ފައްސިވެފައިވަނީ އެރަށުގައި ހޯމް ކަރަންޓީނުގައި ހުރި މީހެކެވެ.
މިކަމާއި ގުޅޭގޮތުން ހެލްތު އިމަޖެންސީ އޮޕަރޭޝަން ސެންޓަރ (އެޗްއީއޯސީ) މިއަދު ވިދާޅުވީ، އައްޑޫ ސިޓީ ހިތަދޫން ފުރަބަންދު ކަރަންޓީީން ފުރިހަމަ ކުރުމަށްފަހު ކޮވިޑް-19 އަށް ޓެސްޓު ކުރި 21 އަހަރުގެ ދިވެހި އަންހެނަކު ކޮވިޑް-19 އަށް ފައްސިވެފައިވާ ކަމަށެވެ.
އައްޑޫސިޓީ ހިތަދޫގައި ހޯމް ކަރަންޓީނުގައި ތިބި މީހުންގެ ތެރެއިން މިއީ ކޮވިޑަށް ފައްސިވީ ތިން ވަނަ މީހާއެވެ.މީގެކުރިން އެތަނުން ފައްސި ވެފައިވަނީ ހޯމް ކަރަންޓީނުގައި ހުރި ފުލުހަކާއި ބިދޭސީއެކެވެ.
ރާއްޖޭގައި ކޮވިޑް-19 އަށް ފައްސިވީ މީހުންގެ ޖުމްލަ އަދަދު މިހާރު ވަނީ ފަސް ހާހަށްވުރެ މައްޗަށް އަރާފައެވެ. އެގޮތުން އެޗްއީއޯސީން ރޭގައި އިއުލާނު ކުރިއިރު ޖުމްލަ 5،157 މީހުން މިބައްޔަށް ރާއްޖެއިން ފައްސި ވެފައިވެއެވެ.
