ރައީސް ޔާމީނަށް މިހާރު ހުންނާނީ ވެރިކަން ކުރެވިފަ: ޤާސިމް

ކުރީގެ ރައީސް ޔާމިން ޢަބްދުލްޤައްޔޫމްގެ ވެރިކަމުގައި އެތައް ބަޔަކު ނުޙައްޤުން ޖަލަށްލާފައިވާކަމަށާއި މިހާރު ޖަލު ޙުކުމެއްގައި ހުންނެވީތީ، ރައީސް ޔާމީނަށް ގޮންޖައްސަވައި މިހާރު ހުންނާނީ ވެރިކަން ކުރެވިފައިކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެނޑިޑޭޓް ޤާސިމް އިބްރާހިމް ވިދާޅުވެއްޖެއެވެ.

Ads by Sosun Fihaara

ޤާސިމް މިހެން ވިދާޅުވީ ތިނަދޫ ސިޓީގައި ރޭ ބޭއްވި ކެންޕެއިން ޖަލްސާގައި އެރަށުގެ ރައްޔިތުންނާ ބައްދަލުކޮށް ވާހަކަ ދައްކަވަމުންނެވެ.

"ކިރިޔާވެސް ވާހަކަ ދައްކާލެވޭ މީހަކު ވިއްޔާ ޖަލަށް! ޖަލަށް! ހުންނާނީ ވެރިކަން ކުރެވިފައި! މިހާރު ވެރިކަންކުރައްވަން އޭނީ! އަނިޔާވެރިވީމާ ވާނީ އެހެން!" ޤާސިމް ވިދާޅުވިއެވެ.

ރައީސް ޔާމީނުގެ ވެރިކަމުގައި ސިޔާސީ އެކި ބޭފުޅުން ނުޙައްގުން ޖަލަށްލާކަމަށާއި ވެރިކަމަށް ޝައުޤުވެރިކަން ފާޅުކުރާ ކޮންމެ މީހަކުވެސް ލަނީ ޖަލަށްކަމަށް ޤާސިމް ވަނީ ވިދާޅުވެފައެވެ. މީގެ ތެރޭގައި ރައީސް ޔާމިނަށް ކިޔަވައިދީ، ވަޒީފާދީ، ސިޔާސީ ދާއިރާއަށް ނެރެދެއްވި ކުރީގެ ރައީސް މަޢުމޫން ޢަބްދުލްޤައްޔޫމްވެސް ޖަލަށްލީކަމަށް ޤާސިމް ވިދާޅުވިއެވެ.

"...ވެރިކަމަށް އަންނަން ހިތުލީ މީހަކުވެސް ވިއްޔާ ޖަލަށް، ޖަލަށްލާން ބޭނުންނުވާ އެއްވެސް މީހަކު ނެތް، 30 އަހަރު ވެރިކަންކޮށްދީ، އަމިއްލައަށް ކިޔަވާދީ، ބޭބޭފުޅު، ރައީސް މަޢުމޫން، 30 އަހަރު ދުވަސް ވަންދެން ވެރިކަން ކުރެއްވި ބޭފުޅެއް، އުމުރުފުޅުން 80 އަހަރު ވީއިރު، ޔާމިން ޢަބްދުލްޤައްޔޫމް ވެރިކަމަށް ގެނެސް ބޭންދީމާ ކަންތައް ކުރިގޮތް އަޅުގަނޑުމެންނަށް މިހިރީ ފެންނަން"

ޤާސިމް ވިދާޅުވީ ރައީސް ޔާމިންއަށް ކިޔަވައިދެއްވާ، މިނިސްޓަރުކަން ދެއްވައި، ސިޔާސީ ޕާޓީ ހައްދަވައިދެއްވާ، އެބުރުގެ ވެރިކަމަށް ކުރިމަތިލައްވައިގެން ދެވަނަ ބުރަށް ދިޔަފަހުން އެމަނިކުފާނު އަރިހަށް ތާއީދު ހޯއްދެވުމަށް ރައީސް މަޢުމޫނު ވަޑައިގެންނެވިކަމަށެވެ. ނަމަވެސް ރައީސް ޔާމީން ވެރިކަމަށް ހޮވިވަޑައިގެންނެވި ފަހުން ރައީސް މަޢުމޫން އުމުރުން 80 އަހަރުގައި އެއަހަރުގެ ރަމަޟާން މަހުގެ ތެރޭގައި ގެންގޮސްލީ ޖަލަށްކަމަށް އެމަނިކުފާނު ވިދާޅުވިއެވެ.

ޤާސިމްއާއެކު ޖަލްސާގައި އިންނެވި ބޭފުޅުންނަށް އިޝާރާތްކުރައްވާ ވިދާޅުވީ ރައީސް މަޢުމޫނާއެކު އެމަނިކުފާނާއި، އިލްހާމް އާއި، ޢަލީ ވަޙީދަކީވެސް ޖަލަށްލީ މީހުންގެ ތެރޭގައި ހިމެނޭ މީހުންކަމަށެވެ.

"ކިރިޔާވެސް ވާހަކަ ދައްކާލެވޭ މީހަކު ވިއްޔާ ޖަލަށް! ޖަލަށް! ހުންނާނީ ވެރިކަން ކުރެވިފައި! މިހާރު ވެރިކަންކުރައްވަން އޭނީ! އަނިޔާވެރިވީމާ ވާނީ އެހެން!" ޤާސިމް ވިދާޅުވިއެވެ.

ޤާސިމް ވަނީ ޕްރޮގްރެސިވް ޕާޓީ (ޕީޕީއެމް) ގެ މެންބަރުންނާއި ސަޕޯޓަރުން ރައީސް ޔާމީނުގެ ޖަލު ޙުކުމަކީ ހަރާން ޙުކުމެކޭ ކިޔައީ މުޒާހަރާކުރާތީ ރައްޔިތުން އެކަމާ ވިސްނާވަޑައިގަތުމަށް ގޮވާލާފައެވެ.

"އެކަމަކު އޭނަގެ ވާހަކަ ދައްކައިގެން، މީ މާމޮޅު މީހަކަށްވެގެން  އަޅުގަނޑުމެން އަތްޖަހާފައި މިތިބެނީ، ދިދަ ދަމައިގެން، އަނގަ ހުޅުވައިގެން ހަމަ ހަރާން ޙުކުމޭ ކިޔައިގެން ވާހަކަ ދައްކަން!"

މި ޖަލްސާގައި ވާހަކަ ދައްކަވަމުން ޤާސިމް ވަނީ ޕީޕީއެމްއަށް ވަރަށް ބޮޑަށް ފާޑުވިދާޅުވެފައެވެ.