ނަޝީދު ފެކްޝަނުގެ ފަސް މެންބަރަކު ޞާލިޙާ އެއްކޮޅަށް އަރައިފި

ސަރުކާރުން ބޭނުންވި ގޮތަށް ޓެކްސް ބޮޑުކުރަން ރައީސް މުޙައްމަދު ނަޝީދު ފެކްޝަނުގެ ފަސް މެންބަރަކު ވޯޓު ދެއްވައިފިއެވެ.

Ads by Sosun Fihaara

ސަރުކާރުން ހުށަހަޅާފައިވަނީ އަންނަ ޖަނަވަރީން ފެށިގެން ޖީއެސްޓީ %6 އިން %8 އަށް އަދި ޓީޖީއެސްޓީ %8 އިން %16 އަށް ބޮޑު ކުރުމަށެވެ.

މުޅި މަޖިލީހުގެ ކޮމިޓީން މިއަދު ވަނީ އެ ބިލު ފާސްކޮށްފައެވެ.

ބިލު ފާސްކުރަން ވޯޓުދެއްވި މެންބަރުންގެ ތެރޭގައި ފޮނަދޫ ދާއިރާގެ މެންބަރު މޫސާ ސިރާޖާއި, ބިލެތްދޫ ދާއިރާގެ މެންބަރު އަޙްމަދު ޙަލީމާއި, ތޮއްޑޫ ދާއިރާގެ މެންބަރު ޙަސަން ޝިޔާން އާއި, ގަލޮޅު ދެކުނު ދާއިރާގެ މެންބަރު މީކާއީލް ނަސީމާއި, އިނގުރައިދޫ ދާއިރާގެ މެންބަރު ޙަސަން އަޙްމަދު ހިމެނެއެވެ. މި ފަސް މެންބަރުންނަކީ ވެސް ނަޝީދަށް ތާއީދުކުރައްވާ މެންބަރުންނެވެ.

ނަމަވެސް ބިލާ ދެކޮޅަށް ތަޅުމުގައި ވަރަށް ގަދަޔަށް ބަހުސްކުރެއްވި މާފަންނު މެދު ދާއިރާގެ މެންބަރު މުޙައްމަދު ރަޝީދު (ބޮންޑޭ) ބިލު ފާސްކުރުމާ ގުޅޭގޮތުން ވަކި ކޮޅަކަށް ވޯޓުދެއްވައިފައެއް ނުވެއެވެ.

ބައެއް މެންބަރުން ހުށަހެޅުއްވި އިސްލާހުތައް ބޭރުކޮށްލުމަށްފަހު ސަރުކާރުން ފޮނުވި ގޮތަށް ބިލު ފާސްކުރަން ރިޔާސަތުން ވޯޓަށް އެހުމުން އެކަމަށް ތާއީދުކުރައްވައި 50 މެންބަރުން ވޯޓު ދެއްވިއިރު, ނުފެންނަކަމަށް ވޯޓު ދެއްވީ 19 މެންބަރުންނެވެ.