ޖޭޕީގެ މެމްބަރުންނަށް މަޤާމުތައް ދިނީ ވަކި މީހެއްގެ ތަރިކަ މުދަލަކުން ނޫން: ޤާސިމް

ކަންބަޅިތަކެއް ފަދައިން ޖުމްހޫރީ ޕާޓީގެ ބޭފުޅުން ސަރުކާރުގެ މަގާމުތަކުން ކަތިލާ ތަން ބަލަން ހުންނެވި ކަމަށާއި، ޖޭޕީއަށް މަޤާމުތައް ދިނީ މީހެއްގެ ތަރިކަ މުދަލުން ނޫން ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

Ads by STELCO

ޖޭޕީން، ވަކިން ރިޔާސީ ރޭހަށް ނުކުންނަން ނިންމިއިރު، ސަރުކާރުގައި ތިބި ޖޭޕީގެ ބޭފުޅުން މަޤާމުތަކުން ވަކިކުރަން އެމްޑީޕީގެ ބައެއް މެމްބަރުން އަންނަނީ ގޮވާލަމުންނެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މަކުނުދޫ ދާއިރާގެ މެންބަރު މުހައްމަދު ރާއީ ވަނީ ސަރުކާރުގައި ޖުމްހޫރީ ޕާޓީގެ ސްލޮޓްތަކުގައި ތިބި ފަރާތްތައް ކަންބަޅި ކަތިލާ އުސޫލުން ވަކިކުރުމުގެ ކުރިން އިސްތިއުފާ ދިނުމަށް ގޮވައިލައިފައެވެ.

އެ ވާހަކަތަކަށް ރައްދު ދެއްވަމުން މަޖިލީހުގެ ރަސްމީ ވަޓްސްއެޕް ގްރޫޕަށް ޤާސިމް ފޮނުއްވި މެސެޖެއްގައި ވިދާޅުވީ ކަންބަޅިތަކެއް ފަދައިން ޖޭޕީގެ ބޭފުޅުން ސަރުކާރުގެ މަޤާމުތަކުން ކަތިލާތަން ނިކަމެތިކަމާއެކު ބަލަން ހުންނެވި ކަމަށެވެ.

ޤާސިމް ވަނީ ކޯލިޝަން އެއްބަސްވުން ހެދީ، މި އަހަރުގެ ނޮވެމްބަރު މަހުގެ 18 ވަނަ ދުވަހާއި ހަމައަށް ކަމަށާއި، އޭގެ ކުރިން ޖޭޕީގެ ސްލޮޓްތަކުގައި ތިބި އެއްވެސް ބޭފުޅަކު އިސްތިއުފާ ދޭން ނުޖެހޭނެ ކަމަށެވެ.

އަދި ނޮވެމްބަރު 18 ގެ ކުރިން ޖޭޕީގެ ފަރާތްތައް އިސްތިއުފާ ދޭންޖެހޭނަމަ ރައީސް އިބްރާހިމް މުޙައްމަދު ޞާލިޙު ވެސް އިސްތިއުފާ ދޭންޖެހޭނެ ކަމަށް ޤާސިމް ވިދާޅުވިއެވެ.

ޤާސިމް އިތުރަށް ވިދާޅުވީ ޖުމްހޫރީ ޕާޓީއަށް ދީފައިވާ މަގާމުތައް ދީފައިވަނީ އެއްވެސް މީހެއްގެ އަމިއްލަ ތަރިކަ މުދަލުން ނޫން ކަމަށެވެ.

އަދި އެއްބަސްވި ގޮތާ އެއްގޮތަށް ބައިކުޅަބައިތައް ދެވުނުތޯ އަމިއްލައަށް ވިސްނާލުމަށް ވެސް އެދިވަޑައިގަތެވެ.