އޮތީ ހަމަ އެންމެ އެޖެންޑާއެއް، އެއީ ރައްޔިތުންނަށް އުފާވެރިކަމާއި ތަރައްޤީ ގެނެސްދިނުން: ރައީސް ޞާލިޙް
އެމަނިކުފާނުގެ އޮތީ ހަމަ އެންމެ އެޖެންޑާއެއް ކަމަށާއި އެއީ ރައްޔިތުންނަށް ތަރައްޤީ އާއި އުފާވެރިކަން ގެނެސް ދިނުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މީގެ އިތުރުން، ތަރައްޤީ އަކީ އަބަދުވެސް ބޭނުންވާނެ އެއްޗެއް ކަމަށާއި މިހާރު އޮތް ހާލަަތަށް ވުރެއް އެހެން ހާލަަތަކަށް ބަދަލުވާން ރައްޔިތުން އަބަދުވެސް ބޭނުންވާނެ ކަމަށް އެމަނިކުފާނުގެ ވާހަކަފުޅުގައި ވިދާޅުވިއެވެ.
ތަރައްޤީގެ ގޮތުގައި މީގެ ކުރީގެ ސަރުކާރުތަކަށް ހޯރަފުއްޓަށް މާބޮޑު ކަމެއް ކޮށްދެވިފައި ނެތްކަން ފާހަގަކުރައްވަމުން ރައީސް ޞާލިޙް ވިދާޅުވީ، މި ފަސްއަހަރުގައި ހޯރަފުށި ތަރައްގީ ކުރެވުނު ކަމުގެ އިހުސާސް މިއަދު ކުރެވޭ ކަމަށާއި ކުރިއަށްއޮތް ރިޔާސީ އިންތިހާބުގައި އެމްޑީޕީއަށް ހޯރަފުށީގެ އަގުލަބިއްޔަތު ލިބޭނެ ކަމަށެވެ.
އަދި އޭގެ އިތުރުންވެސް އެ ރަށުގެ ތަރައްގީއަށް ކުރަންޖެހޭ ކަންކަން އަދިވެސް އެބަހުރިކަމަށް އެމަނިކުފާނު ފާހަގަކުރެއްވިއެވެ.
ހޯރަފުއްޓަކީ މިހާރު ދިރިއުޅެވޭފަދަ ރަށަކަށް ހަދައިދެވިފައިވާ ކަމަށާއި، ދެން އަންނަން ފަށާނީ ހަގީގީ ތަރައްގީ ކަމަށާއި އެގޮތުން ކުރިއަށް އޮތް ދައުރުގައި ހޯރަފުށީގެ ބާކީހުރި މަގުތައް އިތުރަށް ހަދާ މުޅިރަށުގައި ތާރުއަޅާނެ ކަމަށާއި އަދި ބޯހިޔާވަހިކަމަށް ބޭނުންވާ ރޯހައުސް އަޅާނެކަމަށްވެސް ރައީސް ޞާލިޙް ވިދާޅުވިއެވެ.
"ކޮވިޑްގެ ތެރޭގައި ހާދައުނދަގުލެއް އަޅުގަނޑުމެންނަށް ކުރިމަތިވިއޭ. އެހެންގޮތަކަށް ބުނާނަމަ، ހާދަ ޖެއްސުމެއް ކުރިއޭ. އުންމީދެއް ނެތްކަމަށްދެކި، އަޅުގަނޑުމެން ނެތިދަނީކަމަށް ދެކި ވާހަކަތައް ދައްކަމުންދިޔަ. ބައެއް ސިޔާސީ ލީޑަރުން ނިކުމެ ވިދާޅުވީ ރިސޯޓްތަކުގެ ބަދިގެތަކުގައި ދެންވީ މަސްކައްކަންށޭ، ރިސޯޓްތަކުގައި ވީ ދަނޑުވެރިކަމޭ ކުރަން، މިރާއްޖޭގެ ޓޫރިޒަމް ހަލާކުވެ ދިޔައިއްޔޭ." ރައީސް ވިދާޅުވިއެވެ.
