މަޖިލިސް ކުރިމަތީ ކުރި މުޒާހަރާގައި ގޭންގުތަކުން ބައިވެރިވެފައިވޭ: ސީޕީ

މި ސަރުކާރުގެ ވަޒީރުންނަށް ރުހުން ދިނުމަށް ގޮވާލައި، ރައްޔިތުންގެ މަޖިލީހުގެ އިމާރާތް ކައިރީގައި ކުރި މުޒާހަރާގައި ގޭންގުތަކުގެ ބަޔަކު ބައިވެރިވި ކަމަށް ޕޮލިސް ކޮމިޝަނަރު އަލީ ޝުޖާއު މިއަދު ވިދާޅުވެއްޖެ އެވެ.

Ads by Hajj Corporation

ސީޕީ މިކަން ހާމަކޮށްފައި ވަނީ ރައްޔިތުންގެ މަޖިލީހުގެ ސެކިއުރިޓީއާ ގުޅޭ ގޮތުން، ސަލާމަތީ ހިދުމަތްތަކަށް ފާރަވެރިވާން މަޖިލީހުގައި އޮންނަ 241 ކޮމިޓީއަށް ޑިފެންސް މިނިސްޓަރު މުހައްމަދު ގައްސާން މައުމޫން އަދި ސީޕީ ޝުޖާއު މިއަދު ހާޒިރު ކުރުމުންނެވެ.

އެގޮތުން ސީޕީ މިހެން ވިދާޅުވީ ފުލުހުން މަޖިލީހަށް ފޮނުވި މައުލޫމާތުގައި ސަރުކާރުގެ ބައެއް މިނިސްޓަރުންނާއި ސްޓޭޓް މިނިސްޓަރުންނާއި މިނިސްޓަރު ފެންވަރު ބޭފުޅުންނާއި ސިޔާސީ މަގާމުތަކުގެ ބައެއް ބޭފުޅުންގެ އިތުރަށް ގޭންގު މެންބަރުންތަކެއް ބައިވެރިވި ކަމަށް ހޯރަފުށި ދާއިރާގެ މެންބަރު އަހުމަދު ސަލީމް ފާހަގަކުރެއްވުމުންނެވެ.

މުޒާހަރާއަށް ފުރަތަމަ އެއްވީ ސަރުކާރުގެ ބައެއް އިސް ބޭފުޅުންނާއި، ސަރުކާރުގެ އާންމު ސަޕޯޓަރުންތަކެއް ކަމަށާއި އޭރު މުޒާހަރާ ދިޔައީ ވެސް ސުލްހަވެރިކަމާއެކު ކަމަށް ސީޕީ ވިދާޅުވެފައި ވެެއެވެ.

ހަމަ އެހެންމެ އެ ސަރަހައްދުން ދުރަށް ދިޔުމަށް ސަރުކާރުގެ އިސް ބޭފުޅުންނާއި އާންމު ފަރާތްތަކަށް ފުލުހުން ނަސޭހަތްތެރި ވާން ފެށުމުން ދުރަށް ޖެހިލި ކަމަށް ވެސް ޝުޖާއު ވިދާޅުވިއެވެ.

ނަމަވެސް މުޒާހަރާ ކުރަން ފެށިތާ އިރުކޮޅެއް ފަހުން ގޭންގުތަކަށް ނިސްބަތްވާ މީހުން އެއްވެފައިވާ ކަމަށެވެ. މިގޮތުން އެ ހިސާބުން އެ ސަރަހައްދުގައި މަސްލަހަތު ހިފަހައްޓަން ސިފައިންނާއި ފުލުހުން މަސައްކަތް ކުރަމުން ދިޔަ ކަމަށް ސީޕީ ވަނީ ވިދާޅުވެފައެވެ.

މީގެ އިތުރުން އެ ދުވަހުގެ ހަމަނުޖެހުމުގައި ސަރުކާރުގެ އިސް ބޭފުޅުންނާއި ފަހުން އެއްވި ގޭންގުގެ މީހުންނާ އެއްވެސް ގުޅުމެއް އޮތްތޯ ހިންނަވަރު ދާއިރާގެ މެންބަރު ޖީހާން މަހުމޫދު ސުވާލުކުރެއްވުމުން ސީޕީ ވިދާޅުވީ އެ ކަން  ފުލުހުން ސާފުކޮށްފައިނުވާ ކަމަށެވެ.

މަޖިލީހުގެ ތަޅުމާއި މަޖިލިސް ކުރާގޭ ކައިރީގައި ހަމަނުޖެހުން ހިންގާ އަޑުއުފުލާފައި ވަނީ މި ސަރުކާރުގެ ވަޒީރުންނަށް ރުހުން ދިނުމަށް ވޯޓަށް އަހަން ކައިރިވެފައިވަނިކޮށް، 22 ވަޒީރުންގެ ތެރެއިން ބައެއް ވަޒީރުންނަށް ރުހުން ނުދޭން އިދިކޮޅު އެމްޑީޕީން ނިންމުމާއި ގުޅިގެން، ވޯޓަށް އެހުނަ ނުދީ، ސަރުކާރަށް ތާއިދު ކުރާ މެމްބަރުން މަޖިލީސް ތަޅު އެޅުވުމާއި ގުޅިގެންނެވެ.