"ފްލެޓު ދޭނެ 2500 ގެ ލިސްޓެއް ނެތް"
ކުރީގެ ވެރިކަމުގައި ވެސް ފްލެޓް ދޭނެ މީހުންގެ 2500 ފްލެޓްގެ ލިސްޓެއް އެކުލަވާލާފައި ނުވާ ކަމަށް ފްލެޓްތަކުގެ މައްސަލަ ބަލާ ކޮމިޓީން މިއަދު ބުނެފި އެވެ.
ހުޅުމާލޭ ދެވަނަ ފިޔަވަހީގައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ތަރައްޤީ ކޮށްފައިވާ ފްލެޓްތައް ލިބުނު މީހުންގެ ލިސްޓާ ގުޅިގެން ހުރި ޝަކުވާތައް ބެލުމަށް މި ސަރުކާރުން އުފެއްދި ފްލެޓްތަކުގެ މައްސަލަ ބަލާ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޮމިޓީގެ ރައީސް ތޯހާ މުހައްމަދު ވިދާޅުވީ ސޯޝަލް މީޑިއާއިން 2500 ހައުސިން ޔުނިޓެއްގެ ވާހަކައަކާ ގުޅިގެން ސުވާލުތައް ކުރިމަތިވަމުން އަންނަ ކަމަށެވެ.
މިކަމާ ގުޅޭގޮތުން ތޯހާ ވިދާޅުވީ 2500 ހައުސިން ޔުނިޓްގެ ޕްރޮޖެކްޓެއް ކުރީ ސަރުކާރުގައި ނުހިންގާ ކަމަށާއި އެގޮތުން އެފަދަ ލިސްޓެއް އެންމެ ފުރަތަމަ އުފަންވެފައި ވަނީ ވެސް ހަތަރެއް ނޮވެމްބަރު 2018 ގައި ކަމަށެވެ.
"2500 ލިސްޓެއް އެންމެ ފުރަތަމަ އިއުލާން ކުރެވުނީ ދާއިމީ ލިސްޓުތައް އިއުލާންކުރިއިރު. އެގޮތުން މާލޭ ރަށްވެހިންނަށް 1000 ޔުނިޓް، 18 އަހަރާއި 40 އަހަރާއި ދެމެދުގެ މީހުންނަށް 500 ޔުނިޓް އަދި ދަފްތަރަށް 500 އަދި ނުކުޅެދުންތެރިކަން ހުންނަ މީހުންނަށް 500 ޔުނިޓް އިއުލާނު ކުރި" ތޯހާ ވިދާޅުވިއެވެ.
ތޯހާ ވިދާޅުވީ 2500 ހައުސިން ޔުނިޓްގެ ޕްރޮޖެކްޓަކީ ނުހިންގާ ޕްރޮޖެކްޓެއް ކަމަށާއި އޭރުގެ ސަރުކާރުން އެއްވެސް އިރެއްގައި 2500 ހައުސިން ޔުނިޓަށް ކުރިމަތިލުމަށް ހުޅުވާލާފައި ނުވާ ކަމަށެވެ. އަދި އެފަދަ އިއުލާނެއް ކުރިކަން ފެންނަން ލިޔެކިޔުމެއް ވެސް ނެތް ކަމަށް ތޯހާ ވިދާޅުވިއެވެ.
