ޓީޗަރުންގެ މިންނެތް މަސައްކަތުގެ އަގުވަޒަންކުރުމަށް ޚާއްސަ އިދާރީ އޮނިގަނޑުތަކެއް ބައްޓަންކުރާނަން: ޑރ. މުޢިއްޒު
މުދައްރިސުން ކުރައްވާ މިންނެތް މަސައްކަތުގެ ހައިބަތު ނެގެހެއްޓުމަށް ފަހިވާނެހެން، މުދައްރިސުންގެ އިދާރީ އޮނިގަނޑުތައް ބައްޓަންކުރައްވާނެކަމަށް އިންތިޚާބީ ރައީސް، ޑރ. މުޙައްމަދު މުޢިއްޒު ވިދާޅުވެއްޖެއެވެ.
ބައިނަލްއަޤުވާމީ މުދައްރިސުންގެ ދުވަހުގެ ހެޔޮއެދުމާއި ތަހުނިޔާ، ދިވެހިރާއްޖޭގެ އެކި ކަންކޮޅުތަކުގައި އުނގަންނާދެއްވާ މުދައްރިސުންނަށް، އަރިސްކުރައްވަމުން މުޢިއްޒު ވިދާޅުވީ މުދައްރިސުންނަކީ ޤައުމުން އަނދިރިކަން ނައްތައިލާ ބައްތިތަކެއް ކަމަށާއި އެެއީ އަންނަހައި ޖީލުތައް ހެޔޮ މިސްރާބަށް ގެންދިޔުމުގެ އުނދަގޫ ދަތުރާ ހަވާލުވެގެންވާ ބަޔަކުކަމަށެވެ.
ކާމިޔާބީގެ އައްސޭރިޔަށް ވާޞިލުވެވޭނީ އެ ޤައުމެއްގެ ތަޢުލީމީ ނިޒާމު މައިގަނޑު ތިން އަސާސެއްގެ މައްޗަށް ބިނާވެގެންކަމަށް ފާހަގަކުރައްވަމުން މުޢިއްޒު ވިދާޅުވީ އެއީ ހަރުދަނާ އަޚްލާޤަކާއި، ތަނަވަސް ޢިލްމާއި އަދި ކުޅަދާނަ ހުނަރުވެރިކަން ކަަމަށެވެ.
މި އަހަރު މުދައްރިސުންގެ ދުވަހުގެ ޝިޢާރަށް އިޝާރާތްކުރައްވަމުން މުޢިއްޒު ވަނީ މުދައްރިސުންގެ ޢަދަދު މަދު މައްސަލައަށް އަލިއަޅުވާލައްވާފައެވެ. އަދި ކިޔަވައި ނިމިގެން ނިކުންނަ ކުދިންގެ ކިބައިގައި ޤައުމަށް ބޭނުންވާ ޤާބިލުކަން ހުރޭތޯ ބައެއް ފަރާތްތަކުން އުފައްދާ ސުވާލާމެދުވެސް ވިސްނާވަޑައިގަތުމަށް އެމަނިކުފާނު ވިދާޅުވިއެވެ.
ރާއްޖޭގެ ތަޢުލީމީ ނިޒާމުގައި ހުރި މި ދެ މައްސަލައަށް އެމަނިކުފާނު އުފައްދަވާ ސަރުކާރެއްގައި އިސްކަންދެއްވާނެކަމަށް ފާހަގަކުރައްވަމުން މުޢިއްޒު ވިދާޅުވީ 21 ވަނަ ޤަރުނުގެ ދަރިވަރެއްގައި ހުނަންޖެހޭ ތޫނުކަމާއި ހުޝިޔާރުކަމާއި، ޤާބިލުކަމާއި އުޅުންތެރިކަމަށް ސަމާލުކަން ދެއްވާނެކަމަށެވެ.
އަދި އިޖުތިމާޢި މިންގަނޑުތަކަށް ކަމޭ ހިތުމާއި އުފަން ބިމަށް ލޯބިކުރުމުގެ މާތް ސިފަތަށް ދަރިވަރުންގެ ކިބައިގައި އަށަގަންނާނެ ފަދަ ގޮތަކަށް މަންހަޖު އަލުން ބައްޓަންކުރައްވާނެކަމަށާއި، ކަމާ ގުޅޭ އިތުރު ހަރުދަނާ ފިޔަވަޅުތައް އަޅައި މުދައްރިސުން ތާޒާކުރައްވާނެކަމަށްވެސް މުޢިއްޒު ވިދާޅުވިއެވެ.
ހަމައެއާއެކު، މުދައްރިސުންގެ ދުޅަހެޔޮކަމަށް ޚާއްޞަ އިސްކަމެއް ދީ، މުދައްރިސުންގެ މަސައްކަތުގެ ވަގުތުތަކާއި ޒާތީ ދިރިއުޅުން މީޒާންހަމަކުރުމަށް ފަހިވާނެހެން ސިޔާސަތުތައް ފަރުމާކުރައްވައި. މުދައްރިސުން ކުރައްވާ މިންނެތް މަސައްކަތުގެ ހައިބަތު ނެގެހެއްޓުމަށް ފަހިވާނެހެން، މުދައްރިސުންގެ އިދާރީ އޮނިގަނޑުތައް ބައްޓަންކުރައްވާނެކަމުގެ ޔަޤީންކަންވެސް އެމަނިކުފާނު ދެއްވިއެވެ
ވެރިޔަކަށް އޮނިގަނޑެއް !