އިދިކޮޅުގެ ޕްރެސް މަޖިލީހުގައި ބާއްވަން ހުއްދަދިން ސަބަބު ބުނެދީފި

އިދިކޮޅު ޕީޕީއެމް،ޕީއެންސީގެ ޕާލަމެންޓްރީ ގުރޫޕުން މިއަދު ބޭއްވި ނޫސްވެރިންގެ ބައްދަލުވުން ރައްޔިތުންގެ މަޖިލީހުގައި ބާއްވަން ހުއްދަ ދިން ސަބަބު އެ މަޖިލީހުން ބުނެދީފިއެވެ.

Ads by STELCO

ރައްޔިތުންގެ މަޖިލީހަށް އިދިކޮޅުގެ ފަރާތުން ވެއްދި ދެ މައްސަލައެއް އެ މަޖިލީހުން ބޭރުކޮށްލުމާ ގުޅިގެން ޕްރޮގްރެސިވް ކޯލިޝަނުން މިއަދު ވަނީ މަޖިލިސް އިދާރާގައި ނޫސްވެރިންގެ ބައްދަލުވުމެއް ބާއްވައި، އެކަމާ ގުޅޭގޮތުން ކަންބޮޑުވުން ފާޅުކޮށްފައެވެ.

އެގޮތުން އެ ބައްދަލުވުމުގައި އިދިކޮޅުން ކަންބޮޑުވުން ފާޅުކޮށްފައި ވަނީ، ހިޔާ ފްލެޓުތަކުގެ މަސައްކަތް ނިންމަން ހަވާލުކުރި ބައެއް ކުންފުނިތަކުން އޮޅުވައިލުމުގެ ސަބަބުން ހިޔާ ފްލެޓްތަކުގެ ވެރިންނަށް ލިބިފައިވާ ގެއްލުންތައް ސަރުކާރުގެ ސަމާލުކަމަށް ގެނައުމަށް މިއަދު މަޖިލީހަށް ހުށަހެޅި ކުއްލި މައްސަލައާއި މަސްކިރުން ކޮންޓްރޯލް ކުރުމަށް ނިންމި ނިންމުން ބަދަލު ކުރުމަށް ގޮވައިލައި މަޖިލީހަށް ހުށަހެޅި ކުއްލި މައްސަލަ ބޭރުކޮށްލުމާ ގުޅިގެންނެވެ.

މިއީ ސިޔާސީ ޕާޓީއަކަށް މަޖިލިސް އިދާރާގައި ނޫސްވެރިންގެ ބައްދަލުވުމެއް ބާއްވަން ފުރުސަތު ދިން ފުރަތަމަ ފަހަރެވެ.

ޕީޕީއެމް ޕީޖީއަށް މި ބައްދަލުވުން ބޭއްވުމުގެ ފުރުސަދު މަޖިލީހުން ދިނީ ސަރުކާރާ މެދު އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އޮތް ކަންބޮޑުވުމާއި ހިތްޕުޅު ހަމަޖެހިވަޑައިނުގަތުމުގެ ތެރެއިން ކަމަށް ބުނެ، ބައެއް މީހުން ދަނީ ސޯޝަލް މީޑިއާގައި ޝުއޫރު ފާޅު ކުރަމުންނެވެ.

މިކަމާ ގުޅިގެން ރައްޔިތުންގެ މަޖިލީހުގެ މީޑިއާއިން މިރޭ ވިދާޅުވީ، ޕީޕީއެމް ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމަކީ ރައްޔިތުންގެ މަޖިލީހުގައި ހިމެނޭ ހުރިހައި ޕާލަމެންޓަރީ ގްރޫޕްތަކަށް ހުޅުވައިލައިފައިވާ ފުރުސަތެއްގެ ދަށުން ބޭއްވެވި ބައްދަލުވުމެއް ކަމަށާއި ހުރިހައި ޕާލަމެންޓަރީ ގްރޫޕަކަށް އެ ފުރުސަތު އޮތްކަން ރައްޔިތުންގެ 2020ވަނަ އަހަރުގެ ތިންވަނަ ދައުރުގައި ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުގެ ރައީސް ، ރައީސް މުހައްމަދު ނަޝީދު އިއުލާނު ކުރައްވައިފައިވާ ކަމަށެވެ.