ހިތާމަވެރި ދެ ހާދިސާއާއެކު ސިއްޙީ ރައްކާތެރިކަމުގެ ބިލުގެ މަސައްކަތް އަވަސްކޮށްދެއްވުމަށް ޑރ. މުޢިއްޒު އެދިވަޑައިގެންފި
ޖެހިޖެހިގެން މި ހަފްތާގައި ހިނގި ހިތާމަވެރި ދެ ހާދިސާއާއެކު މަސައްކަތުގެ މާޙައުލުގެ ސަލާމަތާއި ސިއްޙީ ރައްކާތެރިކަމުގެ ބިލުގެ މަސައްކަތް އަވަސްކޮށްދެއްވުމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.
އިންތިޚާބީ ރައީސުލްޖުމްހޫރިއްޔާގެ އޮފީހުން މިރޭ ނެރުނު ބަޔާނުގައި ހދ. މަކުނުދޫގައި މިއަދު ހަވީރު ހިނގި ހިތާމަވެރި ހާދިސާގައި ދެ މީހަކު ނިޔާވި ޚަބަރު ޑރ. މުޢިއްޒު އެއްސެވީ ހިތާމައާއި ކަންބޮޑުވުމާއެކު ކަމަށް ފާހަގަކުރައްވާފައިވެއެވެ.
އަދި އެ ހާދިސާގެ އިތުރުން 19 އޮކްޓޫބަރުގައި ހދ. ކުޅުދުއްފުށީ އެއާޕޯޓުގައިވެސް އެފަދަ ހިތާމަވެރި ހާދިސާއެއް ހިނގައި 4 މީހަކަށް އަނިޔާލިބިފައިވާކަން ފާހަގަކުރައްވަމުން ޑރ. މުޢިއްޒު ވަނީ އެ ހާދިސާތައް ހިނގަން މެދުވެރި ގޮތް ތަޙްޤީޤުކުރައްވައި، އެފަދަ ހާދިސާތައް ތަކުރާރުނުވާނެހެން ފިޔަވަޅު އަޅުއްވައިދެއްވުމަށް ކަމާގުޅޭ މުއައްސަސާތަކަށް ގޮވާލައްވާފައެވެ.
މީގެ އިތުރުން، އެ ދެ ހާދިސާވެސް ހިނގާފައިވަނީ މަސައްކަތުގެ މާާހައުލުގައިކަމަށާއި އެފަދަ ހާދިސާތައް މެދުވެރިވާގޮތް މަދުކޮށް މަސައްކަތްތެރިންގެ ރައްކާތެރިކަން ކަށަވަރުކުރުމަށް، މުޅި މުޖްތަމަޢުގެ ހުރިހާ ފަރާތްތަކުން ޒިންމާދާރުކަާއިއެކު ފަރުވާތެރިކަން އިސްކުރުމަށްވެސް އެމަނިކުފާނުވަނީ ގޮވާލައްވާފައެވެ.
ހަމައެއާއެކު، ނިޒާމި ގޮތެއްގައި އެފަދަ މައްސަލަތަކަށް ހޯދަންޖެހޭ ޙައްލު ހޯދުމަށް، ރައްޔިތުންގެ މަޖިލީހަށް ހުށަހަޅުއްވާފައިވާ، މަސައްކަތުގެ މާޙައުލުގެ ސަލާމަތާއި ޞިއްޙީ ރައްާތެރިކަމުގެ ބިލުގެ މަސައްކަތް އަވަސްކޮށްދެއްވުމަށް، ޑރ. މުޢިއްޒުވަނީ ރައްޔިތުންގެ މަޖިލީހުގެ މެންބަރުންގެ އަރިހުން އިލްތިމާސްކުރައްވާފައެވެ.
