ކޯލިޝަނަށް އަންނަންވީ ޝަރުތަކާ ނުލާ, "ކޭކުން ލިބޭވަރު" އަހާކަށް ނުޖެހޭ: އަދުރޭ

މިމަހުގެ 30 ވަނަ ދުވަހު އޮންނަ ރިޔާސީ އިންތިޚާބުގައި އިދިކޮޅު ޕީޕީއެމް-ޕީއެންސީއާއެކު ކޯލިޝަން ހަދަން އަންނަން ވާނީ ޝަރުތަކާ ނުލާ ކަަމަށް އެ ޕާޓީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

Ads by STELCO

އަދުރޭ މިހެން ވިދާޅުވީ, ޕީއެންސީގެ ކެނޑީޑޭޓް ޑރ. މުއިއްޒަށް ތާއީދު ހޯދުމަށް އދ. މަހިބަދޫގައި ބޭއްވި ޖަލްސާގައި ދެއްކެވި ވާހަކަފުޅުގައެވެ.

އަދުރޭ ވިދާޅުވީ, އެ ޕާޓީއަކީ ޤައުމީ ލަޝްކަރު ކަމަށާއި, "ޤައުމީ ލަޝްކަރާ ބައިވެރިވާން ޝަރުތެއް އޮވެގެން ނުވާނެ" ކަމަށެވެ. އަދި ސިޔާސީ ލީޑަރުން ވަކި ޝަރުތަކާ ނުލާ އެ ޕާޓީއާ ގުޅުމަށް މުއިއްޒު ވަނީ ދައުވަތު ދެއްވާފައެވެ.

"މިވަގުތު އަޅުގަނޑުމެންގެ ފަޅިއަށް އަރަންވީ އެއްވެސް އަމިއްލަ އެދުމެއް އޮވެގެން ނޫން. އަޅުގަނޑުމެން ކާނަލް ނާޒިމާއި އެ ޕާޓީގެ ރައީސަށް އައްސަރިބަހާއި ސާބަސް ދަންނަވަން. މި ޤައުމީ މަސައްކަތުގައި ބައިވެރިވާކަށް ޝަރުތެއް އޮވެގެން ނުވާނެ. މިއީ އެންމެންގެ މަސައްކަތެއް." އެމްއެންޕީން ވަކި ޝަރުތަކާ ނުލާ އެ ޕާޓީއާ ގުޅުނު ކަމަށް ވިދާޅުވެ, އެ ޕާޓީއަށް އަދުރޭ ވަނީ ޝުކުރު ދަންނަވާފައެވެ.

އަދުރޭ ވިދާޅުވީ, އިންތިހާބު ކާމިޔާބު ކުރުމަށްޓަކައި ކޯލިޝަން ހަދަން އަންނަން ވާނީ އަމިއްލަ ފައިދާއަށް ބަލައިގެން ނޫން ކަމަށެވެ.

"މި މަސައްކަތަށް އަންނާނީ ކޭކު ބަހައިގެން ލިބޭ ބައި ހޯދައިގެނެއް ނޫން. މި މަސައްކަތަށް އަންނަންވާނީ ޤައުމީ ޖޯޝުގައި" އަދުރޭ ވިދާޅުވިއެވެ. "ތިމަންނައަށް ލިބޭނީ ކިހާވަރެއްތޯ, ތިމަންނަގެ ޕާޓީއަށް ލިބޭނީ ކިހާވަރެއްތޯ. ތިމަންނަމެންނަށް އޮތީ ކޮން ވަޒީރުކަމެއްތޯ އަހާކަށް ނުޖެހޭ"

އަދުރޭގެ ވާހަކަފުޅުގައި އިތުރަށް ވިދާޅުވީ, މިއަދު ރައްޔިތުން މިވަނީ މި ސަރުކާރަށް ނޫނެކޭ ބުނެފައި ކަމަށާއި, ދެވަނަ ބުރެއްގައި އިންތިޚާބު ކާމިޔާބު ކުރާނީ 60 އިންސައްތަ ހޯދައިގެން ކަމަށެވެ.

"ބޮޑުތަނުން ރައްޔިތުން ނޫނެކޭ ބުނީމާ ދެން ނިކުމެ ކުރަން ފެށި ކަމަކީ, އަޅުގަނޑުމެންގެ ކެނޑިޑޭޓްގެ އަބުރު ކަތިލުން." ދެވަނަ ބުރެއްގައި އެންޓި ކެންޕެއިން ސަރުކާރުން ފަށާފައިވާ ކަމަށާއި, ނަމަވެސް އެކަން ކާމިޔާބު ނުވާނެ ކަމަށް އަދުރޭ ވިދާޅުވިއެވެ.

"އަބުރު ކަތިލަން އުޅުނަސް, ރައްޔިތުން އެކަން ޤަބޫލެއް ނުކުރާނެ, ރައްޔިތުންނަށް ތިޖަހާ ސަކަރާތް އިނގޭ"