އެމްޑީޕީގެ ބައެއް މެމްބަރުން އަނެއް މެމްބަރުންނަށް: އިތުބާރު ނެތްކަމުގެ ވޯޓެއް ނަގަން ޖެހޭ ސަބަބެއް ނެތް

އިކޮނޮމިކް މިނިސްޓަރ ފައްޔާޒު އިސްމާއީލްއާއި ދެކޮޅަށް އެމްޑީޕީގެ ބައެއް މަޖިލިސް މެމްބަރުން އިސްވެ ހުށަހެޅުމަށް ތައްޔާރުވަމުންދާ އިތުބާރު ނެތް ކަމުގެ މައްސަލައާއި ގުޅޭގޮތުން އެޕާޓީގެ ބައެއް މެމްބަރުން ވާހަކަފުޅު ދައްކަވައިފިއެވެ.

Ads by Sosun Fihaara

އިކޮނޮމިކް މިނިސްޓަރ ފައްޔާޒު އިސްމާއިލްގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހަށް ވެއްދުމަށް މެންބަރުންގެ ސޮއި ހޯދުމުގެ މަސައްކަތް މިއަދު ކޮށްފައިވާއިރު، އޭގައި އެންމެ ފުރަތަމަ ސޮއި ކޮށްފައިވަނީ ވެސް ރައްޔިތުންގެ މަޖިލީހުގެ ރައީސް , ރައީސް މުޙައްމަދު ނަޝީދެވެ.

އެގޮތުން މިނިސްޓަރ ފައްޔާޒުގެ މައްސަލައެއް މަޖިލީހަށް ވެއްދުމަށް މަސައްކަތް ކުރަމުންދާ ކަމަށާއި ރައީސް ނަޝީދު އޭގައި ސޮއި ކުރެއްވި ކަމަށް އެމްޑީޕީގެ މަޖިލިސް މެންބަރުންތަކެއް ވަނީ އޮންލައިން ނޫހަކަށް މައުލޫމާތު ދެއްވާފައެވެ.

މިނިސްޓަރ ފައްޔާޒުގެ އިތުބާރު ނެތްކަމުގެ މައްސަލަ ބެލުމަށް އެމްޑީޕީގެ ބައެއް މެންބަރުން ތައްޔާރު ވަމުންދާއިރު، އެޕާޓީގެ އެހެން ބައެއް މެންބަރުން ވިދާޅުވެފައިވަނީ މިނިސްޓަރ ފައްޔާޒުގެ އިތުބާރު ނެތްކަމުގެ ވޯޓެއް ނަަގަންޖެހޭ ސަބަބެއް ނެތް ކަމަށެވެ.

އެގޮތުން މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމްް ކުރެއްވި ޓްވީޓެއްގައި ވިދާޅުވީ މިނިސްޓަރ ފައްޔާޒަކީ މިސަރުކާރުގެ އެންމެ ހީވާގި އެއް ވަޒީރު ކަމަށެވެ.

"އަޅުގަނޑު ފުރިހަމަ އިތުބާރު ފައްޔާ އަށް އެބައޮތް" ރޮޒެއިނާ ވިދާޅުވެފައިވެއެވެ.

އެމްޕީ ރޮޒެއިނާގެ އިތުރުން މަޖިލިހުގެ މާފަންނު އުތުރު ދާއިރާގެ މެންބަރު މުޙައްމަދު ފަލާޙް ވެސް ވިދާޅުވީ މިނިސްޓަރ ފައްޔާޒަށް އެމަނިކުފާނުގެ އިތުބާރު އޮންނާނެ ކަމަށެވެ.

މިދެމެންބަރުންގެ އިތުރުން ތިނަދޫ އުތުރު ދާއިރާގެ މެންބަރު އަބްދުލް މުޤްނީ ވިދާޅުވީ އިކޮނޮމިކް މިނިސްޓަރ ފައްޔާޒުގެ އިތުބާރު ނެތްކަމަށް ނަގަންޖެހޭ ސަބަބެއް ނެތްް ކަމަށާއި މުގްނީގެ ފުރިހަމަ އިތުބާރު ވެސް މިނިސްޓަރަށް އޮތް ކަމަށެވެ.

މީގެއިތުރުން އިހަވަންދޫ ދާއިރާގެ މެންބަރު މުޙައްމަދު ޝިފާއު ވެސް މިކަމާއި ގުޅޭގޮތުން ވިދާޅުވީ މިސަރުކާރަށާއި މިސަރުކާރުގެ އިކޮނޮމިކް މިނިސްޓަރ ފައްޔާޒު އިސްމާއިލަށް ޝިފާއުގެ ފުރިހަމަ އިތުބާރު އެބައޮތް ކަމަށެވެ. އަދި އިހަވަންދޫ ދާއިރާގެ މެންބަރު ވަނީ މިނިސްޓަރ ފައްޔާޒުގެ ކުރައްވަމުން ގެންދަވާ މަސައްކަތް ފާހަގަކޮށް ޝުކުރުވެސް އަދާ ކުރަައްވާފައެވެ.