މިއީ ޝާހްރުކް އެއް ނޫން، އެތައް ބަޔަކު "ކޮސް" ކޮށްލައިފި
ބޮލީވުޑްގެ ތަރިންނާ ވައްތަރު މީހުން ފެނިގެން ދޭތެރެ ދޭތެރެއިން މީޑިޔާގެ ސަމާލުކަމަށް އާދެއެވެ. އަދި މިހެން ފެންނަ މީހުންނަަށް ލިބޭ މަޝްހޫރުކަމުގެ ސަބަބުން އެމީހުންގެ މުޅި ދިރިއުޅުން ބަދަލުކުރަން މަޖުބޫރުވާ ހިސާބަށްވެސް ކަންތައްގޮސްފައި އެބަ ހުއްޓެވެ.
މިފަހަރު މިއުޅެނީ އަނެއްކާވެސް ޝާހްރުކް ހާނާ ވައްތަރު މީހަކު ފެނިގެންނެވެ. އިބްރާހިމް ގަދުރީ ކިޔާ މިމީހާގެ އިންސްޓަގްރާމްގައި އާންމުކޮށްފައިވާ ފޮޓޯތަކާއި ވީޑިއޯތަކުން ޝާހްރުކާ ވަރަށް ވައްތަރެވެ. ޝާހްރުކް އެކި ފިލްމުތަކުގައި އޭނާގެ ލުކް ގެނެސްދީފައިވާ ގޮތަށް ގަދްރީގެ ލުކް ވެސް އެކި ފޮޓޯތަކުގައި ގެނެސްދީފައިވެއެވެ.
ގަދްރީ އަކީ ޝާހްރުކްގެ ބޮޑު ފޭނެކެވެ. އަދި ޝާހުގެ ބައެއް ފިލްމުތަކުގެ ލަވަތަކަށް އެކްޓްކޮށް ނަގައިފައި ހުރި ވީޑިއޯތަކުން ވެސް އެކަން އެނގެއެވެ.
ގަދްރީ ބުނެފައި ވަނީ އޭނާއަކީ އާޓްސް އެންޑް އެންޓަޓައިންމަންޓް އިންޑަސްޓްރީގެ މީހެއް ކަމަށާއި އެކި އިވެންޓްތަކާއި ޝޯތަކުގައި އޭނާ ބައިވެރިކުރަން އެދޭ ނަމަ މެސެޖް ކުރުމަށެވެ. އިންސްޓަގްރާމްގައި އޭނާ ފޮލޯކުރާ މީހުން 46،000އަށް އަރައެވެ.
މީގެ ކުރިން ވެސް ވަނީ ޖޯޑަންއިން ޝާހްރުކާ ވައްތަރު މީހެއް ފެނި އޭނާގެ ފޮޓޯތަކެއް ސޯޝަލް މީޑިއާގައި ވައިރަލްވިއެވެ. އަކްރަން އަލްއިއްސާވީ ނަމަކަށް ކިޔާ އެމީހާއަކީ ޖޯޑަންގެ މަޝްހޫރު ފޮޓޯގްރާފަރެކެވެ.
