އިދިކޮޅުން ހުކުރު ދުވަހު "މިނިވަންކަމުގެ ދިފާއުގައި" ހިނގާލުމެއް ބާއްވަނީ
"މިނިވަންކަމުގެ ދިފާއުގައި" އިދިކޮޅުން ޚާއްސަ ހިނގާލުމެއް މާލޭގައި ބޭއްވުމަށް ނިންމައިފިއެވެ.
އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމެއްގައި ޕްރޮގްރަސިވް ޕާޓީ އޮފް މޯލްޑިވްސް، ޕީޕީއެމްގެ ނައިބު ރައީސް އަޙްމަދު ޝިޔާމް ވިދާޅުވީ، މި ހިނގާލުން ބޭއްވުމަށް ހަމަޖެހިފައި ވަނީ އަންނަ ހުކުރު ދުވަހު 4 ޖަހާއިރު ކަމަށެވެ.
ޝިޔާމް ވިދާޅުވީ، އިދިކޮޅުން މިފަދަ ހިނގާލުމެއް ބާއްވަން ނިންމައިފައި ވަނީ، ރާއްޖޭގެ މިނިވަންކަން ގެއްލޭ ގޮތަށް ދިވެހި ސަރުކާރުން ކަންކަން ކުރަމުންދާތީ އެކަމާ ދެކޮޅަށް އަޑު އުފުލުމަށް ކަމަށެވެ.
ރައީސް ނަޝީދާއި އެމްޑީޕީގެ ބައެއް ބޭފުޅުން، ރައީސް ނަޝީދުގެ ވެރިކަމުގައި ވެލާނާ އިންޓަރނޭޝަނަލް އެއަރޕޯޓް އިންޑިއާގެ ކުންފުންޏަކަށް ދިން ދިނުން ދިފާއުކޮށް މިއަދު ވާހަކަފުޅު ދައްކަވާފައިވާތީ، އެކަމަށް އިޝާރާތް ކުރައްވާ ޝިޔާމް ވިދާޅުވީ، މިއަދު އަނެއްކާ ވެސް ދިވެހިން ދިވެހިންގެ އެއަރޕޯޓް ހޯދަން ނިކުންނަ ދުވަސް ގާތްވެއްޖެ ކަމަށެވެ.
"މިއަދު އަނެއްކާ ވެސް މިފެންނަނީ ދިވެހި ރައްޔިތުންގެ މައި ދޮރޯށި ހޯދުމަށް ދިވެހިން ކުރި މަސައްކަތް އަލުން ކުރަންޖެހިފައިވާ ތަން. މިއަދު އަނެއްކާ ވެސް ޖީއެމްއާރަށް އެއާޕޯޓް ދިނުމުގެ މަސައްކަތް ކުރާކަމުގެ އަޑުތައް އިވެމުންދަނީ." ޝިޔާމް ވިދާޅުވިއެވެ.
މާލޭ ބައިނަލްއަޤްވާމީ ވައިގެ ބަނދަރު، ކުއްޔަށް ދެއްވުމަށް 2010 ޖޫން 28 ވަނަ ދުވަހު، ޖީ.އެމް.އާރ،އެމް.އޭ.އެޗް.ބީ ކޮންސޯޓިއަމްއާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި، ދިވެހި ސަރުކާރުން ވަނީ އެއްބަސްވެފައެވެ. މި އެއްބަސްވުމާ އެއްގޮތަށް އޭރު ވެސް ކަންކަން ނުހިނގާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
މި އެއްބަސްވުން އުވައިލެއްވީ ރައީސް ނަޝީދު ވެރިކަމުން އިސްތިއުފާ ދެއްވުމުން، ވެރިކަމާ ހަވާލުވެ ވަޑައިގެންނެވި، ޑރ. މުޙައްމަދު ވަޙީދު ޙަސަންގެ ސަރުކާރުންނެވެ. ޖީއެމްއާރު މައްސަލަ މުޅިން ނިމި، ބަދަލުގެ ގޮތުގައި ދިވެހި ދައުލަތުން ދައްކަން ޖެހުނު ޖުމުލަ 271 މިލިއަން ޑޮލަރު، އެމްއޭސީއެލްއިން ދައްކައި ޚަލާޞްކުރެއްވީ ރައީސް ޔާމީންގެ ވެރިކަމުގައެވެ.
