ބޭރުގައި އުޅޭ ދިވެހި ކުދިންނަށް ދިވެއްސާއި އިސްލާމް އޮންލައިންކޮށް ކިޔަވައިދޭން ފަށައިފި
ބޭރު ޤައުމުތަކުގައި ދިރިއުޅޭ ދިވެހި ކުދިންނަށް ދިވެހިބަހާއި އިސްލާމީ ތަރުބިއްޔަތު ކިޔަވައިދިނުމުގެ ޕްރޮގްރާމް ލޯންޗުކޮށްފިއެވެ.
އޮންލައިން ޕްރޮގްރާމެއް ކަމަށްވާ "ރިވެލި" އިފްތިތާހު ކޮށްދެއްވާފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެވެ.
މި ޕްރޮގްރާމް އިފްތިތާޙްކޮށްދެއްވީ ރައީސް މުޢިއްޒު ޔޫއޭއީގެ ދުބާއީގައި ބޭއްވި "ވާރލްޑް ގަވަރމަންޓްސް ސަމިޓު 2024"ގައި ބައިވެރިވެ ވަޑައިގަތުމަށް ކުރެއްވި ދަތުރުފުޅުގެ ތެރެއިން ދުބާއީގައި ދިރިއުޅޭ ދިވެހިންނާއެކު މިރޭ ބޭއްވި ބައްދަލު ކުރެއްވުމުގައެވެ.
އެގޮތުން މި ޕްރޮގްރާމް އެންމެ ފުރަތަމަ ފަށާފައި މިވަނީ ޔޫއޭއީގައި ދިރިއުޅޭ ދިވެހިންނަށް އަމާޒު ކޮށްގެންނެވެ.
ބޭރު ޤައުމުގައި ދިރިއުޅޭ ދިވެހިންނަށް ދިވެހިބަހާއި އިސްލަމް މާއްދާ ކިޔަވައިދިނުމުގެ ޕްރޮގްރާމް ކުރިއަށް ގެންދަވާނެކަން ހާމަކުރައްވާ ސަރުކާރުން މީގެ ކުރިން ވިދާޅުވީ ސަރުކާރުގެ އެންމެ މުހިންމު ސިޔާސަތަކަށް އޮތީ ޤައުމިއްޔަތު ދިރުވައި އާލާކުރުން ކަމަށެވެ.
ހަމަ އެހެންމެ ދިވެހިބަހާއި ސަގާފަތާއި ތަރިކައާބެހޭ ވުޒާރާގެ މަސައްކަތްތަކުގެ ތެރެއިން އެމްބަސީތަކާއި ކޮންސިއުލޭޓްތަކާ ގުޅިގެން، ރާއްޖެއިން ބޭރުގައި ތިބޭ ދިވެހިންނަށްވެސް ދިވެހި ބަހާއި އިސްލާމްދީނަށް ލޯބިޖެހޭނެ ގޮތަށް މަސައްކަތްތައް ރާވައި ހިންގާނެ ކަމަށް ސަރުކާރުން ހާމަކޮށްފައި ވެއެވެ.
މި ރަސްމިއްޔާތުގައި ތައުލީމާ ބެހޭ ވަޒީރު ޑރ. އިސްމާއިލް ޝަފީއު އާއި ހާރިޖީ ވަޒީރު މޫސާ ޒަމީރުގެ އިތުރުން ސަރުކާރުގެ ބައެއް އިސްވެރިން ބައިވެރިވެ ވަޑައިގެންނެވިއެވެ.
Ads by STO
