އަދުރޭގެ ރައްދެއް އިމްރާނަށް: ޝޭހު އިމްރާނެއް ނޫން, ޝޭހެއްގެ ތާޖު އަޅައިގެން ހުރި މުނާފިގެއް

އިސްލާމްދީން މަތިވެރިކުރާ ޕާޓީކަމަށް ވަކާލާތުކުރަމުންދާ ޢަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން ޢަބްދުﷲ ގެ ''ދެފުށްކެހެރި'' ކަމާއި, ''އިޔަހޫދި'' ކަމާހުރެ, ޕީއެންސީގެ ރައީސް ޢަބްދުއްރަޙީމް ޢަބްދުﷲ ވަރަށް ބޮޑަށް ނުރުހުން ފާޅުކުރައްވައިފިއެވެ.

Ads by MWSC

ޕީޕީއެމްއިން ހއ.ދިއްދޫގައި ރޭ ބޭއްވި ޖަލްސާގައި އަދުރޭ ވިދާޅުވީ 2013 އިން 2018 އަށް ހުޝިޔާރު މާލިމިއަކާއެކު [ރައީސް ޔާމީން] ފައްސިޔަ ވައިގައި ދިވެހި ޤައުމީ ނައު ދަތުރު ކުރަމުން ދިޔައީ ހިމޭން އައްސޭރިއެއް ހޯދުމަށް ކަމަށެވެ.

''ގޮސްގޮސް އޮއްވާ އޭގެތެރެއަށް ފުންމާލައިފި ބަޔަކު. ފުންމާލައިގެން ދިޔައީ ކީއްވެތޯ. ދިޔައީ އަމިއްލަ އެދުމަށްޓަކާ. ދިޔަދިޔައިނުން ގޮސް ފަޅުވެރިންނަށް އޮޅުވައިލީ.''

އަދުރޭ ވިދާޅުވި ގޮތުގައި ''އަމިއްލަ އެދުމަށްޓަކައި ފަޅުވެރިންގެ ތެރެއަށް ފުންމައިލި'' އެއް ބޭފުޅަކީ ހޯމް މިނިސްޓަރު އިމްރާނެވެ.

''ތިޔަބޭފުޅުންނަށް ފެނިވަޑައިގަންނަވާނެ މި ޝޭހު އިމްރާނެކޭ ކިޔާ މުނާފިގު ކަލޭގެ ދެއްކި ވާހަކަ [ރައީސް ޞާލިޙް ވެރިކަމަށް ގެންނަން] . ޝޭހު އިމްރާނެއް ނޫން. މުނާފިގު އިމްރާން ނިކުމެ ބުނީ ކޮންވާހަކައެއްތޯ ދެއްކީ. ކަރުދާސްތަކެއް ދައްކަވާފައި ބުނީ މިހިރީ ޑރ.އަފްރާޝީމް އަވަހާރަކޮށްލިކަމުގެ ހެއްކޭ''

އަދުރޭ ވިދާޅުވީ ރައްޔިތުންގެ ކުރިމަތީ އެފަދަ ވާހަކަތައް ދައްކަވައި އިމްރާން ރައީސް ޔާމީންގެ އިސްތަށިފުޅުގައި އިލްޒާމް އަޅުވާފައިވާ ކަމަށެވެ. އަދި އޭނާ ދެއްކެވި ވާހަކަތަކަކީ ތެދެއްނަމަ އެކަން ސާބިތުކޮށްދެއްވަންޖެހޭ ކަމަށާއި, ނުކޮށްދެއްވެވިއްޖެނަމަ ޖަލަށްލާންޖެހޭ ކަމަށް އަދުރޭ ވިދާޅުވިއެވެ.

ނޫސްވެރިޔާ އަޙްމަދު ރިޟްވާންގެ މައްސަލައާއި ދީނީ ޢިލްމުވެރިޔާ ޑރ.އަފްރާޝީމް ޢަލީ މަރުގެ މައްސަލައާ ރައީސް ޔާމީނާ ގުޅުވައި އިމްރާން ކަރުދާސްތަކެއް ދެއްކެވީ, ރައީސް ޔާމިނުގެ ސަރުކާރާއި ދެކޮޅަށް 2015 ވަނަ އަަހަރު ބޭއްވި މޭޑޭ މުޒާހަރާގެތެރެއިންނެވެ.

އިމްރާން ފަހުން ވިދާޅުވީ އެ ދުވަހުގައި އެއްވެސް ބޭފުޅަކަށް ތުހުމަތުކުރައްވައި ވާހަކަދައްކަވާފައި ނުވާނެ ކަމަށާއި, ހަމައެކަނި ވިދާޅުވެފައިވާނީ ރިޟްވާނާއި, ޑރ.އަފްރާޝީމްގެ މައްސަލައަށް ވީ ގޮތް އޭރުގެ ވެރިންނަށް އެނގިވަޑައިގަންނަވާނެ ވާހަކަ ކަމަށެވެ. އަދި އެ ދުވަހުގައި ދެއްކެވި ކަރުދާސްތަކަކީ އޭގެ އަސްލެއް ނޫން ކަމަށާއި, އޭގެ އަސްލު ވާންޖެހޭ ތަނެއްގައި ވާނެކަމަށް ވެސް އިމްރާން ފަހުން ވިދާޅުވިއެވެ.

''މިކަހަލަ މަރުމޯލުން މި ޤައުމުގައި މިނިސްޓަރުންނަށް މި ތިބީ. މިއަށްވުރެ ބޮޑު މުނާފިގެއް އެބަހުރިތޯ. ޝޭހެއްގެ ތާޖު އަޅައިގެން އެހުރީ.'' އިމްރާން ފަހުން ދެއްކެވި ވާހަކަތަކާ ގުޅިގެން ވަރަށް ބޮޑަށް ނުރުހުން ފާޅުކުރައްވައި އަދުރޭ ވިދާޅުވިއެވެ.