ކޮވިޑް-19: ހިތަދޫއިން ފައްސިވީ މީހާ މިހާރު ނައްސި ވެއްޖެ
އައްޑޫ ސިޓީ ހިތަދޫއިން ކޮވިޑަށް ފައްސިވީ މީހާގެ ދެވަނަ ސާމްޕަލް ނައްސި ވެއްޖެއެވެ.
ހިތަދޫ ހޯމް ކަރަންޓީނުގައި ހުރި އުމުރުން 21 އަހަރުގެ އަންހެނަކު ކޮވިޑަށް ފައްސި ވެފައިވާކަން އެޗްއޯސީން ހާމަ ކޮށްފައިވަނީ މިދިޔަ ހޯމަ ދުވަހުގައެވެ.
ނަމަވެސް އެޗްއީއޯސީ ގެ ޑެޕިއުޓީ ޑިރެކްޓަރ ޖެނެރަލް ތަސްލީމާ އުޘްމާނު މިއަދު މައުލޫމާތު ދީފައިވާ ގޮތުގައި އައްޑޫ ހޮސްޕިޓަލުން އެމީހާގެ ދެވަނަ ޓެސްޓެއް ހެދިއިރު، ނަތީޖާ ނައްސިއެވެ. އެކަން ޔަގީން ކުރުމުގެ ގޮތުން އައިޖީއެމްއެޗުން ޓެސްޓު ހެދިކަމަށާއި އޭގެ ނަތީޖާވެސް ނައްސި ކަމަށް ތަސްލީމާ ވިދާޅުވިއެވެ.
އެހެންކަމުން އައްޑޫއިން ފައްސިވީ މީހާއަކީ "ފޯލްސް ޕޮޒިޓިވް ކޭސް" އެއް ކަމުގައި މިހާރު ވަނީ ނިންމާފައެވެ.
އެމީހާ މިހާރު މިބައްޔަށް ނައްސިވުމުން، ކޮވިޑަށް މިހާރު އައްޑޫ ސިޓީން ފައްސި ވެފައިތިބީ ތިން ކޭސް އެކެވެ. އެއީ ހިތަދޫއިން ދެ މީހަކާއި ފޭދޫއިން އެކަކެވެ. މިއެންމެންވެސް ތިބީ ހޯމް ކަރަންޓީނުގައެވެ.
ރާއްޖޭގައި ކޮވިޑް-19 ހަލުވި ކަމާއެކު ފެތުރެމުން އަންނައިރު އަތޮޅުތެރެއަށް ވެސް މިބަލި މިހާރު ވަނީ ފެތުރިފައެވެ.
