އިންތިޒާރު މިކުރަނީ ލޯބިވާ ދަރިން އަލުން ފެންނާނެ ވަގުތަކަށް: ކަރަންޓީނު ފެސިލިޓީއެއްގައި ހުރި ނަރުހެއް
މިއަހަރަކީ ހަމަ ޔަގީނުން ވެސް އަހަރެމެން އެންމެންނަށް ވެސް ވަރަށް ތަފާތު ވަރަށް ދަތި އުނދަގޫ އަހަރެކެވެ. އެއްބަޔަކު މިއަހަރުގެ ފެށުން ނުހަނު އުފަލާއެކު ފާހަގަ ކޮށްފައިވީ ނަމަވެސް ފުރަތަމަ ދެ މަހުން ފެށިގެން މުޅި މިއަހަރުގެ ވަށްޓަފާޅި މިވަނީ ބަދަލުވެފައެވެ. ކޮރޯނާ ވައިރަސްގެ ނުރައްކަލުން ޖާނު ސަލާމަތްކުރުން ނޫން ގޮތެއް ނެތެވެ.
ޖާނު ސަލާމަތްކުރުމަށް އެއް ބަޔަކު އާއިލާއާއެކު ގޭބަންދުގައި ތިބިއިރު އަނެއް ބަޔަކު ދަނީ މި ބައްޔާއި ދެކޮޅަށް ކުރެވޭ ހަނގުރާމާގައި ޖިހާދުވަމުންނެވެ. ފުރާނަޔަށް ނުބަލައި ޤައުމީ މި ޚިދުމަތުގައި ސަފުތައް ރުކުރުވާލާފައިވަނީ ކެރޭ ކުޅަދާނަ ބަޠަލުންނާއެކުގައެވެ.
އެފަދަ އެއްބަޔަކީ ކޮވިޑްގެ ބަލިހާލަތު ތަޙައްމަލު ކުރަމުންދާ މީހުންނަށް ސިއްޙީ ޚިދުމަތް ފޯރުކޮށްދިނުމުގައި އަވަދިނެތި އުޅޭ ނަރުހުންނެވެ. އާއިލާއާއި ވަކިން، ދަރިންކޮޅު ނުފެނި މި ޙާލަތުން ޤައުމު ސަލާމަތް ކުރުމަށް ހިތްވަރާއެކު މަސައްކަތް ކުރާ ކޮންމެ ބޭފުޅަކު ވެސް އަމިއްލަ ދިރިއުޅުމާއި މެދު ނުވިސްނަނީކީ އެއް ނޫނެވެ. ނަމަވެސް ޤައުމު އިސްކޮށް ރައްޔިތުންގެ ރައްކާތެރިކަން އިސްކުރަނީއެވެ.
މިއީ ވެސް އެފަދައިން އަމިއްލަ އާއިލާއާއި ދަރީންނާއި ދުރުގައި ޤައުމީ ޚިދުމަތުގައި ހުރި ނަރުހެއްގެ ވާހަކައެވެ. މަންމަ އެއްގެ ވާހަކައެވެ. އަތްބެއްގެ ވާހަކައެވެ.
ނަން ހާމަ ނުކުރުމަށް އެދި "ދެން" އަށް އޭނާގެ ވާހަކަ ހިއްސާ ކުރަމުން އެނަރުސް ކުއްޖާ ބުނީ އޭނާ މަސައްކަތް ކުރަނީ ބ. އަތޮޅު ރޯޔަލް އައިސޮލޭޝަން ފެސިލިޓީގައި ކަމަށެވެ. އާއިލާއާއި ދުރުގައި މަސައްކަތް ކުރާތާ މިހާރު 18 ދުވަސް ވެއްޖެއެވެ.
އާއިލާއާއި ދަރިންނާއި ދުރުގައި، އެންމެ ދުވަހެއް ހޭދަކުރުމަކީ ވެސް ހިތަށް އުނދަގޫ ކަމަކަށް ވާއިރު، ކޮންމެ ދުވަހެއް ނިމިގެންދަނީ އެ ހަނދާންތަކާ އެކުގައި ކަމަށް އޭނާ ކިޔައިދިނެވެ.
"އަޅުގަނޑުގެ ތިން އަންހެން ދަރިން ތިބޭ. އެއީ އުމުރުން 9 އަހަރުގެ ކުއްޖަކާއި، 7 އަހަރުގެ ކުއްޖަކާއި 6 އަހަރުގެ ކުއްޖެއް. އެކުދިން ނުފެންނަތާ މިހާރު 18 ދުވަސް ވެއްޖެ" އެނަރުސް ކުއްޖާ ބުންޏެވެ.
މިވީ 18 ދުވަހުގެ ތެރޭގައި އޭނާއަށް ހަމައެކަނި ފެނިފައިވަނީ އޭނާގެ ފިރިމީހާއެވެ.
