ރިޔާސީ އިންތިޚާބުން ފެއިލްކޮށްލަން ކުރާ މަސައްކަތް ފެއިލްކޮށްލާނަން:ފައްޔާޒް
މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)ގެ ޗެއަރޕަރސަން ހޮވުމަށް ބާއްވާ އިންތިޚާބުގެ ކެމްޕެއިންގައި އިމްތިޔާޒް ފަހުމީ (އިންތި)ގެ ޓީމުން ދައްކަވަމުން ގެންދަވާ ވާހަކަތަކަށް ޗެއަރޕަރސަން ކެނޑިޑޭޓް ފައްޔާޒް އިސްމާޢީލް ރައްދު ދެއްވައިފިއެވެ.
ފައްޔާޒް ޓީމުގެ"ހިންގާލަން" ޖަގަހަ ، ހުޅުމާލޭގައި ހުޅުވުމަށް ރޭ ބޭއްވި ޙަފްލާގައި ވާހަކަ ދައްކަވަމުން ފައްޔާޒު ވިދާޅުވީ ކޮންމެ ބަދުނާމެއް އެޅުވިކަމުގައި ވިޔަސް 2023ގެ ރިޔާސީ އިންތިޚާބު އެމްޑީޕީއަށް ފެއިލްކޮށްލަން ކުރާ މަސައްކަތް ފެއިލްކޮށްލައްވާނެ ކަމަށެވެ.
"އަޅުގަނޑުމެންނާ ދިމާއަށް ކޮންމެ އެއްޗެއް ކީ ކަމުގައި ވިޔަސް އަދި އަޅުގަނޑުމެންގެ ބޮލުގައި ކޮންމެ އިލްޒާމެއް އެޅުވިކަމުގައި ވިޔަސް އެ ފުރުސަތު އެއްވެސް ބަޔަކަށް ދޭކަން ނެތީން، 2023ގައި އެމްޑީޕީގެ ސަރުކާރެއް ނޯންނާނެ ގޮތަށް ކުރާ މަސައްކަތް ބޮޑުތަނުން ފެއިލްކޮށްލާނަން" ފައްޔާޒުގެ ޓީމުން މަސައްކަތް ކުރަނީ އެމްޑީޕީ ބައިބައިކޮށް 2023ގެ ރިޔާސީ އިންތިޚާބު ގެއްލުވައިލާން ކަމަށް އިމްތިޔާޒުގެ "ތިލަފަތުގެ ރަމްޒު"ޓީމުން ދައްކަވާ ވާހަކަތަކަށް ރައްދު ދެއްވައި ފައްޔާޒު ވިދާޅުވިއެވެ.
މީގެ އިތުރުން އެމްޑީޕީ ނުހިނގާކަމަށް ވިދާޅުވާ ވިދާޅުވުން ތަކުރާރު ކުރައްވައި ފައްޔާޒު ވިދާޅުވީ ޕާޓީއާއި އާންމު މެންބަރުންނާ އޮންނަ ގުޅުން ރަނގަޅުކޮށްގެން މެނުވީ ރިޔާސީ އިންތިޚާބު ކާމިޔާބުކުރެވޭނެ ކަމަށް ދެކިވަޑައިނުގަންނަވާ ކަމަށެވެ. އަދި ރިޔާސީ އިންތިޚާބު ކާމިޔާބު ކުރުމަށް އެމްޑީޕީއާއި ސަރުކާރާ ދެމެދު އޮންނަ ގުޅުން ވެސް އިތުރަށް ބަދަހިވާން ޖެހޭކަމަށް ފައްޔާޒު ވިދާޅުވިއެވެ.
އޭނާ ވިދާޅުވީ ޗެއަރޕަރސަންކަމަށް އިންތިޚާބުވެވަޑައިގެންފި ނަމަ އެމްޑީޕީގައި ކުރީގައި އޮތް ޖޯޝާއި ފޯރި އަލުން ގެންނަވާނެ ކަމަށާއި މެމްބަރުން ހަރަކާތެރިކޮށްލަވާނެ ކަމަށެވެ.
އެމްޑީޕީގެ ޗެއަރޕަރސަންއާއި އަންހެނުންގެ ރޫޙުގެ ރައީސް ހޮވުމަށް ބާއްވާ އިލެކްޝަން ތާވަލް ކުރެވިފައި ވަނީ އަންނަ މަހުގެ 14އަށެވެ.
ތިވެރިކަބްލިބުނުގޮްހަދާންއެބަހުރިތޯ