ފުލެޓްތަކުގެ ފިނިޝިން މަސައްކަތް މިއަަދު ކުރެވޭނެ، ފްލެޓާ ހަމައަށް ދާން ހުއްދަ ހޯދާކަށް ނުޖެހޭނެ
ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ މަޝްރޫއުގެ ފްލެޓްތަކާ ހަމައަށް އާއްމުންނަށް ވަދެވޭހެން ހުޅުވައިލައިފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން، މިއަދު ހިޔާ ފުލެޓްތަކާ ހަމައަށް އާއްމުންނަށް ދެވޭހެން ހުޅުވާފައިވާއިރު ހިޔާ ފުލެޓުތަކުގެ ފިނިޝިންގެ މަަސައްކަތް އެ ފުލެޓުތަކުގެ ވެރިންނަށް މިއަދުން ފެށިގެން ކުރަން ފެށޭނެއެވެ. މީގެ ކުރިން އެ ފުލެޓުތަކާ ހަމައަށް ދެވެނީ އެކަމަށް ހާއްސަ ހުއްދައެއް ހޯދައިގެންނެވެ. އެހެން ނަމަވެސް ދެވަނަ ފިޔަވަހި އެއްކޮށް ހުޅުވައިނުލި ނަމަވެސް ފިނިޝިންގެ މަސައްކަތްތަކަށް މިއަދުން ފެށިގެން ފުލެޓުތަކަށް ވަދެވޭނެއެވެ. މީގެ އިތުރުން ފުލެޓުތަކުގެ ވެރިންނަށް މަސައްކަތުގައި ފަސޭހަ ގޮތްތައް ހޯދައިދިނުމަށް ޓަކައި މިއަދުން ފެށިގެން ފްލެޓްތަކަށް ދާއިމީކޮށް ކަރަންޓް ވެސް ދޭން ފަށައިފައިވާކަމަށް އެޗްޑީސީން ވިދާޅުވިއެވެ.
ހިޔާ މަޝްރޫގެ ފުލެޓުތައް ދިނުމުގެ އެއްބަސްވުންތަކުގަައި ސޮއިކުރަމުން ދާއިރު ބައެއް ފަރާތްތަކަށް މިހާރު ވަނީ ފުލެޓްގެ ތަޅުދަނޑިތައް ވެސް ހަވާލުކޮށްފައެވެ. މި ފުލެޓުތަކުގެ ފިނިޝިންއަށް 3 މަސްދުވަހުގެ މުހުލަތެއް ދީފައިވެއެވެ. މި މުއްދަތުގައި ކުލި ނުނަގާނެކަމަށް ވެސް އެޗްޑީސީން މީގެ ކުރިން ވިދާޅުވެފައި ވެއެވެ. އެހެން ނަމަވެސް މިހާރު ނިންމައިފައިވާ ގޮތުން ފިނިޝިންގެ މަސައްކަތަށް އިތުރު މުހުލަތެއްދީ ފުލެޓުތަކުގެ ކުލި ނަގަން ފަށާނީ އަންނަ ޖެނުއަރީ މަހުގައި ކަމަށްވެސް އެެޗްޑީސީން ވަނީ ވިދާޅުވެފައެވެ.
