ދެ އިންތިހާބު ވެސް ނާކާމިޔާބު ވުމުން "ދިޔައީ ގެއަށް", ކޯލިޝަން ހަދަން ނުދަން: ގާސިމް
ޖުމްހޫރީ ޕާޓީން ކުރިމަތިލި ދެ އިންތިހާބުގައި ވެސް ނާކާމިޔާބު ވުމުން "ދިޔައީ ގެއަށް" ކަމަށާއި އިސްވެ ކޯލިޝަން ހަދަން ނުދާ ކަމަށް އެ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕޭނަށް ބ. ކެންދޫ އަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ގާސިމް ވިދާޅުވީ 2013 ވަނަ އަހަރު ބޭއްވި އިންތިހާބު ވެސް ކާމިޔާބު ނުކުރެވުމުން ދިޔައީ ގެއަށް ކަމަށެވެ. އަދި ކޯލިޝަން ހަދަން އެމްޑީޕީ ނޫނީ ޕީޕީއެމް ކައިރިއަށް ނުދާ ކަމަށާއި ކޯލިޝަން ހަދަން އައީ އެ ޕާޓީތަކުން ކަމަށް ގާސިމް ވިދާޅުވިއެވެ.
ގާސިމް ވިދާޅުވީ އެ ޕާޓީތަކުން ކޯލިޝަން ހަދަން އައިސް ލާރި ދޭނެ ކަމަށާއި ހޮވިއްޖެ ނަމަ ވަކި ޕަސެންޓެއް ދޭނެ ކަމަށް ވެސް ބުނެފައިވާ ކަމަށެވެ. ނަމަވެސް އެއްވެސް ލާރިއެއްގައި ވެސް ހިފާފައި ނުވާނެ ކަމަށް ގާސިމް ވިދާޅުވިއެވެ.
"ވަށަވަށައިގެން މީހުން ފޮނުވައިގެން. މިވެނި ޕަސެންޓެއް ދޭނަން، އެވެނި ޕަސެންޓެއް ދޭނަން، މިހާ ލާރި ދޭނަން، އެހާ ލާރި ދޭނަން ކިޔަކިޔާފައި އައީ. އަޅުގަނޑުމެން ލާރިއަކު ވެސް ނުހިފަން،" ގާސިމް ވިދާޅުވިއެވެ.
ގާސިމް މިފަދައިން ވިދާޅުވީ ދެވަނަ ބުރަކަށް ގޮސް ކޯލިޝަނެއް ހަދައިގެން ބައި އަޅަން ނޫޅެ އެމްޑީޕީ ހިމެނޭ ކޯލިޝަނާ ގުޅުމަށް ރައީސް އިބްރާހިމް މުހައްމަދު ޞާލިޙް އެމަނިކުފާނުގެ ބައެއް ވާދަވެރިންނަށް ދައުވަތު ދިވުމާއި ގުޅިގެންނެވެ.
