އަޅުގަނޑުގެ ވެރިކަމެއްގައި އަންހެނުންނަށް ފިރިހެނުންނާއި އެއް ސަފެއްގައި މަސައްކަތްކުރެވޭނެ: ނާޒިމް

މި އަހަރުގެ ރިޔާސީ އިންތިޚާބުގައި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ޓިކެޓްގައި ވާދަކުރައްވާ މުޙައްމަދު ނާޒިމްގެ ވެރިކަމެއްގައި، އަންހެނުންނަށް ދިމާވާ ދަތިތަކަށް ޙައްލު ހޯއްދަވައި، އަންހެނުންނަށް ފިރިހެނުންނާއި އެއް ސަފެއްގައި މަސައްކަތްކުރެވޭނެ ގޮތް ހަމަޖައްވައިދެއްވާނެކަމަށް ނާޒިމް ވިދާޅުވެއްޖެއެވެ.

Ads by STELCO

އެމްއެންޕީން ރޭގައި ކުރިއަށް ގެންދިޔަ އަންހެނުންގެ ލީޑަރޝިޕް ފޯރަމުގައި ވާހަކަ ދައްކަވަމުން ނާޒިމް ވަނީ ރާއްޖޭގެ އަންހެނުންނަށް ކުރިމަތިވާ ކަންތައްތަކާއި ގުޅިގެން ވާހަކަ ދައްކަވާފައެވެ. އެގޮތުން، އެ ޖަލްސާއަށް ވަޑައިގެން ތިއްބެވި އަންހެން ބޭފުޅުންނާއި މުޚާތަބު ކުރައްވަމުން ނާޒިމް ވިދާޅުވީ، އަންހެނުންނަކީ "ބޯރން ލީޑަރު" ން ކަމަށާއި އެއަށްވުރެ ބުރަ މަސައްކަތް ކުރާ ބަޔަކު ނުތިބޭނެކަމަށެވެ.

އެއީ ތަރުތީބުކޮށް މަސައްކަތްކުރާ ބައެއް ކަމަށާއި ހެނދުނު ހޭލާއިރުން ފެށިގެން ނިދުމާ ހަމައަށް އަންހެނުން ތިބެނީ އެމީހުންގެ ޒިންމާތައް އަދާކުރުމުގައި ކަމަށްވެސް ނާޒިމް ވިދާޅުވިއެވެ.

ނާޒިމް ވަނީ އެބޭފުޅާގެ ހަޔާތުން ސަފްހާއެއްވެސް ރޭގެ ބައްދަލުވުމުގައި ހިއްޞާކުރައްވައިފައެވެ. އެގޮތުން ނާޒިމް ޖަލުގައި ހުންނެވިއިރު، އެބޭފުޅާގެ އެންމެ ހަގު ދަރިފުޅަށް ވީ އެންމެ 8 އަހަރު ކަމަށާއި، ޖަލުގައި ހުންނެވި އިރު އެ ދަރިފުޅުގެ ސުކޫލުން ހަނގާކުރުމާއި ކުރިމަތިލާންޖެހުނު ކަމަށާއި އެންމެ ފަހުން އެ ދަރިފުޅު ޖެހުނީ ބޯޑިންގ ސުކޫލަކަށް ފޮނުވާލަންކަމަށް ފާހަގަކުރައްވަމުން ނާޒިމް ވިދާޅުވީ، އެހާ ކުޑަ އުމުރުގައި ދަރިންނާއި މައިން ވަކިވާންޖެހުމަކީ ކިހާ ހިތްދަތި ކަމެއްކަން އެބޭފުޅާއަށް އިޙްސާސްކުރެވޭކަމަށެވެ. އަދި އޭނާގެ ސަރުކާރެއްގައި އެފަދަ ސަޤާފަތްތަކަށް ޖާގައެއް ނޯންނާނެކަމަށް ވެސް ވިދާޅުވިއެވެ.

އެހެންކަމުން، އަންހެނުންނަށް ހައްޤުވާ މަޤާމު ހޯދައިދިނުމަށް ކެނޑިނޭޅި މަސައްކަތްކުރާނެކަމަށާއި އަންހެނުންގެ ހައްޤުތަކަކީ ފޮތެއްގައި ލިޔެވިފައިވާ ނުވަތަ ޤާނޫނުގައި ލިޔެފައި އޮވެގެން ކުރެވޭނެކަމެއް ނޫންކަމަށާއި އެ ހައްޤުތަކަކީ އިންސާފުގެ ކުރިމަތީގައި އިސް ސަފުތަކުގައި ތިބޭ ބޭފުޅުންގެ ކުރިމަތީގައި ހޯދައިދެވޭ އެއްޗެއްކަމަށެވެ.

އަދި އެކަން ފިރިހެން ބޭފުޅުން ޤަބޫލުކުރައްވަން ޖެހޭނެކަމަށް ނާޒިމް ވިދާޅުވިއެވެ.

"އަޅުގަނޑު ވެގެންދާނީ ތުއްތު އަންހެންކުއްޖަކު އޭނާގެ ޅައުމުރުގައި އެދެކޭ ހުވަފެން ހަޤީޤަތަކަށް ހަދަން، އެކުއްޖަކީ ބަރުވެރިކަމާއެކު ރާއްޖޭގެ ފިރިހެނުންނާ އެއް ސަފެއްގައި ފައިތިލަ ސާބިތުކުރެވޭ އަންހެނަކަށް އިރާދުކުރެއްވިއްޔާ ހަދާނެވާހަކަ ތިބޭފުޅުންނަށް ދަންނަވާލަން" ނާޒިމް ވިދާޅުވިއެވެ.

ރާއްޖޭގައި ޖިންސީ އަނިޔާއާއި ރޭޕްގެ މައްސަލަތަކުގެ ވާހަކަދައްކަވަމުން ނާޒިމް ވިދާޅުވީ، އެއީ އެއްވެސް ވަރަކަށް ޖާގަދޭނެކަމެއް ނޫންކަމަށާއި އެބޭފުޅާގެ ވެރިކަމެއްގައި އަންހެން ބޭފުޅުންނަށް އެފަދަ ނޭދެވޭ އަމަލުކުރާ މީހުންނާ ދޭތެރޭ ހަރުކަށި ފިޔަވަޅު އަޅުއްވާނެކަމަށާއި އެމީހުން "ޖަލު ގޮޅިން ސަލާމަތެއްނުވާނެ" ކަމަށެވެ.

އަދި މަޖިލިހަށް ބަލާއިރުވެސް އަންހެން ބޭފުޅުންގެ އަދަދު މަދުކަމަށް ފާހަގަކުރައްވަމުން ނާޒިމް ވިދާޅުވީ އެކަންވެސް ބަދަލުކުރައްވާނެކަމަށާއި މަޖިލީހުގައި 30 އިންސައްތަ އަކީ އަންހެން ބޭފުޅުންކަމުގައި ހަމަޖައްސަވާނެކަމަށެވެ.