ޖުމްހޫރީ ޕާޓީގެ ރިޔާސީ ޓިކެޓް ގާސިމަށް އަރުވައިފި
މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރައްވާ، އެޕާޓީގެ ލީޑަރު ގާސިމް އިބްރާހިމް އަށް ރިޔާސީ ޓިކެޓް އަރުވައިފިއެވެ.
ގާސިމަށް ރިޔާސީ ޓިކެޓް އެރުވުމުގެ ރަސްމިއްޔާތު ބާއްވާފައިވަނީ ކާނިވާ ސަރަހައްދުގައެވެ. އެ ރަސްމިއްޔާތުގައި ޖުމުހޫރީ ޕާޓީއަށް ތާއީދުކުރާ ގިނަ ބަޔަކު ވަނީ ބައިވެފައެވެ.
ޖުމުހޫރީ ޕާޓީގެ ފަރާތުން އެޕާޓީގެ ރިޔާސީ ޓިކެޓް ގާސިމްއާއި ހަވާލު ކޮށްދެއްވީ ޕާޓީގެ ސެކެޓްރީ ޖެނެރަލް އަލީ އާރިފްއެވެ.
ޤާސިމަށް ޓިކެޓު އެރުވުމުގެ އިތުރަށް ކެމްޕެއިނުގައި ބޭނުންކުރާ ލޯގޯއާއި ކެމްޕެއިނުގެ ރަސްމީ ލަވަވެސް މިރޭގެ ޖަލްސާގައި ވަނީ އިފުތިތާހުކޮށްފައެވެ. އެގޮތުން ޤާސިމުގެ ކެމްޕެއިން ޝިއާރެއްގެ ގޮތުގައި ބޭނުންކުރަނީ "ހާސްކަނޑާލާ، ހަމަޖެހޭނެ" މިއެވެ.
ރިޔާސީ އިންތިހާބުގައި ޖޭޕީގެ ފަރާތުން ގާސިމް ވާދަކުރައްވާއިރު އެމްޑީޕީގެ ޓިކެޓުގައި ވާދަކުރައްވަނީ ރައީސް އިބްރާޙިމް މުހައްމަދު ޞާލިޙެވެ. މީގެއިތުރުން އެމްއެންޕީގެ ޓިކެޓުގައި އެޕާޓީގެ ލީޑަރު މުހައްމަދު ނާޒިމް އިންތިހާބުގައި ވާދަކުރައްވާއިރު އިދިކޮޅު ޕީޕީއެމްގެ ރިޔާސީ ކެނޑިޑޭޓަކީ ކުރީގެ ރައީސް އަބްދުﷲ ޔާމީންއެވެ.
Ads by STO
