ސަރުކާރަށް ނޫނެކޭ ބުނެ ބޮޑު ބަދަލެއް ގެންނަން އެބަ ޖެހޭ: ނާޒިމް

ސަރުކާރަށް ނޫނެކޭ ބުނެ، ބޮޑު ބަދަލެއް ގެންނަންޖެހޭ ކަމަށާއި، ރައްޔިތުން ބޭނުންވާފަދަ ތަރައްޤީ ގެނެވޭނެ މީހަކު ހޯދަން ޖެހޭކަމަށް މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރިޔާސީ ކެނޑިޑޭޓް މުޙައްމަދު ނާޒިމް ވިދާޅުވެއްޖެއެވެ.

Ads by STELCO

ބ. ދަރަވަންދޫގައި ކުރިއަށްގެންދިޔަ އުޖާލާޒަމާން ޖަލްސާގައި ވާހަކަދައްކަވަމުން ދަނގެތީ ދާއިރާގެ މެންބަރުކަންވެސް ކުރައްވަމުން ގެންދަވާ ނާޒިމް ވަނީ މި ސަރަހައްދުގައި މިހާ މަތީ ފެންވަރުގެ ރިސޯޓުތައް އޮތް އޮތްއިރު، މި ސަރަހައްދަށާއި މި އަތޮޅަށާއި އަދި ދަރަވަންދޫއަށް ހައްޤު މިންވަރަކީ މީއީތޯ ސުވާލު ކުރައްވާފައެވެ.

"އަޅުގަނޑަށް ރާއްޖޭގެ ވަރަށް ގިނަ ރަށްތަކަށް ދެވިއްޖެ. އަޅުގަނޑު ހަމަ ކޮންމެ ގައަކަށް ވަދެ ބަލާލާއިރުގައި މި ފެންނަނީ 9 މީހުން 10 މީހުން ކޮޓަރިއެއްގައި އުޅޭ މަންޒަރު، މިރަށް އައިސް މިއަދު ގެއަކަށް ދެވުނުއިރުވެސް ފެނުނީ ހިތާމަވެރި މަންޒަރެއް، ބޮޑެތި އާއިލާތައް ދިރިއުޅެމުން މި ދަނީ ވަރަށް ކުދި ތަންތަންކޮޅުގައި.".

ނާޒިމް ވިދާޅުވީ އާއިއާއެއް އެއްކޮށް އެއްމާޙައުލެއްގައި ދިރިއުޅުމަކީ ރަނގަޅުކަމެއް ކަމަށެވެ. ނަމަވެސް، އޭގެ ސަބަބުން އެތަކެއް އިޖްތިމާޢީ މައްސަލަތައް ކުރިމަތިވާކަމަށާއި އެކަންތައްތަކަށް ބަލަންޖެހޭނެކަމަށެވެ.

"މިހާތަނަށް ދިޔައިރު، އިޖްތިމާއީ ބޮޑެތި މައްސަލަތައް ދިމާވީ ކިހިނެއްވެގެންތޯ ދެނެގަންނަން އެބަ ޖެހޭ، އެކަން ދިމާވި ސަބަބުތަކަކީ ސަރުކާރުތަކުން ގެންނަން ޖެހޭ ތަރައްގީ ގެނައުމުގައި ފަސްޖެހިފައި ވާތީ."

ދަރަވަންދޫ ރައްޔިތުންނާ ވާހަކަ ދައްކަވަމުން ނާޒިމް ވިދާޅުވީ އެމްއެންޕީ ޕާޓީ އުފެއްދެވީ ދިވެހިންނަކީ ފުދުންތެރި ބަޔަކަށް ހަދަން ކަމަށާއި، ދިވެހިންގެ ޖީބުތައް ފުރާލަން ކަމަށެވެ. އަދި ދިވެހިން މިއަދު ތިބި ނިކަމެތިކަމުން އެ މީހުން ސަލާމަތް ކުރައްވަން ކަމަށްވެސް ނާޒިމް ވިދާޅުވިއެވެ.

ބ އަތޮޅަށް ކުރައްވަމުން ގެންދަވާ ކެންޕޭން ދަތުރުގައި ބ އަތޮޅުގެ އެކި ރަށްރަށަށް ވަޑައިގެން އެރަށްރަށުގެ ހާލަތު ފެނުމުން ދެރަވާކަމަށް ވިދާޅުވަމުން ނާޒިމް އިތުރަށް ވިދާޅުވީ ސަރުކާރުން ކޮންމެ ފަހަރަކު ރައްޔިތުން ގުބޯ ހައްދާފައި ތިބޭ ތިބުމަށް ނޫނެކޭ ބުނަން ޖެހޭކަމަށެވެ.

"ވަށައިގެން 17 ރިސޯޓް އޮތް ތަނެއްގައި މިފަދަ ހާލުގައިތޯ ތިބޭފުޅުން ތިބެންވީ، ތިބޭފުޅުން އެބަ ޖެހޭ ތެދުވެވަޑައިގަންނަވަން. ސަރުކާރަށް ނޫނެކޭ ބުނެ ބޮޑު ބަދަލެއް ގެންނަން އެބަ ޖެހޭ، ތި ބޭފުޅުންނަށް ތަރައްގީ ގެނޭވެނެ މީހަކު ހޯދަން އެބަ ޖެހޭ. ތިބޭފުޅުން ވިސްނަން އެބަޖެހޭ.". ނާޒިމް ވިދާޅުވިއެވެ.

"މިއަދު އަނެއްކާވެސް މި އަންނަނީ އެ ފުރުސަތު، ނުވައެއް ސެޕްޓެމްބަރަކީ އަނެއްކާވެސް ތިބޭފުޅުންނަށް ނޫނެކޭ ބުނަން ފުރުސަތެއް، ތިބޭފުޅުން އެގޮތަށް ތިބެންވީތޯ ނޫންތޯ ކަނޑައަޅަންވީ ދުވަސް.".

މީގެ އިތުރުން ނާޒިމް ވަނީ އެމްއެންޕީ ގެ ވެރިކަމެއްގައި ކުދި އަދި މެދު ފަންތީގެ ވިޔަފާރިތައް އާލާކުރާނެކަމަށާއި ރަށްރަށުގައި ގިނަ އަދަދެއްގެ ވަޒީފާ އުފައްދައި، އެޕާޓީގެ ޕްލޭނާއި އެއްގޮތަށް މަސައްކަތްތައް ކުރިއަށް ގެންދާނޭކަމަށް ވިދާޅުވެފައެވެ.