ކޮވިޑް-19: ފައްސިވެފައި ތިބޭ ދަރިވަރުންނަަށް ވެސް އޭ ލެވެލް އިމްތިހާނު ހެދޭނެ

ކޮވިޑަށް ފައްސިވެފައި ތިބޭ ދަރިވަރުންނަަށް ވެސް އޭ ލެވެލް އިމްތިހާނު ހެދޭނެ ކަމަށް އެޑިއުކޭޝަން މިނިސްޓްރީން ބުނެފިއެވެ.

Ads by MWSC

ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުޙައްމަދު އިހުސާން ވިދާޅުވީ ކޮވިޑް-19 އަށް ފައްސިވާ ދަރިވަރުންނާއި، ކަރަންޓީން ކުރެވިފައިވާ ދަރިވަރުން އިމްތިހާނު ހެދުމަށް ވަކި ސެންޓަރުތަކެއް ގާއިމުކުރަން ނިންމާފައިވާ ކަމަށެވެ.

އެޗްއީއޯސީ ގެ ތަރުޖަމާނު ޑރ.ނަޒްލާ ރަފީޤް ވިދާޅުވީ ކޮވިޑަށް ފައްސިވެފައިވާ ނުވަތަ ކަރަންޓީނު ގައި ތިބޭ ދަރިވަރުން އިމްތިހާނު ސެންޓަރުތަކަށް ގެންދިޔުމުގެ މަސައްކަތްތައް ކުރަމުން ގެންދާނީ އެޗްއީއޯސީ އާއި އެޑިއުކޭޝަން މިނިސްޓްރީ ގުޅިގެން ކަމަށެވެ.

ރާއްޖޭގައި ކޮވިޑް ފެތުރެމުން އައި މިންވަރު އިތުރުވަމުން ދިޔުމަށްފަހު މިހާރު އެއަދަދު ވަނީ ބޮޑު ތަނުން މަދުވެފައެވެ. އެގޮތުން އިއްޔެގެ އިރުއޮއްސި 6:00 އިން މިއަދު ގެ އިރުއޮއްސި 6:00 އަށް ބައްޔަށް ފައްސި ވެފައިވަނީ އެންމެ 46 މީހުންނެވެ.

ހަލުވި ކަމާއެކު ކޮވިޑް ފެތުރުމާއި ގުޅިގެން އެޑިއުކޭޝަނުން ކުރިން ވަނީ ސްކޫލްތައް ބަންދުކޮށް، ދަރިވަރުންނަަށް އޮންލައިން ކްލާސްތައް ނަގައިދޭން ފަށާފައެވެ.