ހުއްޓާނުލައި 24 ގަޑިއިރު މުޒާހަރާ ކުރަން ޖެހިދާނެ: އަދުރޭ
އިދިކޮޅު ކޯލިޝަނުން ކުރިއަށް ގެންދަމުން އަންނަ މުޒާހަރާތައް ހުއްޓާނުލާ ކުރިއަށް ގެންދަން ޖެހިދާނެ ކަމުގެ އިންޒާރު އިދިކޮޅު ކޯލިޝަން ވަގުތީ ގޮތުން ހިންގެވުމާ ހަވާލުވެ ހުންނެވި، ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވި ހުކުމަށް ހައިކޯޓުން ތާއީދު ކުރުމުން އިދިކޮޅު ކޯލިޝަނުން އަންނަނީ ކޮންމެ ދުވަހަކު ވެސް ކޮންމެވެސް ސިފައެއްގައި އިހުތިޖާޖުތައް ބާއްވަމުންނެވެ.
އެގޮތުން ރޭ ބޭއްވި ޖަލްސާއެއްގައި ވާހަކަދައްކަވަމުން އަބްދުއްރަހީމް ވިދާޅުވީ ދިވެހި ރައްޔިތުން މިއަދު ބޭނުން ވަނީ ރައީސް ޔާމީން މިނިވަން ކުރަން ކަމަށާއި ރައްޔިތުން ބޭނުންވާ ކަމެއް ކުރަން އަބަދުވެސް އިދިކޮޅު އޮންނާނީ ތައްޔާރަށް ކަމަށެވެ.
އަދި އެކަމަށްޓަކައި ދުވާލު ހަތަރު ދަމު އިހުތިޖާޖު ކުރުމަށް ވެސް ތައްޔާރަށް ތިބި ކަމަށް އަދުރޭ ވިދާޅުވިއެވެ.
"ތި ބޭފުޅުން ތިގޮތަށް ތިއްބެވިއްޔާ ހަމަ މަގުމަތިން ނުފިލައި ވެސް ހިނގައިދާނެ. 24 ގަޑިއިރު މުޒާހަރާ ޖައްސަން ވެސް ޖެހިދާނެ. ހިތްވަރު ދިވެހި ރައްޔިތުންގެ ގައިގައި ހުންނާނެ" އަދުރޭ ވިދާޅުވިއެވެ.
މީގެ އިތުރުން ފެބްރުއަރީ މަހަކީ އެމްޑީޕީން ވަރަށް ބިރުގަންނަ މަހެއް ކަން ފާހަގަ ކުރައްވައި އަދުރޭ ވިދާޅުވީ އެ ޕާޓީ އަކީ ފެބްރުއަރީ މަހެެއްގެ 7 ވަނަ ދުވަހު "ބޮނޑިއެއް ބޮއެގެން" ތިބި ބައެއް ކަމަށެވެ.
އަދި ދުއާ އަކީ މިއަހަރު ވެސް އެފަދަ ކަމެއް މެދުވެރިވެގެން ނަމަވެސް މި ސަރުކާރު ނިމުމަކަށް އައުން ކަމަށް އަބްުދުއްރަހީމް ވިދާޅުވިއެވެ.
އާމީން