ކޮވިޑް-19: މިއަދު ރާއްޖެއިން ފައްސިވީ 107 މީހުން
މިއަދު ރާއްޖެއިން ކޮވިޑަށް ފައްސިވީ107 މީހުންނެވެ.
ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފައިވަނީ މިއަދު މިބައްޔަށް ފައްސި ވެފައިވަނީ 73 ދިވެހީންނާއި، ބަންގްލަދޭޝްގެ 29 ރައްޔިތުންނާއި އިންޑިއާގެ 3 ރައްޔިތަކާއި ފިލިޕީންސްގެ ރައްޔިތަކާއި ޝްރީ ލަންކާގެ ރައްޔިތެކެވެ.
އޭގެތެރެއިން މާލެއިން 104 މީހުން ކޮވިޑަށް ފައްސި ވެފައިވާއިރު އަތޮޅު ތެރެއިން 3 މީހަކު ފައްސި ވެފައިވެއެވެ.
ތަކުރާރުކޮށް ނަގާފައިވާ ސާމްޕަލް ތަކާއެކު މިހާތަނަށް ރާއްޖެއިން 94،865 ސާމްޕަލް މިހާތަނަށް ނެގިފައިވާކަމަށް އެޗްއީއޯސީން މައުލޫމާތު ދީފައިވެއެވެ.
ރާއްޖެއިން ކޮވިޑް-19 ޖެހިފައިވާ މީހުންގެ ޖުމްލަ އަދަދު 5،679 އަށް އަރާފައިވާއިރު އެކްޓިވް 2،449 ކޭސް އެބައުޅޭކަމަށް އެޗްއީއޯސީ ގެ ޑޭޓާތަކުން ދައްކައެވެ.
މިވަގުތު އައިސޮލޭޝަން ފެސިލިޓީ ތަކުގައި ތިބި މީހުންގެ އަދަދު 1،518 އަށް އަރާފައިވާއިރު، 146 މީހުންނަށް ދަނީ ހޮސްޕިޓަލުތަކުން މިބައްޔަށް ފަރުވާ ދެމުންނެވެ.
ރާއްޖެއިން މިބަލި ޖެހުނު މީހުންގެ ތެރެއިން ޖުމްލަ 3،208 މީހުން ބަލިން ރަނގަޅުވެފައިވެއެވެ. އަދި 22 މީހުން ވަނީ މިބަލީގައި ނިޔާވެފައެވެ.
