ކުރީގެ މެންބަރުންގެ އާއިލާތަކަށް އިންޝުއަރެންސް ނުދޭން ފާސްކޮށްފި

ރައްޔިތުންގެ މަޖިލީހުގެ ކުރީގެ މެންބަރުންގެ އާއިލާތަކަށް ހެލްތު އިންސުއަރެންސް ނުދޭން އެ މަޖިލީހުން މިއަދު ފާސްކޮށްފިއެވެ.

Ads by STELCO

މި މައްސަލަ މަޖިލީހުގެ އާންމު ކޮމިޓީއަށް މީގެ ކުރިން ފޮނުވުމުން، އެ ކޮމިޓީން މި މައްސަލަ ނުބަލައި، މިކަމާ މެދު ގޮތެއް ނިންމުމަށް މަޖިލީހުގެ ތަޅުމަށް އަލުން ވަނީ ފޮނުވައިފައެވެ.

މިކަމާ ގުޅޭ ގޮތުން މިއަދު މަޖިލިސް ތަޅުމުގައި ބަހުސް ކޮށްފައިވާ އިރު، އޭގެ ތެރެއިން ގިނަ މެންބަރުން ވިދާޅުވީ ކުރީގެ މެންބަރުންގެ އާއިލާތަކަށް ހެލްތު އިންޝުއަރެންސް ދޭން ނުފެންނަ ކަމަށެވެ.

ކުރީގެ މެންބަރުންގެ އާއިލާއަށް ހެލްތް އިންޝުއަރެންސް ނުދޭން ވޯޓަށް އަަހަން ހުށަހެޅުއްވީ އިނގުރައިދޫ ދާއިރާގެ މެމްބަރު ހަސަން އަހުމަދެވެ. އަދި އެ ހުށަހެޅުއްވުމަށް ތާއިދުކުރެއްވީ ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގެވެ.

މި ހުށަހެޅުން ފާސްވީ މަޖިލީހަށް މިއަދު ހާޒިރުވި 26 މެންބަރުންގެ ވޯޓާއެކުގައެވެ. ކުރީގެ މެންބަރުންގެ އާއިލާތަކަށް އިންޝުއަރެންސް ދޭން ފެންނަ ކަމަށް ވޯޓު ދެއްވީ ދެ މެންބަރުންނެވެ.