ވާދަވެރިން ވައުދުތައް ވަނީ ދައުލަތް ބަނގުރޫޓު ނުވާކަން އެނގޭތީ: ރައީސް ޞާލިޙު

ރިޔާސީ އިންތިޚާބުގައި ވާދަކުރައްވާ ކެންޑިޑޭޓުން ރަށްރަށަށް ވަޑައިގެން ރިޔާސީ ވައުދުތައް ވެވަޑައިގަންނަވަނީ ދައުލަތް ދަރަނިވެރިވެފައިނުވާތީކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.

Ads by Sosun Fihaara

ރިޔާސީ އިންތިޚާބުގެ ކެމްޕޭނަށް ރަށްރަށަށް ކުރައްވާ ދަތުރުފުޅުތަކުގެ ތެރޭގައި ތ. ކިނބިދޫއަށް ވަޑައިގެން ރައީސް ޞާލިޙް ވިދާޅުވީ އިދިކޮޅު ފަރާތްތަކުން ސަރުކާރު ދަރަނިވެރިވެ ބަނގުރޫޓުވާނެ ކަމަށް ވިދާޅުވާއިރުވެސް އެބޭފުޅުން އަރާވަޑައިގަންނަވާ ކޮންމެ ރަށެއްގައި ވައުދުތައް ވަމުން ގެންދަވާ ކަމަށެވެ.

"އަނެއްކޮޅުން ބަނގުރޫޓުވެފަ އޮތް ސަރުކާރެއްގެ ވާހަކަ ދައްކަނީ، ފައިސާއެއް ނެތޭ، 2025 ގައި ބަނގުރޫޓުވާނޭ، 2026 ގައި ބަނގުރޫޓުވާނޭ، އެހެން ނަމަވެސް ހަމަ ލިސްޓު ހިފައިގެން އަރާ ވައުދު ވަނީ، މިއީ ހަމަ ސަރުކާރުން ކުރާނެ ހަރަދު ނޫންތޯ،" ރައީސް ޞާލިޙު ވިދާޅުވިއެވެ.

މީގެ އިތުރުން އިދިކޮޅު ކެންޑިޑޭޓުން ގިނަ، ބޮޑެތި ވައުދުތަކެއް ވަމުން ގެންދަނީ ސަރުކާރުގައި ފައިސާ ހުރިކަން ނުވަތަ ލިބޭނެކަން އެބޭފުޅުންނަށް ވެސް އެނގޭތީ ކަމަށާއި އިދިކޮޅުން ދައްކާ 'ދެކޮޅު ނުޖެހޭ' ވާހަކަތަކާމެދު ރައްޔިތުން ވިސްނަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.

"[ވައުދުތައް ވަނީ] ހަމަ ގައިމުވެސް ފައިސާ ހުރިކަން އިނގިގެން ނޫންތޯ، ނުވަތަ ފައިސާ ލިބޭނެކަން އިނގޭތީ ނޫންތޯ އެބޭފުޅުން އެ ވާހަކަތައް އެ ދައްކަވަނީ، އެހެންނޫނީ އެ ހައްދަވަނީ އިތުރުފުޅެއް" ރައީސް ޞާލިޙް ވިދާޅުވިއެވެ.

އަދި އެބޭފުޅުން ވައުދުވެވަޑައިގަންނަވަނީ އެކަންކަން ފުއްދުމަށް ބޭނުންވާ ފައިސާ ލިބޭނެކަމުގެ ޔަގީންކަން އޮވެ، އެ ފައިސާ ހޯދާނެ ގޮތް އެނގިވަޑައިގަންނަވާތީ ކަމަށާއި މި ސަރުކާރަކީ ފުދުންތެރި ސަރުކާރެއް ކަމަށް ރައީސް ޞާލިޙު ވިދާޅުވިއެވެ.

ރައީސް ޞާލިޙުގެ ވާހަކަފުޅުގައި އިތުރަށް ވިދާޅުވީ އެމްޑީޕީން ވައުދު ވަނީ، ފައިސާ ހޯދޭނެ ގޮތާއި އެކަންކަން ކުރާނެ ގޮތް އެނގިގެން ކަމަށެވެ. އަދި ވައުދު ފުއްދާނީވެސް އެގޮތުން ކަމަށެވެ.