"ރައީސް ޔާމީން ދައްކަވަން ޖެހޭ ޖޫރިމަނާ ފައިސާ އަދިވެސް ނުދައްކަވާ"
ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ މައްޗަށް ދައުލަތަށް 5 މިލިއަން ޑޮލަރުގެ ޖޫރިމަނާ ދެއްކެވުމަށް ކްރިމިނަލް ކޯޓުން ކުރި އަމުރުގެ ދަށުން މިހާތަނަށް ވެސް އެ ފައިސާ ދައުލަަތަށް ދައްކަަވާފައި ނުވާކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
މިނިސްޓަރ އަމީރު މިހެން ވިދާޅުވެފައި ވަނީ މިއަދުގެ ރައްޔިތުންގެ މަޖިލީހުގައި މަކުނުދޫ ދާއިރާގެ މެންބަރު މުހައްމަދު ރާއީ ރައީސް ޔާމީން ދައުލަތަށް ދައްކަވަން ޖެހޭ ފައިސާ ދައްކަވާފައިވޭތޯ ކުރެއްވި ސުވާލަކަށް ޖަވާބު ދެއްވަމުންނެވެ.
އެ ސުވާލަށް ޖަވާބު ދެއްވަމުން މިނިސްޓަރ އަމީރު ވިދާޅުވީ ރައީސް ޔާމީން ދައުލަތަށް ދައްކަވަން ޖެހޭ ޖޫރިމަނާ ފައިސާ ދައްކަވާފައިވާ ކަމުގެ މައުލޫމާތެއް ނުލިބޭ ކަމަށެވެ.
ރައީސް ޔާމީންގެ މައްޗަށް ކްރިމިނަލް ކޯޓުން މަނީ ލޯންޑަރިންގެ ދައުވާ ސާބިތުވާ ކަމަށް ކަނޑައަޅާ އެމަނިކުފާނު 5 މިލިއަން ޑޮލަރުން ޖޫރިމަނާ ކުރުމަށް ހުކުމް ކުރީ މިދިޔަ އަހަރުގެ ނޮވެމްބަރު މަހުގައެވެ. އެމަނިކުފާނު އެމްއެމްޕީއާރުސީގެ ބޮޑު ޚިޔާނާތުގެ ފައިސާއިން 5 މިލިއަން ޑޮލަރު އަމިއްލަފުޅު އެކައުންޓަށް ލޯންޑަ ކުރެއްވި ކަމަށް ތުހުމަތުކޮށް އެ ދައުވާ ސާބިތުކޮށް ފަސް އަހަރު ދުވަހަށް އެމަނިކުފާނު ޖަލަށް ލުމަށްވެސް ކްރިިމިނަލް ކޯޓުން ހުކުމް ކުރިއެވެ.
ޖޫރިމަނާގެ ފައިސާ ހޯދަން އެޓާނީ ޖެނެރަލްގެ އޮފީހުން ސިވިލް ކޯޓަށް އެ މައްސަލަ ހުށަހަޅަން ވެސް ނިންމިއެވެ. ނަމަވެސް ސިވިލް ކޯޓުން އެކަމާ ގުޅޭގޮތުން މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
