އާލިއާ ކައްކާ ހިތެއް ނުވޭ، އެކަމަކު ވަރަށް ކާހިތްވޭ!
ބޮލީވުޑްގެ ނަން މަޝްހޫރު ފިލްމީތަރި އާލިއާ ބަޓް ކައްކާ ހިތެއް ނުވާ ކަމަށާއި ނަމަވެސް ވަރަށް ކާހިތްވާ ކަމަށް އޭނާ ބުނެފިއެވެ.
އިންސްޓަގްރާމްގައި އާލިއާ އިއްޔެ ވަނީ އޭނާގެ ފޭނުންނާއެކު "ޓްރޫ އޯ ފޯލްސް" ގޭމެއް ކުޅެފައެވެ. އެގޭމުގައި ފޭނުން އާލިއާއާ ބެހޭގޮތުން އެއްޗެއް ބުނުމުން އޭނާ ވަނީ އެއީ ތެދެއްތޯ ނުވަތަ ދޮގެއްތޯ ބުނެފައެވެ.
އެގޮތުން އެކަކު ބުނެފައި ވަނީ އާލިއާ ކައްކާހިތްވާ ކަމަށެވެ. އޭގެ ޖަވާބުގައި އާލިއާ ބުނީ، އެއީ ދޮގެއް ކަމަށެވެ. އަދި ކައްކާ ހިތެއް ނުވާ ކަމަށާއި އެހެން ނަމަވެސް ކާހިތްވާ ކަމަށް އާލިއާ ބުންޏެވެ.
މީގެއިތުރުން އެހެން ފޭނަކު ބުނެފައި ވަނީ އާލިއާއަކީ ވަރަށް އަވަސް އަވަހަށް ރުޅި އަންނަ މީހެއް ކަމަށެވެ. އޭގެ ޖަވާބުގައި އާލިއާ ބުނީ އެއީ ތެދެއް ކަމަށާއި އެހެން ނަމަވެސް އޭނާ މިހާރު ރުޅި ކޮންޓްރޯލު ކުރާ ކަމަށެވެ.
އިތުރު މީހަކު ބުނެފައި ވަނީ، އާލިއާ ހުރިހާ ކަމެއް ދޫކޮށްލާފައި އެކަނިމާ އެކަނި ދަތުރަކު ދާން ބޭނުންވާ ކަމަށެވެ. އޭގެ ޖަވާބުގައި އާލިއާ ބުނީ އެއީ ތެދެއް ކަމަށާއި އެހެން ނަމަވެސް ދާހިތްވަނީ އެކަންޏެއް ނޫން ކަމުގައެވެ.
އާލިއާ އަށް އަލުތްވާއި ޗޮކްލެޓު ވަރަށް ކަމުދާ ކަމަށް ވެސް އެގޭމުގެ ތެރޭގައި އޭނާ ބުނެފައި ވެއެވެ.
މީގެ އިތުރުން މީހަކު އާލިއާ ގާތު އަހާފައި ވަނީ އޭނާއަކީ ހެނދުނުގެ ނާސްތާ ނުނަގާ މީހެއްތޯއެވެ. ޖަވާބުގައި އާލިއާ ބުނީ އޭނާއަކީ ގިނަ ފަހަރަށް ހެނދުނުގެ ނާސްތާ ނަގާ މީހެއް ކަމަށެވެ.
