އެމްއެންޕީ ސަރުކާރެއްގައި މަސް ކިލޯއަކަށް މަދުވެގެން 22 ރުފިޔާ ދޭނަން: ނާޒިމު

މޯލްޑިވްސް ނެޝަނަލް ޕާޓީ (އެމްއެންޕީ)ގެ ވެރިކަމެއްގައި މަސް ކިލޯއެއް އެންމެ ވިއްކާނީ އެންމެ މަދުވެގެންވެސް 22 ރުފިޔާއަށް ކަމަށް އެ ޕާޓީގެ ރައީސް އަދި އެޕާޓީގެ ރިޔާސީ ކެންޑިޑޭޓް މުޙައްމަދު ނާޒިމު ވިދާޅުވެއްޖެއެވެ.

Ads by Sosun Fihaara

ނާޒިމް މިހެން ވިދާޅުވީ ހއ. އިހަވަންދޫގައި ރޭ ބޭއްވި އެ ޕާޓީގެ ކެމްޕޭން ޖަލްސާގައި ވާހަކަފުޅު ދައްކަވަމުންނެވެ.

އެގޮތުން، 19.50 ރުފިޔާއަށް ޑީސަލް ލީޓަރެއް ގަންނަ މަސްވެރިންނަށް މަސް ކިލޯއަކުން ލިބެނީ 17 ރުފިޔާ ކަމަށާއި އެމްއެންޕީގެ ސަރުކާރެއްގައި މަސް ކިލޯއަކަށް މަދުވެގެން 22 ރުފިޔާ ދޭނެ ކަމަށް ނާޒިމް ވިދާޅުވިއެވެ.

"އަޅުގަނޑު ކައިރީގައި މަސައްކަތްކުރާ އިގުތިސާދީ މާހިރުން ޖެހި ހިސާބަށް ބަލާއިރުގައި އަޅުގަނޑުމެންނަށް 22ރ. ގައި އިރާދަކުރެއްވިއްޔާ މަސް ހިފެހެއްޓިދާނެ،" ނާޒިމު ވިދާޅުވިއެވެ.

ސަރުކާރުތަކުން މަސްވެރިންނާއިމެދު އިޙުމާލުވެފައިވާކަމަށާއި ދެވަނަ ދައުރެއް ބޭނުންވެގެން ބުނަން މި ސަރުކާރުން ލަދުގަންނަންޖެހޭނެކަމަށްވެސް ނާޒިމު ވިދާޅުވިއެވެ.

އަދި އެމްއެންޕީގެ ސަރުކާރެއްގައި އިހަވަންދޫއިން މަސް އެކްސްޕޯޓުކުރެވޭވަރަށް ތަރައްޤީ ކުރާނެ ކަމަށާއި އެ ރަށުގެ ފިއުލް ސްޓޯރޭޖު މަތިކޮށް ރަށުން ތެޔޮ ލިބޭނެ ގޮތް ހަމަޖައްސާނެކަމަށެވެ.

އިހަވަންދޫގައި ބޭއްވި ޖަލްސާގައި އެމްއެންޕީގެ ސަރުކާރެއްގައި ޑޮލަރުގެ މައްސަލަ ހައްލުކުރުމަށް ކުރަން ނިންމާފައިވާ ކަންކަން ހާމަކުރައްވަމުން ނާޒިމު ވިދާޅުވީ، އާމްދަނީގެ 60 ޕަސަންޓް ޑޮލަރުން ލިބޭ މީހުންނަށް ޑޮލަރު މާރުކުރެވޭނީ ބޭންކުން ކަމަށާއި ޑޮލަރު ރޭޓަކީ 15.42 ރުފިޔާ ނަމަވެސް ޑޮލަރު ގަންނަން ލިބެނީ 17.85 ރުފިޔާއަށް ކަމަށެވެ.

އަދި އެމްއެންޕީގެ ސަރުކާރުގައި ޑޮލަރު މައްސަލަ ހައްލުކުރަން ގެންނަ ބަދަލުތަކާމެދު ޑޮލަރު ލިބޭ މީހުންނާއި ވިޔަފާރިވެރިން ހިތްހަމަނުޖެހުނު ނަމަވެސް ގައުމު މުހިންމު ކަމަށެވެ.

"އަޅުގަނޑަކީވެސް ވިޔަފާރިވެރިއެއް. އެކަމަކު އަޅުގަނޑުވެސް ޖެހޭނީ އެއަށް ތަބާވާން. އަޅުގަނޑުގެ ކުންފުނި ޖެހޭނީ ތަބާވާން،" ނާޒިމު ވިދާޅުވިއެވެ.

މީގެ އިތުރުން އެރަށަށް ކޮށްދެއްވާނެ ކަންތައްތަކުގެ ތެރޭގައި، އިހަވަންދޫ ކައިރީގައި އޮތް ދިގުފަރު ހިއްކާ އެ ރަށުން އިޤުތިޞާދީ މަސައްކަތްތަކަށް ބިން ހަމަޖައްސަވާނެ ކަމަށާއި އިހަވަންދޫ ކޮނިގޮނޑާއި އިހަވަންދޫގައި ކުރިއަށްދާ ދޯނި އެހެލުމުގެ މަސައްކަތް ދިގުފަރަށް ބަދަލުކޮށް މިހާރު ދޯނި ބަންނަމުންދާ ސަރަހައްދު ގެސްޓްހައުސްތަކަށް ބަދަލު ކުރެއްވުން ހިމެނޭކަމަށް ނާޒިމް ވިދާޅުވިއެވެ.

ހަމައެއާއެކު، އެ ރަށުގައި އިސްލާމިކް ސެންޓަރެއް ޤާއިމުކޮށް ރަށުގެ ހޮސްޕިޓަލަކީ ޓާޝަރީ ފެންވަރަށް ޚިދުމަތް ލިބޭ ފެންވަރުގެ ތަނެއްގެ ގޮތުގައި ތަރައްގީކުރައްވާނެ ކަމަށާއި ސްކޫލު ތަރައްގީކޮށް ކޮލެޖަކަށް ބަދަލުކޮށް ޔުނިވާސިޓީއަކަށް ބަދަލުކުރައްވާނެ ކަމަށްވެސް ނާޒިމު ވިދާޅުވިއެވެ.