ކޮވިޑްގެ ތެރޭގައި ސަރުކާރަށް ކުރިމަތިލާންޖެހުނު ކަންތައްތަކަށް އަލިއަޅުވައިލައްވަމުން ރައީސް ޞާލިޙު ވިދާޅުވީ ރައްޔިތުން މާޔޫސްކުރުވާ ސަރުކާރާމެދު ރައްޔިތުން ނަފުރަތު އުފެއްދުމަށް ކެނޑިނޭޅި ވާހަކަތައް ފަތުރަމުން ދިޔަ ކަމަށާއި އެހެންނަމަވެސް މި އަހަރުވެސް ރާއްޖެއަށް 1.9 މިލިއަން ފަތުރުވެރިން އަންނާނެ ކަމަށް ވިދާޅުވިކަމަށެވެ.
މީގެ އިތުރުން، ކޮވިޑްގެ ތެރޭގައި އެޅި ފިޔަވަޅުތަކާއެކު ރާއްޖޭގެ މުސްތަގުބަލު އޮތްކަން އެދުވަހުވެސް އެނގުނު ކަމަށާއި، އެފަދަ ފިޔަވަޅުތައް ނޭޅުމުން އަވަށްޓެރި ގައުމުތަކަށް ވެގެންދިޔަގޮތް މިހާރުވެސް ފެންނަން އެބައޮތްކަމަށް ރައީސް ވިދާޅުވިއެވެ.
2028 އަށް ރާއްޖެއަށް ދައްޗެއް ނެތި 3 މިލިއަން ފަތުރުވެރިން އަންނާނެކަމަށް ފާހަގަކުރައްވަމުން ރައީސް ޞާލިޙު ވިދާޅުވީ އިގްތިސާދު ޑަބަލް ކުރާ ވާހަކަ ދައްކަނީ އެކަމާ އެކު ކަމަށާއި އެގޮތުން މާލެ އިންޓަނޭޝަނަލް އެއާޕޯޓް އެ ނިމެމުންދަނީ ކަމަށާއި، ހަނިމާދޫ އަދި އައްޑޫ އެއާޕޯޓް ވެސް ތަރައްގީ ވަމުންދާ ކަމަށެވެ.
ރައީސް ޞާލިޙު އިތުރަށް ވިދާޅުވީ ހަމައެކަނީ މާދަމާ ފެންނަ މީހަކަށް ވެރިކަމެއް ނުކުރެވޭނެ ކަމަށާއި އެކަން ކުރެވޭނީ ތަޞައްވަރަކާއި އަމާޒެއް އޮވެގެން ރަނގަޅަށް ޕްލޭން ކުރެވިގެން ކަންތައް ކުރުމުން ކަމަށެވެ.
އެމަނިކުފާނު ވަނީ ކޮވިޑްގެ ވަބާއާއި ގުޅިގެން އެދުވަހު ބައެއް ސިޔާސީ ލީޑަރުން ބުނިގޮތަށް ރިސޯޓްތަކުގެ ބަދިގެތައް މަސްކައްކާ ތަނަކަށް ހެދިނަމަ ދެންވާނެގޮތަކާ މެދު ސުވާލުވެސް އުފައްދަވައިފައެވެ. އަދި އެ ސިޔާސީ ލީޑަރުންގެ ވާހަކަތަކަކީ ފިތުނައާ ފަސާދައާ ދެކޮޅުވެރިކަން އުފެއްދުމަށް ދެއްކި ވާހަކަތަކެއް ކަމަށްވެސް ރައީސް ޞާލިޙު ވިދާޅުވިއެވެ.
ކޮންއިރަކުތަ ހޯރަފުޟީގަ މީހުނައްނޫޅެވިގެން އުޅުނީ ކޮވިޑުތެރޭގަވެސް