ފިރިމީހާ އޭނާ ދެކެ ވަރަށް ލޯބިވާ ކަމަށާއި، ފިރިމީހާ އޭނާ ދެކިލަން އަންނަނީ ކިހިނެއްކަން އޭނާ ހިއްސާކޮށް ދިނެވެ. އަސަރާއި ޖަޒުބާތާއި އެކުގައެވެ. ނަމަވެސް ހަގީގީ ލޯބި އެ ވާހަކަތަކުން މަންޒަރުވެގެން ދިޔައެވެ.
ދުވާލުގެ ވަގުތުގައި ޑިއުޓީ އަދާކޮށް ވަރުބަލި ކަންމަތީގައި ދަރިންގެ ފިކުރާއި އާއިލާގެ ފިކުރުގައި އިންނައިރު ހިތަށް ތަސައްލީއެއް ގެނެސްދެނީ އޭނާގެ ފިރިމީހާއެވެ. ޑިންގީއެއްގައި އެ ރިސޯޓު ކައިރިޔަށް އައިސް ފެނިލާ ގޮވާލާ، ސަމާސާކޮ ށްލުމަށްފަހު ފިރިމީހާ ދާ ވާހަކަ އޭނާ ކިޔައި ދިނީ އުފަލުން ރޮވިފަ އިނދެއެވެ.
"ފިރިމީހާ ބައެއް ފަހަރު ދާނެ ޑިންގީ ގައި މަހަށް. އެގޮތަށް ދެތިން ފަހަރަކު މަހަށް ދިޔަ ފަހަރަކު މިތަނާއި އޭނަ ކައިރިކޮށްލީ ދެކިލަން ވެގެން. ދުރުން ފެނުނީ. މިކޮޅަށް އައިފަހުން އަދި ދަރިން ނުދެކެން" އެދުވަސްތަކުގައި ފިރިމީހާ އެކަނި ފެނުމުން ވެސް އުފާކޮށް ޝުކުރު ކުރަމުން އޭނާ ބުންޏެވެ.
ތިމާގެ ދަރިން ނުފެނި އެންމެ ދުވަހެއް ވެސް ވުމަކީ ހަގީގަތުގައި މައިލަނގޮޑިއަށް ކެތްވާނެވަރުގެ ކަމެއް ނޫނެވެ. ނަމަވެސް ޤައުމަށްޓަކައި މިނަރުސް އަންނަނީ އެކަމަށް ކެތްކުރަމުން، ދަރިން ފެންނާނެ ދުވަހަކަށް އިންތިޒާރު ކުރަމުންނެވެ. އަދި އެއިންތިޒާރު އޭނާގެ ދަރިން ވެސް އަންނަނީ ކުރަމުންނެވެ.
"ކޮންމެ ދުވަހަކު ވެސް ދަރިން އަހާ މަންމަ ކޮންއިރަކުންހޭ އަންނާނީ. ބުނެޔޭ މާދަމާ އޭ. މާދަމާ ދެން ހަގީގަތުގައި ވެސް ދެވޭތޯ މިބަލަނީ. ރިލީސް ވެސް ލިބިއްޖެ އަޅުގަނޑުގެ ސާމްޕަލްވެސް މިހާރު ނަގައިފި. ނަތީޖާވެސް ލިބިއްޖެ." ނަރުސް ކުއްޖާ ބުންޏެވެ.
އިރާދަކުރެއްވިއްޔާ މާދަމާ ވެގެންދާނީ 18 ދުވަހުގެ ދިގު ވަގުތު ތަކަކަށްފަހު އާއިލާއެއް އަލުން ބައްދަލުވާނެ އުފާވެރި ދުވަހަކަށެވެ. އެހެނަސް އަނެއްކާވެސް ޤައުމީ ޚިދުމަތަށް ގޮވާލައިފިނަމަ ފަސްނުޖެހޭނެ ކަމަށް ވެސް އޭނާ ބުންޏެވެ.
ދެންް ވިސްނާލާ ރިސޯޓު މުއައްޒަފުން އުޅޭނެ ހާލު.
އަމިއްލަ ރަށް ނޫން އެހެން ތަންތާ މަސައްކަތްކުރާ މީހުންވެސް ހަމަ އެފަދަ. އަލްހަމްދުލިއްﷲ ތިބާއަށް ތިބާގެ ޢާއިލާއާ ދިމާވެލައްވާތީ
18 ދުވަސް. ޢަޅުގަނޑުގެ ފިރިމީހާއަކީ އެމް އެން ޑީ އެފް މީހެއް އާއިލާ އާއި ދުރުގަ ހުންނަތާ 6 މަސް ވަނީ
އަޅުގަނޑު ފިރިމީހާ އަކީވެސް އެމްއެންޑީއެ ގަ މަސައްކަތް ކުރާ ފަރާތެއް ލޮލައް ނުފެނި 6 މަސް ކީއްކުރަން އަހަރުވަން ދެންވެސް ހުރޭ !ބަލިވެ އަނީސުރެ ވިހަން ހޮސްޕިޓަލައް ގެންދާ ފަހުން އާދެވެނީ މިހާލުގަވެސް ކުޑަކުޑަ 2 ކުދިން ގޮވާގެން މިއުޅެނީ އަދި ވިޒީފާއަ ދަމުން!