ރިޔާސީ އިންތިހާބުގައި ވާދަކުރުމާއިމެދު ޖޭޕީން ގޮތެއް ނިންމުން އަންނަ މަހަށް ތާވަލުކޮށްފި
މިއަހަރުގެ ސެޕްޓެމްބަރު މަހު ބޭއްވުމަށް ތައްޔާރުވަމުންދާ ރިޔާސީ އިންތިހާބުގައި ވާދަކުރަން ކެނޑިޑޭޓެއް ނެރުމާއިމެދު ގޮތެއް ނިންމުމަށް ޖުމްހޫރީ ޕާޓީން ހާއްސަ ކައުންސިލެއް ހޮވުން އަންނަ ފެބުރުއަރީ މަހަށް ތާވަލުކޮށްފި އެވެ.
ޖޭޕީން ބުނާ ގޮތުގައި ރިޔާސީ އިންތިހާބުގައި ވާދަކުރުމާއިމެދު ގޮތެއް ނިންމާނީ ހާއްސަ ކައުންސިލަކުންނެވެ. އެ ކައުންސިލް ހޮވާނީ ޕާޓީގެ ކޮންގްރެސްއިންނެވެ. ކޮންގްރެސް ބާއްވަން ހަމަޖެހިފައިވަނީ އަންނަ ފެބުރުއަރީ މަހުގެ ތެރޭގަ އެވެ.
ޖޭޕީގެ އަސާސީ ގަވާއިދު ބުނާ ގޮތުން ރިޔާސީ އިންތިހާބު އޮންނަ އަހަރުގެ މާޗު މަސް ނިމުމުގެ ކުރިން އެޕާޓީގެ ކޮންގްރެސް ބާއްވަން ޖެހެ އެވެ. އެހެންކަމުން އެޕާޓީން މިހާރު ދަނީ ކޮންގްރެސް ބޭއްވުމަށް އިދާރީ ތައްޔާރީތައް ވަމުންނެވެ.
ކޮންގްރެސްއިން ހޮވާ ކައުންސިލްގެ ފުރަތަމަ ޖަލްސާގައި އޮންނާނީ ރިޔާސީ އިންތިހާބުގައި ވާދަކުރުމާއިމެދު ގޮތެއް ނިންމުމެވެ. ޖޭޕީއަކީ މިހާރު ސަރުކާރު ކޯލިޝަންގައި އޮތް ޕާޓީ އެކެވެ. އެހެންނަމަވެސް ކުރިއަށް އޮތް ރިޔާސީ އިންތިހާބަށް ކެނޑިޑަކު ނެރޭނެކަން މީގެ ކުރިން ގާސިމް އިއުލާން ކުރެއްވި އެވެ.
ޖުމްހޫރީ ޕާޓީއަކީ ރާއްޖޭގައި ތިންވަނައަށް އެންމެ ބޮޑު ސިޔާސީ ޕާޓީ އެވެ. އެޕާޓީގެ މެމްބަރުންގެ ގޮތުގައި ސަތާރަ ހާހަށްވުރެއް ގިނަ މީހުން އެބަ ތިއްބެވެ.
ރައީސް އިބްރާހިމް މުހައްމަދު ޞާލިހު މީގެ ކުރިން ވަނީ އެމްޑީޕީއަށް އެކަނި އިންތިހާބު ކާމިޔާބު ނުކުރެވޭނެކަމަށް ވިދާޅުވެފަ އެވެ. އެހެންކަމުން އެހެން ސިޔާސީ ޕާޓީތަކާއިއެކު ކޯލިޝަން ހެދުމުގެ ވިސްނުމެއް އެމަނިކުފާނު ގެންގުޅުއްވާކަމަށް ވިދާޅުވި އެވެ.
2018 ވަނަ އަހަރުގެ ރިޔާސީ އިންތިހާބު ފިޔަވައި މީގެ ކުރިން ބޭއްވި ކޮންމެ ރިޔާސީ އިންތިހާބެއްގައި ޖޭޕީގެ ފަރާތުން ވާދަކުރައްވާފައިވަނީ އެޕާޓީގެ ލީޑަރު ގާސިމް އިބްރާހީމެވެ. ކޮންމެ އިންތިހާބެއްގައިވެސް ދެވަނަ ބުރަކަށް ގޮސް ގާސިމް އެހެން ސިޔާސީ ޕާޓީއަކާއިއެކު ކޯލިޝަން ހައްދަވަ އެވެ. މީގެ ކުރިން އެކުލަވައިލި ކޮންމެ ސަރުކާރެއްގައިވެސް ޖޭޕީގެ ހިއްސާ އޮވެ އެވެ.
