ރޭޕް ގެ މައްސަލަތަކަށް އިންސާފު ހޯދައި ދިނުމަށް ގޮވާލާ އިހުތިޖާޖު ކޮށްފި

އިދިކޮޅުގެ ފަރާތުން ޖެންޑާ މިނިސްޓަރ ޑރ. އައިޝާތު މުހައްމަދު ދީދީއާ ބައްދަލުކުރުމަށް އެދި މިދިޔަ އަހަރުގެ އޮކްޓޯބަރު މަހު 19 ގައި ފޮނުވި ސިޓީއަށް ޖަވާބެއް ނުލިބިގެންނާއި ރޭޕް އަދި ޖިންސީ ގޯނާގެ މައްސަލަތަކަށް އިންސާފު ހޯދައި ދިނުމަށް ގޮވާލާ ޖެންޑާ މިނިސްޓްރީ ކުރިމަތީގައި އިހުތިޖާޖު ކޮށްފިއެވެ.

Ads by MWSC

އިދިކޮޅު ޕީޕީއެމްއިން ބުނީ މިދިޔަ އަހަރުގެ އޮކްޓޯބަރު މަހުގެ 19ވަނަ ޖެންޑާ މިނިސްޓަރާ ބައްދަލުކުރުމަށް އެދި ސިޓީއެއް ފޮނުވި ނަމަވެސް އެއްވެސް ޖަވާބެއް ލިބިފައިނުވާ ކަމަށެވެ.

އެހެންކަމުން މިއަދު އެމިނިސްޓްރީ ކުރިމަތީގައި އިހުތިޖާޖު ކުރަމުން ދަނީ ރޭޕާއި ޖިންސީ ފުރައްސާރަ މައްސަލަތަކަށް އިންސާފު ނުލިބި ލަސްވަމުންދާތީ ކަމަށް ވެސް އިދިކޮޅުން ބުނެއެވެ.

އެސަރަޙައްދުގައި ފުލުހުން ހަރަކާތްތެރިވެ، އިހުތިޖާޖުގައި ބައިވެރިވި މީހުން ދުރަށް ޖެއްސުމަށް ވެސް މަސައްކަތް ކޮށްފައިވެއެވެ.

އިދިކޮޅުން މައުލޫމާތުދޭ ގޮތުގައި އިހުތިޖާޖުގައި ބައިވެރިވި މީހުންގެ ތެރެއިން ފަސް މީހަކު މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ނަމަވެސް މިކަމާ ގުޅޭގޮތުން ފުލުހުން އަދި ވަކި އެއްޗެއް ވިދާޅެއް ނުވެއެވެ.

މިއަދުގެ އިހުތިޖާޖުގައި ބައިވެރިވީ މީހުންގެ ތެރެއިން ގިނަ ބަޔަކު ތިބީ ރޭޕާއި ޖިންސީ ގޯނާ ކުރުން ފަދަ ކަންކަން ހުއްޓުވުމަށް ގޮވާލާ، ޕޯސްޓަރުތަކެއް ހިފައިގެންނެވެ.