ނުރައްކަލުގެ ރަނގަބީލެއް: ކޮވިޑް-19ގެ ވެކްސިން އުފެއްދުމަށްޓަކައި ބައި މިލިއަނެއްހާ ގިނަ މިޔަރު މަރާލަން ޖެހިދާނެ
ކޮވިޑް-19ގެ ވެކްސިން އުފެއްދުމަށްޓަކައި ގާތްގަނޑަކަށް ފަސްލައްކައެއްހާ މިޔަރުގެ މަރާލަން ޖެހިދާނެކަމުގެ ބިރުއޮތް ކަމަށް ބޭރުގެ ގިނަ މީޑިއާތަކަކުން ރިޕޯޓް ކޮށްފިއެވެ.
ބޭރު ދުނިޔޭގެ މަޝްހޫރު ނޫހެއް ކަމަށްވާ "ސްކައި ނިއުސް"ގެ މި ރިޕޯޓުގައި ވާ ގޮތުން ކޮވިޑް-19ގެ ވެކްސިން އުފެއްދުމަށްޓަކައި ބޭނުން ކުރަނީ މިޔަރުން ނަގާ ތެލެއް ކަމަށެވެ. އަދި ވެކްސިން އުފެއްދުމަށްޓަކައި ގިނަ އަދަދަކަށް މި ތެޔޮ ބޭނުން ކުރާނެ ކަމަށް މި ރިޕޯޓްގައި ބުނެފައި ވެއެވެ. މިތެލަކީ މިޔަރުގެ މޭގައި އުފެދޭ ގުދުރަތީ ތެލެއް ކަމަށްވެސް މި ރިޕޯޓުގައި ބުނެފައިވެއެވެ.
ކޮވިޑް-19ގެ ވެކްސިން އުފެއްދުމުގައި މި ތެޔޮ ބޭނުން ކުރުމުގެ ބޭނުމަކީ މި ތެލުގެ ސަބަބުން ބަލިމީހާއަށް އަވަހަށް ވެކްސިންގެ އަސަރުކޮށް ދިފާއީ ނިޒާމް ވަރުގަދަ ކޮށްދިނުމުގައި އެހީތެރިވެދޭތީއެވެ.
މި ވެކްސިން އުފައްދާ ކުންފުނިން ބުނާ ގޮތުގައި މި ވެކްސިންތަކުގެ ބިލިއަނެއްހާ ޑޯޒް އުފައްދަން އެ ކުންފުނިން ވަނީ ނިންމާފައެވެ. އެގޮތުން 2021 ވަނަ އަހަރުގެ މެއި މަހާ ހަމައަށް މި ވެކްސިންތަކުގެ ބޭނުން އެދެވޭ ގޮތުގައި ކުރެވޭނެކަމަށް މި ކުންފުނިން ބުނެއެވެ.
މިޔަރުގެ ހަށިގަނޑުގައި އުފެދޭ މިތެލުގެ އެންމެ ޓަނެއް ނެގުމަށްޓަކައި ވެސް 3000 މިޔަރު މަރާލަން ޖެހޭކަމަށް ރިޕޯޓް ތައް ބުނެއެވެ. މިއަދަދުން އުފެއްދޭ ވެކްސިނުގެ މިންވަރަށް ބަލާއިރު މުޅި ދުނިޔެއަށް ބޭނުންވާ ވެކްސިން އުފެއްދުމަށް ބައި މިލިއަން މިޔަރު މަރާލަން ޖެހޭނެކަމަށް ދިރާސާ ތަކުން ދަައްކައެވެ.
ކޮވިޑް-19ގެ މި ވެކްސިން އުފެއްދުމަށް މިހާގިނަ އަދަދެއްގެ މިޔަރު މަރަން ޖެހޭތީ، ސައިންސްވެރިން ދަނީ މިކަމަށް އިތުރު ގޮތެއް އޮތްތޯ ބަލާ ދިރާސާ ކުރަމުންނެވެ. އެގޮތުން އުއްދަނޑި ބޭނުން ކޮށްގެން މިޔަރުން ނަގާ މި ތެޔޮ އުފެއްދޭތޯ ސައިންސްވެރިން މަސައްކަތް ކުރަމުންދާ ކަމަށް ރިޕޯޓްތައްް ބުނެއެވެ.
މިގޮތަށް އެކިކަހަލަ ވެކްސިން އުފެއްދުމަށް ޓަކައި ކޮންމެ އަހަރަކުމެ 3 މިލިއަނެއްހާ މިޔަރު މަރާލާ ކަމަށްވެސް ދިރާސާތަކުން ވަނީ ހާމަވެފައެވެ.
