ތާއަބަދު ވެރިކަން ބޭނުންވެގެން އުޅުމަކީ ކަންބޮޑުވާންޖެހޭ ވަރު ކަމެއް: ރައީސް ނަޝީދު
ތާއަބަދު ވެރިކަން ބޭނުންވެގެން އުޅުމަކީ ކަންބޮޑުވާންޖެހޭ ވަރު ކަމެއްކަމަށް ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ބ. ތުޅާދޫގައި ދަ ޑިމޮކްރެޓްސް އިން މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެގޮތުން ހަމައެކަނި ދެވަނަ ދައުރެއް ހޯދުމަށްޓަކާ އެހެން ޕާޓީތަކުން ކުރާ މަސައްކަތް ފެނުމުން ކަންބޮޑުވާ ކަމަށާއި ވެރިކަމަށްޓަކާ ކުރާ އެއްވެސް ކަމެއްގައި އެމަނިކުފާނަށް ބައިވެރިނުވެވޭނެ ކަމަށް ރައީސް ނަޝީދު ވިދާޅުވިއެވެ.
އަދި އަބަދު ވެރިކަން ހޯދުން އަމާޒަކަށް ނުވަތަ މަޤްސަދަކަށް ހަދައިފިކަމަށްވާނަމަ އެއީ ކަންބޮޑުވުން އޮތް ކަމެއް ކަމަށްވެސް އެމަނިކުފާނު ފާހަގަކުރެއްވިއެވެ.
"އެއްވެސް މީހެއް ތާ އަބަދު ބޭނުންވެގެން އުޅޭ ކަމަކީ ވެރިކަން ކަމަށް ވެއްޖެ ނަމަ އެއީ ވަރަށް ބޮޑު ކަންބޮޑުވުމެއް،" ރައީސް ނަޝީދު ވިދާޅުވި އެވެ.
ޑިމޮކްރެޓްސްގެ އަމާޒަކީ ރައްޔިތުންގެ ލާބައާއި މަންފާ އަށް މަސައްކަތް ކުރުން ކަމަށާއި އެމަނިކުފާނުގެ މުޅި ހަޔާތް ހޭދަކުރެއްވީ އެކަމުގައި ކަމަށް ފާހަގަކުރައްވަމުން ރައީސް ނަޝީދު ވިދާޅުވީ، ޑިމޮކްރެޓުންނަކީ ވިސްނުންތެރިކަމާ އެކީގައި ރާއްޖޭގެ ވެރިކަން ވަރަށް ރަނގަޅަށް ހިންގޭނެ ބައެއް ކަމަށާއި، ޑިމޮކްރެޓުންނަކީ ސިޔާސަތުތަކެއް އެކުލަވާލާނެ ބައެއް ކަމަށެވެ.
މީގެ އިތުރުން، ދެވަނަ ދައުރެއްގެ ބޭނުމުގައި ކޮންމެ ފަދަ ކަމެއް ވެސް ކުރުމަކީ ރާއްޖެ އަށް ރަނގަޅު ގޮތެއް ނޫން ކަމަށްވެސް އެމަނިކުފާނުގެ ވާހަކަފުޅުގައި ފާހަގަކޮށްފައިވެއެވެ.
ކުރިއަށް އޮތް ރިޔާސީ އިންތިޚާބުގައި ދަ ޑިމޮކްރެޓްސްއިން ވާދަކުރައްވާނެ ކެންޑިޑޭޓޭއް ނިންމާފައިނުވާއިރު، ކެންޑިޑޭޓެއް ކަނޑައެޅުމަށް އެ ޕާޓީން ވަރަށް އަވަހަށް ޕްރައިމަރީއަށް ހުޅުވާލާނެކަމަށް މަޢުލޫމާތު ދީފައިވެއެވެ.
ތިވާހަކަ ދައްކާ މީހާއަކީ ތީކަމުގެ އެންމެ ކުރީގަ ހުރިމީހާ، ހަމަރަނގަޅަށް އަމިއްލަޔަށް ތިޔަބޭޒާރުވަނީ