ހިޔާ މަޝްރޫޢުގެ ދަފްތަރު ކެޓެގަރީން ޕޮއިންޓު ލިބިފައިވާ ގޮތުގެ ވަގުތީ ލިސްޓު އާއްމުކޮށްފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ހިންގެވި "ހިޔާ" މަޝްރޫޢުގެ މާލޭ މުނިސިޕަލްޓީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ޚާއްސަ ކެޓަގަރީން ޕޮއިންޓް ލިބިފައިވާ ގޮތުގެ ވަގުތީ ލިސްޓު އާންމުކޮށްފި އެވެ.
މިވަގުތީ ލިސްޓާއި އެކު މާލޭ މުނިސިޕަލްޓީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ޚާއްސަ ކެޓަގަރީން ފްލެޓަށް ޝަރުތު ހަމަނުވާ 25 ފަރާތެއްގެ ނަން ވެސް ވަނީ އާންމުކޮށްފައެވެ.
ދިވެހި ސަރުކާރުގެ ގެޒެޓުގައި މިލިސްޓުތައް އާއްމުކޮށްފައިވާއިރު، ޝަރުތު ހަމަވާ 2775 ފަރާތަކަށް ޕޮއިންޓު ލިބިފައިވާ ގޮތުގެ ތަފްސީލް ސަބަބާއިއެކު ވަނީ އާންކޮށްފައެވެ.
ރައީސް އޮފީހުން މިއަދު މިކަމާއި ގުޅޭގޮތުން ވިދާޅުވެފައި ވަނީ ހިޔާ މަޝްރޫޢުގެ މާލޭ މުނިސިޕަލްޓީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ޚާއްސަ ކެޓަގަރީ، ފްލެޓްތަކުގެ މައްސަލަބަލާ ކޮމިޓީއިން ދިރާސާ ކުރެއްވުމަށް ފަހު، އެ ކެޓަގަރީއަށް ފޯމު ހުށަހަޅާފައިވާ ފަރާތްތަކަށް ޕޮއިންޓް ލިބިފައިވާ ގޮތުގެ ވަގުތީ ލިސްޓް އިޢުލާން ކޮށްފައިވާ ކަމަށެވެ.
މިކެޓަގަރީއަށް ފޯމު ހުށަހަޅާފައިވާ ފަރާތްތަކަށް ޕޮއިންޓް ލިބިފައިވާ ގޮތުގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު، މާދަމާ، 21 ސެޕްޓެމްބަރު 2020 އިން ފެށިގެން އަންނަ އޮކްޓޯބަރު މަހުގެ 4 ގެ 15:00 ނިޔަލަށް ހުޅުވާލެވޭނެ ކަމަށްވެސް ރައީސް އޮފީހުން ހާމަކުރައްވާފައި ވެއެވެ.
