ދައުރުގެ މިހާތަނަށް 6 މިސްކިތް އަޅަން ވަނީ ހަވާލުކޮށްފައި: ރައީސް
ދައުރުގެ މިހާތަނަށް 6 މިސްކިތް އަޅަން ހަވާލުކޮށްފައިވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައްޔިތުންގެ މަޖިލިސް މިއަހަަރަށް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ ދިވެހީންގެ އިޖްތިމާޢީ ދިރިއުޅުމުގައި މިސްކިތްތަކުގެ ދައުރު ފުޅާކުރުމަށާއި މެދު ނުކެނޑި މިސްކިތްތަކުގެ ޙާލަތު ދެނެގަނެވޭނެ ނިޒާމެއް ޤާއިމުކުރުމުގެ ގޮތުން، މިސްކިތްތަކާ ބެހޭ ޤައުމީ މަޖިލިސް އަލުން އުފައްދާފައިވާ ކަމަށެވެ.
އަދި މިސްކިތްތައް ބެލެހެއްޓުމާ މަރާމާތަށް ދައުލަތުން ކުރާ ހޭދަ 3 ގުނަ އިތުރުކޮށްފައިވާ ކަމަށާއި ސަރުކާރު ހިންގުމާ ޙަވާލުވެ މިވީ ކުޑަ ދުވަސްކޮޅުގެ ތެރޭގައި މުޅީން އަލަށް 6 މިސްކިތެއްގެ މަސައްކަތް ޙަވާލުކޮށްފައިވާ ކަމަށް ރައީސް މުޢިއްޒު ވިދާޅުވިއެވެ.
ރައީސް ވިދާޅުވީ އިންތިޚާބުތަކާ ދިމާކޮށް ވޯޓު ހޯދަން ދަޅަދައްކާ އުސޫލުން، ޢުމްރާނީ ތަރައްޤީގެ މަސައްކަތްތަކެއް ރަށްރަށުގައި ފަށާފައިވާ ކަމަށެވެ.
"އެފަދަ ގިނަ މަސައްކަތްތައް ވަކި ހިސާބަކުން ހުއްޓިފައިވާ ކަމަށާއި މަގުހަދަން ނޫނީ ނަރުދަމާގެ ޚިދުމަތްދޭން ކޮނުނު ތަންތަން އެގޮތަށް ހުންނަތާ އެތައް އަހަރެއްވެ، މަސައްކަތަށް ގެނައި އާލާތްތަކާ ތަކެތި ހަލާކުވެ، މުޅި ދައުލަތަށާ ރައްޔިތުންނަށް އެކަމުގެ ގެއްލުމާ ތުރާ ލިބެމުންދާ މަޝްރޫޢުތައް މަދެއްނޫން" ރައީސް މުޢިއްޒު ވިދާޅުވިއެވެ.
ރާއްޖޭގެ ހުރިހާ ރަށެއްގައި މިގޮތަށް ހުރި މަޝްރޫޢުތައް ބަލައި، ރައްޔިތުން އެދޭގޮތަށް އެ މަޝްރޫޢުތައް އަލުން ހިންގައިދޭން މިހާރު ފަށަމުންދާ ކަމަށާއި މިފަދަ އެތައް މަސައްކަތެއް ރަށްރަށުގައި ކުރަން އެބަހުރި ކަމަށް ރައީސް ފާހަގަކުރެއްވިއެވެ.
އަދި ހުރިހާ ރަށެއްގެ ކަރަންޓު ޚިދުމަތުގެ ފެންވަރު ރަނގަޅުކޮށްދީ ގޭބިސީތަކުން ކަރަންޓު ބިލަށްކުރާ ޚަރަދު ކުޑަކޮށް، އިއާދަކުރަނިވި ވަސީލަތްތައް ބޭނުންކޮށްގެން ކަރަންޓު އުފެއްދުމުގައި ރައްޔިތުންގެ ބައިވެރިވުން އިތުރުކޮށް، އޭގެ އިޖުތިމާޢީ އަދި އިޤްތިޞާދި މަންފާ އެންމެހައި ރައްޔިތުންނަށް ފަހިކޮށްދިނުމަށް އަމާޒުކޮށްގެން "މަގޭ ސޯލާ" ގެ ނަމުގައި ޕްރޮގްރާމެއް ހަފުތާ 14ގެ ތެރޭން ފަށާފައިވާ ކަމަށް ރައީސް ވިދާޅުވިއެވެ.
މި ޕްރޮގްރާމުގެ ފުރަތަމަ ފިޔަވަހީގެ ދަށުން 3 ކިލޯވޮޓު އަދި 5 ކިލޯވޮޓު ހިމެނޭހެން ޖުމްލަ 3 މެގަވޮޓުގެ ސޯލާ ޕީވީ ސިސްޓަމް ގަތުމަށް ބީލަމަށް ހުޅުވާލެވިފައިވާ ކަމަށް ރައީސް ވިދާޅުވިއެވެ.
