އޭ އިންސާނާއެވެ. ތިބާ ހީކުރަނީ އަބަދުގެ އަބަދަށް މި ވަގުތީ ދުނިޔޭގައި ތިބާއަށް ހުރެވޭނެކަމަށް ހެއްޔެވެ؟
އަޅުގަނޑުމެންގެ ތެރެއިން ވަރަށް ގިނަ ބަަޔަކަށް ހީވެފައި އޮންނަ ހީވުމެކެވެ. މަރުވާނީ އުމުރުން 70 އަހަރަށް އެޅީމައި ކަމަށެވެ. ނުވަތަ މުސްކުޅިވުމުން ކަމަށެވެ. އެހެންކަމުން، ﷲގެ ހަޟްރަތަށް ކުއްތަންވެ ހެޔޮ އަމަލު ކުރަން ޖެހޭނީ ވެސް މުސްކުޅިވެ ގައިބާރު ދެރަވުމުން ކަމަށް އެމީހުން ގަބޫލު ކުރެއެވެ. ނަމާދުތައް އަދާކޮށް ދީނީ ކަންކަމަށް އިސްކަންދޭން ބުނުމުން، އަދި ފަހުން ނަމާދު ކުރަން ފަށާނީ ކަމަށް އެމީހުން ބުނެ އުޅެއެވެ. ޒުވާން އުމުރަކީ ދުނިޔޭގެ އުފަލާއި މަޖަލުގައި ހޭދަކުރަން ޖެހޭ ދުވަސްތަކެއް ކަމަށް އެމީހުން ގަބޫލު ކުރެއެވެ.
އެހެން ނަމަވެސް އެމީހުން ވެސް ގަބޫލު ކުރާ އެއް ކަމެއް އޮވެއެވެ. މަރަކީ ވާނެ އެއްޗެއް ކަމެވެ. ކޮންމެވެސް ދުވަހަކުން މަރު އެމީހުންނާ ވެސް ބައްދަލު ކުރާނެ ކަމެވެ. މަރު އައިސް ބައްދަލު ކުރުމުން ދެކޮޅު ހެދުމަކީ ކުރެވެން އޮންނާނެ ކަމެއް ނޫން ކަމެވެ. މަރު އައިސް ބައްދަލު ކުރުމުން، ތިމަންނާ އަދި ކޮށްލަން ބޭނުންވާ ހެޔޮ އަމަލުތަކެއް އެބަހުއްޓޭ ބުނެ ދެކޮޅު ހެދެން ނޯންނާނެކަން ވެސް ގަބޫލު ކުރެއެވެ. އެހެން ނަމަވެސް އެހުރިހާ ކަމެއް އެނގި ތިބެމެ އަޅުގަނޑުމެން ޣާފިލް ވަނީއެވެ. ދުނިޔޭގެ ވަގުތީ އުފަލާއި ހިތްހަމަ ޖެހުން އަޅުގަނޑުމެންނަށް މާ މުހިއްމު ވަނީއެވެ.
މީގެ އިތުރުންވެސް އަޅުގަނޑުމެންނަށް ކުރެވޭ ވަރަށް ވިޔާނުދާ އަމަލެއް އެބައޮތެވެ. ބޮޑު މަގާމެއް ލިބުމުން ނުވަތަ ދިރިއުޅުމުގައި ކުރިއަރައިގެން ދާން ފެށުމުން، ބޮޑާވުމެވެ. ތިމާވަރުގެ މީހެއް ނެތް ކަމަށް ގަބޫލު ކުރުމެވެ. ތިބާއަށްވުރެ މޮޅު މީހަކު ނެތްކަމަށް އަމިއްލައަށް ގަބޫލު ކުރުމެވެ. މި ނޫނަސް ހަޔާތެއް އެބައޮތް ކަން ހަނދާން ނައްތާލުމެވެ. މަރު ތިބާއާ ބައްދަލު ކުރާނެ ކަން އެނގިހުރެ ވެސް ޣާފިލް ވުމެވެ.
ކޮންމެ ނަފްސަކީ ވެސް މަރުގެ ރަހަ ދެކޭނެ ނަފްސެއްކަން ﷲ ތައާލާ ގުރުއާނުގައި ބަޔާން ކުރައްވާފައިވާކަން ތިބާއަށް ހަމަ ނޭނގެނީ ހެއްޔެވެ؟
އޭ މަރު ތިބާއާ ބައްދަލު ކުރާނެ ކަމާމެދު ޣާފިލުވެފައިވާ އިންސާނާއެވެ. ތިބާ ހީކުރަނީ އަބަދުގެ އަބަދަށް މި ވަގުތީ ދުނިޔޭގައި ތިބާއަށް ހުރެވޭނެ ކަމަށް ހެއްޔެވެ؟ ހަމަ ހިލާ އެހެނަކުން ނުވާނެއެވެ. ތިބާ މަރުވާނެ ދުވަސް ﷲގެ ހަޟްރަތުގައި ވަނީ ލިޔެވިފައެވެ. މިއަދު ތިބާއަށް މޭފުއްޕާފައި ބޮޑާކަން މަތީ އުޅެވިދާނެއެވެ. ނަމަވެސް މާދަމާ ﷲގެ ދަރުބާރަށް ހާޟިރު ކުރެވޭއިރު ތިބާ އަކީ ނިކަމެތި މީހެކެވެ. އެ ދުވަހުން ތިބާ ﷲގެ ހަޟްރަތުގައި ޖަވާބުދާރީ ވާން ޖެހޭނެއެވެ. ތިބާއަކަށް އެ ދުވަހަކުން ދޮގެއް ނުހެދޭނެއެވެ. ތިބާގެ ގުނަވަންތައް ތިބާ ކުރިހާ ކަމަކަށް އެ ދުވަހުން ހެކިވާނެއެވެ.
އޭ ނިކަމެތި އިންސާނާއެވެ. އަދި ވަގުތު ފާއިތެެއް ނުވެއެވެ. ﷲގެ ހަޟްރަތުން އުއްމީދު ކަނޑާލުމެއް ނުވެއެވެ. ތިބާއަށް ޓަކައި ތައުބާގެ ދޮރު އަދިވެސް ވަނީ ހުޅުވިގެންނެވެ. އެ ދޮރުން ވަނުމަށް ތިބާ ޖެހިލުން ނުވާށެވެ. މީހެއްގެ ހައްގަކަށް އަރައިގަނެވިފައިވާ ނަމަ އެ ހައްގެއް އެމީހަކަށް އަދާ ކުރާށެވެ. ނުވަތަ ކުށެއް ކުރެވިފައިވާނަމަ އެ ކަމަށް ތައުބާ ވާށެވެ. ފާފަ ފުއްސެވުމަށް އެދި ﷲގެ ހަޒްރަތަށް ކުއްތަންވެ ދުއާ ދަންނަވާށެވެ. ކުރެވިފައިވާ ފާފަތަކާމެދު ދެރަވެ ހިތާމަ ކުރާ ހާލުގައެވެ.
ލޮބުވެތި އަޚާއެވެ. ދުނިޔޭގެ މި ވަގުތީ، އުނިކަން ނޫނީ ނެތް ފާލަމުގައި ތިބާ އާވާރާ ވެގެން ނުދާށެެވެ. މި ވަގުތީ ދިރިއުޅުމުގައި ތިބާ އަބަދަކު ނުހުންނާނެވެ. މާދަމާވެސް މަރު ތިބާއާ ބައްދަލު ކޮށްފާނެ ކަމަށް ބިރުވެތި ވާށެވެ.
