އައްޑޫ ސިޓީއަކީ ތަރައްގީގެ ވިސްނުމުގެ މައި ހަބެއް:ރައީސުލްޖުމްހޫރިއްޔާ

އައްޑޫ ސިޓީއަކީ ތަރައްގީގެ މައިހަބެއް ކަމަށާއި ދިވެހިރާއްޖެއަށް އަންނަ ކޮންމެ ބަދަލެއްގެ ހެޔޮ ފާހަގަ ފުރަތަމަ ޖެހެން ޖެހޭ ތަނަކީ އައްޑޫ ސިޓީކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

Ads by STELCO

އެމްޑީޕީގެ ރިޔާސީ ޕްރައިމަރީގެ ކެމްޕޭނަށް މިހާރު އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި މިއަދު އެސިޓީގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ އައްޑޫ ސިޓީގެ ރައްޔިތުންނަކީ އަބަދުވެސް އިސްލާހަށް މަސައްކަތްކުރުމުގައި އެންމެ އިސްސަފުގައި މަސައްކަތް ކުރާ ރައްޔިތެއްކަމަށެވެ.

"އެމްޑީޕީއެއް ދެމިއެއް ނޯންނާނެ އައްޑޫ ސިޓީގެ ރައްޔިތުން ނެތިއެއް. ރާއްޖޭގެ ތަރައްގީގެ ކޮންމެކަމެއްގައިވެސް އަބަދުވެސް އެންމެ އިސްސަފުގައި ދެމިތިބި ރައްޔިތެއް. މިޕާޓީ ވުޖޫދުވެގެން އައި އިރު އައްޑޫސިޓީގެ ރައްޔިތުންވީ ގުރުބާނީ އަޅުގަނޑު ހަނދާން އެބަހުރި. މިއަދުވެސް އައްޑޫސިޓީގެ ރައްޔިތުންތިބީ ޕާޓީއާއެކު އެގޮތުގައި" ރައީސް ވިދާޅުވިއެވެ.

ރައީސް އިތުރަށް ވިދާޅުވީ ދިވެހިރާއްޖެއަށް އަންނަ ކޮންމެ ބަދަލެއްގެ ހެޔޮ ފާހަގަ ފުރަތަމަ ޖެހެން ޖެހޭ ތަނަކީ އައްޑޫ ސިޓީ ކަމަށާއި އައްޑޫ ސިޓީއަކީ ތަރައްގީގެ ވިސްނުމުގެ މައި ހަބެއްކަމަށެވެ. އަދި އައްޑޫ ރައްޔިތުންނަކީ ސިޔާސީ ވިސްނުމާއި ތަރައްގީގެ ވިސްނުން ވަރަށް ފުޅާދާއިރާއެއްގައި އޮތް ބައެއް ކަމަށް ރައީސް ވަނީ ފާހަގަކުރައްވާފައެވެ.

"އައްޑޫ ސިޓީ ތަރައްގީ ނުވެ މިރާއްޖެއެއް ތަރައްގީއެއް ނުވާނެ އައްޑޫ ރައްޔިތުންނަކީ ސިޔާސީ ވިސްނުމާއި ތަރައްގީގެ ވިސްނުން ވަރަށް ފުޅާދާއިރާއެއްގައި އޮތް ބައެއް. މިއީ ތަރައްގީ ވިސްނުމުގެ މައި ހަބެއް. ރާއްޖޭގެ ކޮންމެ ކުރިއެރުމެއްގައި އަޅުގަނޑު ކުރިންވެސް ދެންނެވި ފަދައިން އެއީ ސިއްހީ ދާއިރާ ކަމުގައިވިޔަސް ތައުލީމީ ދާއިރާކަމުގައި ވިޔަސް ސިޔާސީ ދާއިރާ ކަމުގައި ވިޔަސް ވިޔަފާރީގެ ދާއިރާ ކަމުގައިވިޔަސް އެންމެ އިސް ސަފުގައި ހަރަކާތްތެރިވަނީ މިއައްޑޫ ސިޓީގެ ރައްޔިތުން" ރައީސް ވިދާޅުވިއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވި ގޮތުގައި އައްޑޫ ސިޓީގެ ރައްޔިތުންނަށް ތަރައްގީގެ ވާހަކަ ދެއްކޭވަރު މިވީ އަދިކިރިޔާއެވެ. ކުރީގެ ސަރުކާރުތަކުން އައްޑޫގައި މަޝްރޫއުތަކެއް ހިނގަން އުޅެފައި އެބަހުރި ކަމަށާއި ނަމަވެސް ޕްލޭނެއް ނެތި ކުއްލި ކުއްލިއަށް ކުރަން އުޅުމުގެ ސަބަބުން އެތައް އަހަރުތަކެއް ވަންދެން އެކަމުގައި އުޅޭން ޖެހުނުކަމަށް ރައީސް ފާހަގަކުރިއެވެ.