ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުފޮށި ބެހެއްޓުމަށް ހަމަޖައްސާފައިވާ ރިސޯޓުތަކުގެ ތެރެއިން އެ ރިސޯޓުތަކުގައި ވޯޓުފޮށި ބަހައްޓާނީ އެ މީހަކު ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމަށް ހުޅުވައިލާ މުއްދަތުގެ ތެރޭގައި އެއިން ރިސޯޓެއްގައި ވޯޓުލުމަށް މަދުވެގެން 30 މީހުން ރަޖިސްޓަރީވެފައިވާ ނަމައެވެ.
އީސީއިން އިއްޔެ ވިދާޅުވީ ސެންޓާރާ ރަސްފުށި ރިސޯޓް އެންޑް ސްޕާ މޯލްޑިވްސް(ކ.ގިރާވަރު), ސެންޓާރާ ގްރޭންޑް އައިލެންޑް ރިސޯޓް އެންޑް ސްޕާ މޯލްޑިވްސް (އދ.މައްޗައްފުށި), ފަރި ކެމްޕަސް މޯލްޑިވްސް އަދި އަމާރި ރާޔާ މޯލްޑިވްސްގައި ވޯޓު ފޮށި ބަހައްޓަން ނިންމާފައިވާ ކަމަށެވެ.
މީގެއިތުރުން ވަން އެންޑް އޮންލީ ރީތިރަށުގައި ވޯޓުފޮށި ބެހެއްޓުމަށް ވެސް ކޮމިޝަނުން ވަނީ ނިންމަވައިފައެވެ.
އީސީން ކުރިން ނިންމާފައި އޮތީ ރިޔާސީ އިންތިޚާބުގައި ރާއްޖެއާއި ރާއްޖޭން ބޭރުގައި 604 ވޯޓުފޮށި ބަހައްޓާ ގޮތަށެވެ.
މީގެތެރެއިން 13 ފޮށި ބަހައްޓަން ހަމަޖެހިފައިވަނީ ރާއްޖެއިން ބޭރުގައެވެ.
