މި ސަރުކާރުން ކުރި އެންމެ މުހިންމު މަސައްކަތަކީ މި ރާއްޖެ އަކީ ހަމަޖެހޭ އަމާން ތަނަކަށް ހެދުމަށް ކުރި މަސައްކަތް: ރައީސް ޞާލިޙް
މި ސަރުކާރުން ކުރި އެންމެ މުހިންމު އަދި އެންމެ ބުރަ މަސައްކަތަކީ، މި ރާއްޖޭއަކީ ހަމަޖެހޭ އަމާން މުޖްތަމަޢަކަށް ހެދުމަށް ކުރި މަސައްކަތްކަމަށް ރައީސް އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ އެމަނިކުފާނުގެ ކެމްޕޭން ފެއްޓެވުމުގެ ގޮތުން ށ. އަތޮޅަށް ކުރެއްވި ދަތުރުފުޅުގައި އެ އަތޮޅު ކޮމަންޑުއަށް ވަޑައިގެން އެ ރަށުގެ އެމްޑީޕީ މެމްބަރުންނާއިއެކު ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
އެގޮތުން، އުފާވެރި އަމާން ރާއްޖެއެއް ކޮންމެ ރައްޔިތަކުވެސް ބޭނުންވާނެކަމަށާއި، އެއީ ބުނާބަހަކުން އެކަނި ކުރެވޭނެކަމެއް ނޫންކަމަށް ރައީސް ޞާލިޙު ވިދާޅުވިއެވެ. އަދި އެކަން ކުރުމަށް ބައިވަރު މަސައްކަތްތައް ކުރަންޖެހޭ ކަމަށެވެ.
އެގޮތުން ފުރަތަމަ ކުރަން ޖެހޭ ކަމަކީ އަމާން ހަމަޖެހޭ މުޖްތަމަޢުއެއް ޤާއިމުކުރުން ކަމަށް ވިދާޅުވަމުން ރައީސް ޞާލިޙް ވިދާޅުވީ، މި ސަރުކާރުން ކުރި އެންމެ ބުރަ މަސައްކަތަކީ މި ރާއްޖެއަކީ އަމާން މުޖްތަމަޢަކަށް ހެދުމަށް ކުރި މަސައްކަތްކަމަށެވެ.
"ވޭތުވެދިޔަ ފަސް އަހަރު ދުވަހު، މި ސަރުކާރުން ކުރި އެންމެ ބުރަ، އެންމެ މުހިންމު މަސައްކަތަކީ މި ރާއްޖެއަކީ ހަމަޖެހޭ އަމާން މުޖްތަމަޢަކަށް ހެދުމަށް ކުރި މަސައްކަތް. އިރާދުކުރެއްވިއްޔާ އެ މަސައްކަތުގެ ހެޔޮ ނަތީޖާ މާލެއާއި މުޅި ރާއްޖޭގެ އެކިކަންކޮޅުތަކުން ރައްޔިތުން އެބަ ދެކެމުންދޭ" ރައީސް ޞާލިޙް ވިދާޅުވިއެވެ.
އަދި 2018 ވަނަ އަހަރު މި ސަރުކާރު ވެރިކަމަށް އައިއިރު ރާއްޖޭގެ ޙާލަތު ސިފަކުރައްވަމުން، އެމަނިކުފާނު ވިދާޅުވީ އޭރު ރާއްޖޭގައި ދިޔައީ މީހުން މަރަމުންކަމަށާއި، ވިޔަފާރިވެރިންނަށް ހަމަޖެހިގެން ވިޔަފާރި ނުކުރެވޭކަމަށާއި، ސަރުކާރާއި ޚިޔާލު ތަފާތު މީހުން ތިބެންޖެހުނީ ޖަލުގައި ނުވަތަ ރާއްޖެއަށް ނާދެވި ކަމަށާއި، ނޫސްވެރިކަމުގެ މިނިވަންކަން ނަގާލާފައިވާކަމަށާއި އަދި މިނޫނަސް ބައިވަރު މައްސަލަތައް އޭރު ހުރި ކަމަށެވެ.
ނަމަވެސް އެމަނިކުފާނު ވެރިކަމަށް އައުމާއެކު އެ ކަންތައް ބަދަލުވެގެން ދިޔަތަން ރައްޔިތުންނަށް ފެންނާނެކަމަށްވެސް ވިދާޅުވިއެވެ.
ހަމައެއާއެކު ދިވެހި ކޮންމެ ރައްޔިތަކީ އުފާވެރިކަމާއެކު، ހަމަޖެހިގެން ރާއްޖޭގައި އުޅެވޭ މީހަކަށް ވާންޖެހޭނެކަމަށާއި، އަސާސީ ޚިދުމަތްތަކުން މަޙްރޫމްވެގެން ތިބެ އެ ހަމަޖެހުމާއި އުފާވެރިކަން ލިބޭނެގޮތެއް ނެތްކަމަށް އެމަނިކުފާނު ވިދާޅުވިއެވެ. އެ ހިތްހަމަޖެހުމާއި އުފާވެރިކަން ހޯދުމަށް ރަނގަޅު ބޯ ފެނާއި، ތަޢުލީމާއި ސިއްޙަތު ބޭނުންވާނެކަމަށާއި، އެއްވެސް ރަށެއް ތަފާތު ކުރުމެއް ނެތި މި ސަރުކާރުން ރާއްޖޭގެ ހުރިހާ ރައްޔިތުންނަށް އެ ކަންކަން ފޯރުކޮށްދެމުން އަންނަ ކަމަށްވެސް ރައީސް ޞާލިޙުގެ ވާހަކަފުޅުގައި ފާހަގަކުރެއްވިއެވެ.
ރައްޔިތުން ބޭނުންވާ އަސާސީ ޙިދުމަތްތައް ފޯރުކޮށްދެއްވަމުން ދާ ކަމަށް އަލިއަޅުއްވަމުން ރައީސް ޞާލިޙް ވިދާޅުވީ، ރައްޔިތުންނަށް މަގުމަތީގެ އަމާންކަމާއި، އިޖްތިމާޢީ ދުޅަހެޔޮކަމާއި ހަމަޖެހުން މިއަދު ލިބެމުންދާކަމަށެވެ.
މި ސަރުކާރުން ކުރި އެންމެ މުހިންމު އަދި އެންމެ ބުރަ މަސައްކަތަކީ، މި ރާއްޖޭއަކީ ހަމަޖެހޭ އަމާން މުޖްތަމަޢަކަށް ހެދުމަށް ރައީސް ޔާމީން ކުރެއްވި މަސައްކަތަށް ކޮޅުފައިން އެރުން.