ރަންބީރު އާއި އާލިއާގެ ކައިވެނި އަންނަ އަހަރު؟
ބޮލީވުޑު ޖޯޑުތަކުގެ ތެރެއިން އާލިއާ އާ ރަންބީރަކީ މިހާރު އެންމެ ނަން ހިނގާ ދެ ތަރިންނެވެ. މި ދެތަރިންގެ ކައިވެނި ވާހަކަތަކަކީ ފަހަކަށް އައިސް ބޮލީވުޑްގައި އެންމެ ގަދަޔަށް ދެކެވޭ ވާހަކައެވެ.
މި އަޑުތައް އަނެއްކާ ވެސް ގަދަވެފައި މިވަނީ އާލިއާ އާއި ރަންބީރު އެކުގައި ޑިޒައިނަރު މަނީޝް މަލޯޓްރާގެ އެޕޮއިންޓްމެންޓަކަށް ދިޔަތަން ފެނުމުންނެވެ. ގިނަ ބަޔަކު ބުނާ ގޮތުގައި މަނީޝް ގާތަށް ދެތަރިން ގޮސްފައި ވަނީ ކައިވެނީގެ ހެދުމުގެ މަސައްކަތުގައެވެ.
ނަމަވެސް ބޮލީވުޑްލައިފް އިން މި ދެތަރިންގެ ގާތް މީހަކާ ހަވާލާދީ ރިޕޯޓުކޮށްފައިވާ ގޮތުގައި މި ދެ ތަރިން ކައިވެނި ކުރާނީ ކުރިއަށް އޮތް 2022 ވަނަ އަހަރުއެވެ. އަދި އެއީ ދެ ސަބަބަކާ ގުޅިގެން ކަމުގައި ވެސް ފާހަގަ ކޮށްފައިވެއެވެ.
އެގޮތުން ފުރަތަމަ ކަމަކަށް އެ ރިޕޯޓުގައި ފާހަގަ ކޮށްފައި ވަނީ އިންޑިއާގެ ކައިވެނި ހަފްލާތަކަކީ ބޮޑެތި ހަފްލާތަކަކަށް ވުމުން ރަންބީރުއާ އާލިއާ މަނީޝް ގާތަށް ކުރި ޒިޔާރަތުން އެނގޭ ކަމަކީ ކައިވެނީގެ ތައްޔާރީތައް ފެށުން ކަމަށެވެ.
ދެވަނަ ސަބަބަކަށް މި ރިޕޯޓުގައި ފާހަގަކޮށްފައި ވަނީ ބްރަހްމަޝްތްރަ ފިލްމު ރިލީޒްކުރުމަށް ފަހު މި ދެ ތަރިން ކައިވެނި ކުރަން ނިންމާފައިވުމެވެ. މި ފިލްމުން އާލިއާ އާއި ރަންބީރު އެކުގައި ފެނިގެންދެއެވެ.
ދާދި ފަހުން ރަންބީރު ބުނެފައި ވަނީ، އާލިއާ އާއެކު މިއަހަރު ކައިވެނި ކުރަން ރޭވި ކަމަށެވެ. ނަމަވެސް ކޮވިޑްގެ ބަލިމަޑުކަމުގެ ސަބަބުން އެމީހުން ކައިވެނި ފަސްކޮށްލީކަމަށް ވެސް އޭނާ ބުނެފައިވެއެވެ.
Ads by STO
